ເຊົ້າວັນທີ 21 ທັນວາຜ່ານມານີ້, ເຊິ່ງເປັນມື້ທີ
11 ຂອງວາລະດຳເນີນກອງປະຊຸມສະໄໝສາມັນເທື່ອທີ
10 ຂອງສະພາແຫ່ງຊາດຊຸດທີ VII, ທ່ານ ດຣ.
ໄຊສົມພອນ ພົມວິຫານ ຮອງປະທານສະພາແຫ່ງຊາດ ຂຶ້ນຜ່ານບົດລາຍງານການເຄື່ອນໄຫວວຽກງານຂອງສະພາໃນ 5 ປີຕໍ່ກອງປະຊຸມດັ່ງກ່າວວ່າ:
ໃນໄລຍະ 5 ປີຜ່ານມາ ທົ່ວພັກ-ລັດ ແລະ ປະຊາຊົນລາວທັງຊາດ ໄດ້ພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ
IX ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ
7 ບົນຈິດໃຈ
4 ບຸກທະລຸເຂົ້າໃນຂົງເຂດວຽກງານຂອງຕົນຕິດພັນກັບຂະບວນການເຮັດທົດລອງວຽກງານ 3 ສ້າງ ຢ່າງເປັນຂະບວນຟົດຟື້ນ, ໄປພ້ອມໆກັບການເຄື່ອນໄຫວວຽກງານການຕ່າງປະເທດຢ່າງຕັ້ງໜ້າ ແລະ ເປັນເຈົ້າການ, ອັນໄດ້ເຮັດໃຫ້ປະເທດຊາດ ສືບຕໍ່ມີສະຖຽນລະພາບທາງ
ດ້ານ ການເມືອງຢ່າງໜັກແໜ້ນ, ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ໂດຍພື້ນຖານ, ເສດຖະກິດສືບຕໍ່ຂະຫຍາຍຕົວຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງດີຂຶ້ນເປັນກ້າວໆ, ບົດບາດຂອງສປປ ລາວໄດ້ຮັບການຍົກລະດັບຂຶ້ນໃນເວທີພາກພື້ນ ແລະ ສາກົນ. ຄຽງຄູ່ກັນນັ້ນ ພວກເຮົາຍັງພົບກັບຄວາມຫຍຸ້ງຍາກ ແລະ ສິ່ງທ້າທາຍຈຳນວນໜຶ່ງ, ຊຶ່ງເປັນຂໍ້ຈຳກັດຕໍ່ການພັດທະນາເສດຖະກິດ-ສັງຄົມ, ກໍຄືການເຄື່ອນໄຫວຂອງອົງການອຳນາດລັດຂັ້ນຕ່າງໆ ເວົ້າລວມ, ເວົ້າສະເພາະຂອງສະພາແຫ່ງຊາດ, ເປັນຕົ້ນ ການຄຸ້ມຄອງລັດ-ຄຸ້ມຄອງເສດຖະກິດ-ສັງຄົມ ໂດຍລັດຖະທຳມະນູນ ແລະ ກົດໝາຍ
ຍັງບໍ່ທັນເຂັ້ມງວດເຊັ່ນ: ການປະຕິບັດວິໄນການເງິນ-ງົບປະມານ ແລະ ການລົງທຶນ, ການຄຸ້ມຄອງແຮງງານ, ບັນຫາຢາເສບຕິດ ແລະ ການຄ້າມະນຸດ, ບັນຫາໄພພິບັດທາງທຳມະຊາດ, ພະຍາດລະບາດໄດ້ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມ, ກໍຄືການດຳລົງຊີວິດ ແລະ ຊັບສິນຂອງປະຊາຊົນບັນດາເຜົ່າ. ໃນນັ້ນ ຄະນະປະຈຳສະພາແຫ່ງຊາດ ໄດ້ລົງຢ້ຽມຢາມຊຸກຍູ້ການເຄື່ອນໄຫວຢູ່ເຂດເລືອກຕັ້ງຕ່າງໆ ເພື່ອເຮັດໃຫ້ການປະຕິບັດພາລະບົດບາດຂອງສະພາແຫ່ງຊາດ ຢູ່ເຂດເລືອກຕັ້ງ ມີຄວາມເຂັ້ມແຂງຂຶ້ນ ແລະ ໄດ້ນຳເອົາຜົນສຳເລັດຂອງກອງປະຊຸມສະພາແຫ່ງຊາດ,ລັດຖະທຳມະນູນ, ກົດໝາຍ, ມະຕິຂອງກອງປະຊຸມສະພາແຫ່ງຊາດ ແລະ ບັນຫາສຳຄັນ ທີ່ຕິດພັນກັບການຄຸ້ມຄອງຂອງລັດ, ຄຸ້ມຄອງເສດຖະກິດ-ສັງຄົມ ລວມທັງພາລະບົດບາດຂອງສະພາແຫ່ງຊາດ ລົງເຜີຍແຜ່ໃຫ້ພະນັກງານ-ລັດຖະກອນ, ທະຫານ, ຕຳຫລວດ ແລະ ປະຊາຊົນບັນດາເຜົ່າ ໄດ້ຮັບຮູ້ຢ່າງກວ້າງຂວາງຫລາຍຂຶ້ນ. ນອກນີ້ ສະພາແຫ່ງຊາດ ໄດ້ເປັນເຈົ້າການປະສານສົມທົບກັບພາກສ່ວນກ່ຽວຂ້ອງລົງຢ້ຽມຢາມ ແລະ ໃຫ້ການຊ່ວຍເຫລືອບັນເທົາທຸກແກ່ປະຊາຊົນບັນດາເຜົ່າ ທີ່ໄດ້ຮັບຜົນກະທົບຈາກໄພພິບັດທາງທຳມະຊາດ, ໂດຍສະເພາະກອງປະຊມສະໄໝສາມັນເທື່ອທີ
6 ຊຶ່ງໄດ້ສະເໜີມາດຕະການແກ້ໄຂ
ແລະ ເຫັນດີອະນຸມັດງົບປະມານຈຳນວນ 100 ຕື້ກີບ, ຍົກເວັ້ນການນຳເຂົ້າແນວພັນພືດ, ສັດ, ປຸຍ, ຢາປາບສັດຕູພືດ, ແກ່ຍາວການຊຳລະຄ່າໄຟຟ້າ ແລະ ດອກເບ້ຍທະນາຄານ ແລະ ໄດ້ປຸກລະດົມຂົນຂວາຍທຶນຮອນ ຈາກພາກສ່ວນຕ່າງໆ ປະມານ 300 ກວ່າຕື້ກີບ ແລະ 110.000 ໂດລາສະຫະລັດ ເພື່ອປະກອບສ່ວນແກ້ໄຂວຽກງານດັ່ງກ່າວ ແລະ ການພັດທະນາພື້ນຖານໂຄງລ່າງຢູ່ທ້ອງຖິ່ນຕ່າງໆຢ່າງມີຜົນ.
ທ່ານຮອງປະທານສະພາແຫ່ງຊາດ ກ່າວວ່າ: ເພື່ອສືບຕໍ່ຈັດຕັ້ງປະຕິບັດທິດທາງວຽກງານຂອງສະພາແຫ່ງຊາດ ຊຸດທີ 7 ໃຫ້ບັນລຸຕາມຄາດໝາຍທີ່ວາງໄວ້ ສະພາແຫ່ງຊາດ ຈະສືບຕໍ່ຈັດຕັ້ງປະຕິບັດພາລະບົດບາດເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າໃຫ້ຫລາຍຂຶ້ນກວ່າເກົ່າ, ຕັ້ງໜ້າຈັດຕັ້ງປະຕິບັດພາລະບົດບາດເປັນອົງການນິຕິບັນຍັດໃຫ້ມີຄວາມສັກສິດ, ສືບຕໍ່ຊຸກຍູ້ ແລະ ຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດປະຈຳສົກປີ 2015-2016, ສ້າງຄວາມເຂັ້ມແຂງໃຫ້ສະພາແຫ່ງຊາດ ແລະ ສືບຕໍ່ປະຕິບັດວຽກງານການຕ່າງປະເທດຂອງສະພາແຫ່ງຊາດຕາມທີ່ໄດ້ວາງໄວ້ຢ່າງເຂັ້ມງວດ.
No comments:
Post a Comment