ບຸນມະໂຫລານຮູບເງົາເພື່ອສະເຫລີມສະຫລອງຫລວງພະບາງໄດ້ຮັບຮອງເຂົ້າເປັນເມືອງມໍລະດົກໂລກຄົບຮອບ 20 ປີ ( 9/12/ 1995-9/12/2015),ໄດ້ໄຂຂຶ້ນຢ່າງເປັນທາງການໃນຄໍ່າຄືນວັນທີ 5 ທັນວາຜ່ານມານີ້, ທີ່ເດີ່ນໂຮງຮຽນປະຖົມສຶກສາແຂວງຫລວງພະບາງ, ໂດຍການເຂົ້າຮ່ວມຂອງທ່ານລັດຖະມົນຕີຊ່ວຍວ່າການກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ບົວເງິນ ຊາພຸວົງ, ທ່ານເຈົ້າແຂວງຫລວງພະບາງ ສຸກັນ ບຸນຍົງ, ພ້ອມດ້ວຍມວນຊົນເຂົ້າຮ່ວມເປັນຈໍານວນຫລາຍ.
ໃນໂອກາດນີ້, ທ່ານເຈົ້າແຂວງຫລວງພະບາງໄດ້ມີຄໍາເຫັນວ່າ: ບຸນມະໂຫລານຮູບເງົາຄັ້ງນີ້ແມ່ນຈັດຂຶ້ນເປັນຄັ້ງທີ
5 ແລະ ເປັນກິດຈະກຳໜຶ່ງໃນການສະເຫລີມສະຫລອງເມືອງຫລວງພະບາງເປັນມໍລະ
ດົກໂລກຄົບຮອບ 20 ປີ,
ຮູບເງົາທີ່ນຳມາສາຍຊຶ່ງມີຫລາຍກວ່າ
30 ເລື່ອງທີ່ມາຈາກພາຍໃນ ແລະ ຕ່າງປະເທດຄື: ເລື່ອງປູ່ສົມບູນ, ສິ່ງນັ້ນເອີ້ນວ່າພົມລິຂິດ, ສິຕິ, ພະສົງ,
ເພັດຊະຄາດ, ກົດແຫ່ງການຂ້າ ແລະ ອື່ນໆ. ນອກຈາກນີ້ງານດັ່ງກ່າວຍັງເປັນການອານຸລັກສົ່ງເສີມ
ແລະ ໂຄສະນາເຜີຍແຜ່ວັດທະນະທຳຮີດຄອງປະເພນີອັນດີງາມຂອງທ້ອງຖິ່ນ, ເປັນເວທີແລກປ່ຽນວັດທະນະທຳ ແລະ ບົດຮຽນໃນການຜະລິດຮູບເງົາທັງພາຍໃນ
ແລະ ຕ່າງປະເທດເພື່ອສົ່ງເສີມ ແລະ ພັດທະນາອຸດສາຫະກຳຮູບເງົາລາວໃຫ້ເຕີບໃຫຍ່ຂະຫຍາຍຕົວ,
ເຮັດໃຫ້ຕ່າງປະເທດຮັບຮູ້ກ່ຽວກັບ ສປປ ລາວ ຜ່ານຮູບເງົາຫລາຍຂຶ້ນ.
ທ່ານລັດຖະມົນຕີຊ່ວຍວ່າການກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວກ່າວວ່າ:ໃນໄລຍະຜ່ານມາ, ວຽກງານຮູບເງົາໃນລາວແມ່ນມີທ່າກ້າວຂະຫຍາຍຕົວສົມຄວນ, ເຊິ່ງມັນສະແດງອອກຂອງຈຳນວນຜະລິດຕະພັນຮູບເງົາ ໄດ້ເພີ່ມຂຶ້ນທຸກໆປີ, ຂະນະດຽວກັນບໍລິສັດຜະລິດຮູບເງົາ ແລະ ໂຮງສາຍຮູບເງົາທີ່ມີມາດຕະຖານກໍມີຫລາຍຂຶ້ນເຊັ່ນກັນ, ເຊິ່ງເປັນສ່ວນໜຶ່ງໃນການໂຄສະນາເຜີຍແຜ່ວັດທະນາທໍາ ແລະ ສ້າງຄວາມບັນເທິງໃຫ້ກັບສັງຄົມໄດ້ດີຕະຫລອດມາ.
No comments:
Post a Comment