ໃນຕອນບ່າຍວັນທີ 23 ທັນວານີ້, ທ່ານ ດຣ.
ພັນຄຳ ວິພາວັນ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຜູ້ຊີ້ນຳຂົງເຂດວຽກງານວັດທະນະທຳ-ສັງຄົມ
ໄດ້ໃຫ້ກຽດຕ້ອນຮັບຄະນະຜູ້ແທນຂັ້ນສູງຂອງສຳນັກຂ່າວສານຫວຽດນາມ ນຳໂດຍທ່ານ ຫງວຽນດຶກເລີ້ຍ ອຳນວຍການໃຫຍ່ສຳນັກຂ່າວດັ່ງກ່າວ ໃນໂອກາດມາຢ້ຽມຢາມ ແລະ ເຮັດວຽກຢູ່ລາວ ໃນວັນທີ 23-26 ທັນວານີ້ ຕາມແຜນການຮ່ວມມືລະຫວ່າງສຳນັກຂ່າວສານປະເທດລາວ ແລະ ຂ່າວສານຫວຽດນາມ ທີ່ເຄີຍແລກປ່ຽນປະຕິບັດມາໃນແຕ່ລະປີ.
ໃນການຕ້ອນຮັບດ້ວຍບັນຍາກາດອັນອົບອຸ່ນນັ້ນ, ທ່ານຮອງນາຍົກລັດຖະມົນຕີ ໄດ້ສະແດງຄວາມຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຢູ່ລາວຂອງຄະນະຄັ້ງນີ້ ຈະເປັນການ
ປະກອບສ່ວນສຳຄັນໃນການຮັດແໜ້ນສາຍພົວພັນ, ຮ່ວມມືຊ່ວຍເຫລືອເຊິ່ງກັນ ແລະ ກັນລະຫວ່າງສອງສຳນັກຂ່າວໃນການເຮັດວຽກໂຄສະນາເຜີຍແຜ່ແນວທາງນະໂຍບາຍຂອງພັກ, ລະ ບຽບກົດໝາຍຂອງລັດ ແລະ ຂໍ້ມູນຂ່າວສານ, ສາລະໜ້າຮູ້ທີ່ເປັນຜົນປະໂຫຍດຕ່າງໆໃຫ້ແກ່ສັງຄົມ, ປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ລັດຖະບານ ແລະ ປະຊາຊົນສອງຊາດໃຫ້ນັບມື້ແໜ້ນແກ່ນ ແລະ ແຕກດອກອອກຜົນງອກງາມຍິ່ງໆຂຶ້ນ.
ໃນໂອກາດອັນສຳຄັນນີ້, ທ່ານອຳນວຍການໃຫຍ່ຂ່າວສານປະເທດລາວ ໄດ້ແຈ້ງໃຫ້ທ່ານຮອງນາຍົກລັດຖະມົນຕີຮັບຊາບຜົນສຳເລັດຕ່າງໆແຫ່ງການພົວພັນຮ່ວມມືຊ່ວຍເຫລືອຂອງສອງສຳນັກ ນັບແຕ່ສະໄໝຕໍ່ສູ້ປົດປ່ອຍຊາດຈົນມາເຖິງປັດຈຸບັນ ຍາມໃດສອງສຳນັກຂ່າວກໍໃຫ້ຄວາມສຳຄັນເປັນພິເສດຕໍ່ການຮ່ວມມືຊ່ວຍເຫລືອເຊິ່ງກັນ ແລະ ກັນຢ່າງຮອບດ້ານ, ເຖິງວ່າຈະມີຄວາມຫຍຸ້ງຍາກໃດໆ ໂດຍສະເພາະແມ່ນການຊ່ວຍເຫລືອກໍ່ສ້າງພະນັກງານຂ່າວໃຫ້ແກ່ສຳນັກຂ່າວສານປະເທດລາວ ທັງໃນໄລຍະສັ້ນ ແລະ ໄລຍະຍາວມີຜົນສຳເລັດຢ່າງໜ້າເພິ່ງພໍໃຈ.
ໃນໂອກາດດຽວກັນ, ທ່ານຮອງນາຍົກລັດຖະມົນຕີ ໄດ້ແນະນຳໃຫ້ສອງຝ່າຍຈົ່ງເພີ່ມທະວີຮັດແໜ້ນສາຍພົວພັນຮ່ວມມືຊ່ວຍເຫລືອເຊິ່ງກັນ ແລະ ກັນໃຫ້ມີປະສິດທິຜົນຫລາຍຂຶ້ນ ໂດຍສະເພາະແມ່ນຝ່າຍຫວຽດນາມຈະຕ້ອງໄດ້ອອກແຮງຕື່ມອີກໃນການຊ່ວຍເຫລືອກໍ່ສ້າງພະນັກງານວິຊາການ, ນັກຂ່າວຂອງລາວໃຫ້ມີຄວາມອາດສາມາດເຂັ້ມແຂງກວ່າເກົ່າ ເພື່ອການເຊື່ອມໂຍງເຂົ້າກັບຂົງເຂດ ແລະ ສາກົນໄດ້ເທື່ອລະກ້າວ.
ໃນຕອນບ່າຍຂອງວັນດຽວກັນ ກໍມີການພົບປະສອງຝ່າຍຂຶ້ນທີ່ສຳນັກງານຂ່າວສານປະເທດລາວ, ຝ່າຍລາວນຳໂດຍທ່ານ ສູນທອນ ຄັນທະວົງ ອຳນວຍການໃຫຍ່ຂ່າວສານປະເທດລາວ ແລະ ຝ່າຍຫວຽດນາມນຳໂດຍທ່ານ ຫງວຽນດຶກເລີ້ຍ ອຳນວຍການໃຫຍ່ຂ່າວສານຫວຽດນາມ ເພື່ອທົບທວນຄືນການຈັດຕັ້ງປະຕິບັດແຜນການຮ່ວມມືສອງຝ່າຍໃນໄລຍະຜ່ານມາ
ແລະ ເຫັນວ່າມີຫລາຍໜ້າວຽກໄດ້ຮັບຜົນສຳເລັດຢ່າງຈົບງາມ ໂດຍສະເພາະການແລກປ່ຽນຂໍ້ມູນຂ່າວສານ, ການຊ່ວຍເຫລືອກໍ່ສ້າງພະນັກງານ ນັບທັງນັກຂ່າວ ແລະ ວຽກເຕັກນິກຂອງສຳນັກງານຂ່າວສານນັບມື້ເຕີບໃຫຍ່ເຂັ້ມແຂງ. ພ້ອມນັ້ນ ສອງສຳນັກໄດ້ຮ່ວມກັນລົງນາມໃນສັນຍາຮ່ວມມືລະຫວ່າງສອງຝ່າຍໄລຍະ 5 ປີ
(2015-2020) ໂດຍເປັນເອກະພາບເພີ່ມທະວີການຮ່ວມມືຊ່ວຍເຫລືອເຊິ່ງກັນ ແລະ ກັນໃຫ້ຮອບ ດ້ານ ແລະ ມີປະສິດທິຜົນກວ່າເກົ່າ, ປະກອບສ່ວນສຳຄັນເຂົ້າໃນການຮັດແໜ້ນສາຍພົວພັນຮ່ວມມືແບບພິເສດລະຫວ່າງສອງປະເທດໃຫ້ຍືນຍົງຄົງຕົວຕະຫລອດກາລະນານ.
No comments:
Post a Comment