ໃນວັນທີ
4 ທັນວານີ້, ກົມອະນາໄມ ແລະ ສົ່ງເສີມສຸຂະພາບກະຊວງສາທາລະນະສຸກ, ໄດ້ຈັດກອງປະຊຸມປືກສາຫາລືຕອບໂຕ້ການລະບາດຄືນມາໃໝ່ຂອງພະຍາດໂປລີໂອຜ່ານສື່ມວນຊົນ, ພາຍ ຫລັງກວດພົບການເກີດຂຶ້ນຂອງພະຍາດດັ່ງກ່າວຢູ່ແຂວງບໍລິຄໍາໄຊ ແລະ
ແຂວງໄຊສົມບູນ ເມື່ອບໍ່ດົນມານີ້.
ທ່ານຫົວໜ້າກົມອານາໄມ ແລະ ສົ່ງເສີມສຸຂະພາບ ດຣ ເພັດ
ເກິ່ງຊາເນດ ກ່າວວ່າ: ສື່ມວນຊົນມີບົດບາດສໍາຄັນຫລາຍໃນການໂຄສະນາເຜີຍແຜ່ໃຫ້ປະຊາຊົນກຸ່ມເປົ້າໝາຍໄດ້ຮັບຮູ້ຂໍ້ມູນຂ່າວ ສານຢ່າງກວ້າງຂວາງ
ແລະ ວ່ອງໄວໃນການຕອບໂຕ້ການລະບາດຂອງພະຍາດດັ່ງກ່າວ, ຊຶ່ງນັບແຕ່ປີ 2000 ເປັນຕົ້ນມາ, ສປປ ລາວ ໄດ້ປະກາດລົບລ້າງພະຍາດດັ່ງກ່າວໄປ
ແລ້ວ, ແຕ່ມາໃນຕົ້ນເດືອນຕຸລາ 2015 ນີ້, ໄດ້ຮັບການຢືນຢັນຈາກຫ້ອງກວດທາງເຄມີວ່າໄດ້ພົບເຊື້ອພະຍາດໂປລີໂອ
4 ກໍລະນີຢູ່ແຂວງບໍລິຄຳໄຊ
ແລະ ແຂວງໄຊສົມບູນ ແລະ ເພື່ອເປັນການສະກັດກັ້ນ ແລະ ຕອບໂຕ້ພະຍາດດັ່ງ ກ່າວ, ກະຊວງສາທາລະນະສຸກຮ່ວມກັບອົງການຈັດຕັ້ງສາກົນປະຈຳລາວ ແລະ ພາກສ່ວນກ່ຽວຂ້ອງໄດ້ເປີດຂະບວນຢອດຢາກັນໂປລີໂອແບບເປີດກວ້າງນັບແຕ່ເດືອນຕຸລາ 2015 ເຖິງເດືອນມີນາ 2016 ໃນນັ້ນ 4 ຄັ້ງແມ່ນລະດັບທ້ອງຖິ່ນ ແລະ ລະດັບຊາດ 2 ຄັ້ງ. ມາຮອດປັດຈຸບັນແມ່ນຈັດມາແລ້ວ 2 ຄັ້ງຢູ່ 3 ແຂວງຄື:
ແຂວງບໍລິຄຳໄຊ,ໄຊສົມບູນ ແລະ ແຂວງຊຽງຂວາງ ແລະ ໃນວັນທີ 21-31 ທັນວາ 2015 ທີ່ຈະເຖິງນີ້, ແມ່ນຈະເປີດຂະບວນສັກຢາ-ຢອດຢາຄັ້ງທີ
3 ຢູ່ 18 ແຂວງໃນທົ່ວປະເທດ, ຄັ້ງທີ
4 ແຕ່ວັນທີ 18-31 ມັງກອນ
2016 ຢູ່ 15 ແຂວງ .ຍົກເວັ້ນແຂວງບໍລິຄຳໄຊ, ໄຊສົມບູນ ແລະ ແຂວງຊຽງຂວາງ, ຄັ້ງທີ
5 ວັນທີ 15-28 ກຸມພາ 2016 ຢູ່ 18 ແຂວງ ແລະ ຄັ້ງທີ
6 ຄາດວ່າຈະຢູ່ 75 ເມືອງທີ່ມີຄວາມສ່ຽງໃນວັນທີ 21-31 ມີນາ2016. ທັງນີ້ກໍເພື່ອເຮັດໃຫ້ເດັກໄດ້ເຂົ້າເຖິງການຮັບວັກແຊງຫລາຍກວ່າ 90% ຫລືຄິດສະເລ່ຍໃຫ້ໄດ້ 8,6 ລ້ານຄັ້ງໃນເດັກທຸກຄົນທີ່ມີອາຍຸຕ່ຳກວ່າ 15 ປີ.
ກະຊວງສາທາລະນະສຸກໃຫ້ຮູ້ວ່າ: ໂປລີໂອ
ເປັນພະຍາດທີ່ສາມາດເຮັດໃຫ້ຜູ້ຕິດເຊື້ອເປັນລ່ອຍ ແລະ ເສຍຊີວິດໄດ້, ພະຍາດດັ່ງກ່າວຖ້າເກີດຂຶ້ນແລ້ວບໍ່ສາມາດປິ່ນປົວໄດ້ແຕ່ສາມາດປ້ອງກັນໄດ້ດ້ວຍການຢອດຢາ
ຫລືສັກວັກແຊງໃຫ້ຄົບ 3 ຄັ້ງ. ສະນັ້ນ ເພື່ອຄວາມປອດໄພ
ແລະ ຮັກສາຊີວິດຂອງເດັກຜູ້ປົກຄອງຄວນນຳເອົາລູກ-ຫລານຂອງຕົນເອງໄປຮັບວັກແຊງໃຫ້ຄົບຕາມກຳນົດ.
ກອງປະຊຸມດັ່ງກ່າວມີຜູ້ຕາງໜ້າຈາກກະຊວງສາທາລະນະສຸກ, ອົງການອຸຍນີເຊັບປະຈຳລາວ ແລະ ສື່ມວນຊົນຫລາຍຂະແໜງເຊັ່ນ: ໜັງສືພິມ, ວິທະຍຸ ແລະ ໂທລະພາບເຂົ້າຮ່ວມນໍາດ້ວຍ.
No comments:
Post a Comment