ກອງປະຊຸມສະຫລຸບວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານທົ່ວປະເທດຄັ້ງທີ VI, ໄດ້ຈັດຂຶ້ນໃນວັນທີ 23 ທັນວານີ້ ແລະ ຈະດໍາເນີນໄປເປັນເວລາ 3 ວັນທີ່ນະຄອນຫລວງວຽງຈັນ, ໂດຍການເປັນປະທານຂອງທ່ານ ສົມສະນິດ ສຸວັນນະລາດ ລັດຖະ ມົນຕີຊ່ວຍ, ຫົວໜ້າຄະນະພັດທະນາຊົນນະບົດ, ມີບັນດາຫົວໜ້າຫ້ອງການຄະນະພັດທະນາຊົນນະບົດໃນທົ່ວປະເທດເຂົ້າຮ່ວມ, ເພື່ອທົບທວນຄືນຜົນສຳເລັດໃນການຈັດຕັ້ງປະຕິບັດວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານແຕ່ປີ 2011-2015 ແລະ ກຳນົດທິດທາງແຜນການ 5 ປີ(2016-2020)
ເພື່ອເປັນຂີດໝາຍຂອງການບັນລຸ
ເປົ້າໝາຍສະຫັດສະວັດແຫ່ງການພັດທະນາຊົນນະບົດເປັນຕົ້ນ: ບັນລຸເປົ້າໝາຍການແກ້ໄຂຄວາມທຸກຍາກ ແລະ ໄພອຶດຫິວ, ການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ, ເຊິ່ງພັກ ແລະ ລັດຖະບານ, ໄດ້ເອົາໃຈໃສ່ເປັນບຸລິມະສິດ ແລະ ສະແດງອອກຄື: ໃນປີ
2015 ສາມາດຫລຸດຈຳນວນເມືອງທຸກຍາກຈາກ 53 ເມືອງໃນປີ
2011 ຍັງເຫລືອພຽງ23 ເມືອງ, ບ້ານທຸກຍາກທົ່ວປະເທດມີ 1.736 ບ້ານ, ໄດ້ຫລຸດລົງ1.439 ບ້ານ, ຄອບຄົວທຸກຍາກມີ 76.604 ຄອບຄົວຫລຸດລົງຈາກປີ 2011 ຈຳນວນ 122.074 ຄອບຄົວ, ບ້ານພັດທະນາເພີ່ມຂຶ້ນ 3.577 ບ້ານກວມເອົາ 42,23% ແລະ ຄອບຄົວພັດທະນາເພີ່ມຂຶ້ນ 896.319 ຄອບຄົວກວມ
77,11% ເພີ່ມຂຶ້ນຈາກປີ 2011 ຈຳນວນ 400.696 ຄອບຄົວ, ນອກ ຈາກນີ້, ກອງປະຊຸມຍັງໄດ້ຮັບຟັງການປະກອບຄຳຄິດຄຳເຫັນຂອງບັນດາຂະແໜງການອ້ອມຂ້າງສູນກາງ ແລະ ທ້ອງຖິ່ນຈຳນວນໜຶ່ງໃສ່ບົດສະຫລຸບ, ທິດທາງແຜນການ ແລະ ຄາດໝາຍສູ້ຊົນໃນຕໍ່ໜ້າ.
ທ່ານ ສົມສະນິດ ສຸວັນນະລາດ ກ່າວວ່າ:
ຍ້ອນຄວາມເອົາໃຈໃສ່ຊີ້ນຳ-ນໍາພາຂອງພັກ-ລັດຖະບານ ຈຶ່ງເຮັດໃຫ້ເຂດຈຸດສຸມ, ເຂດຊົນນະບົດຫ່າງໄກສອກຫລີກມີໃບໜ້າໃໝ່, ປະຊາຊົນມີຄວາມໜັກແໜ້ນທາງດ້ານການເມືອງແນວຄິດ, ການຈັດຕັ້ງຂັ້ນພື້ນຖານໄດ້ຮັບການປັບປຸງໃຫ້ມີຄວາມສະຫງົບປອດໄພ ແລະ ມີຄວາມເປັນລະບຽບຮຽບຮ້ອຍ, ເສດຖະກິດມີການເຕີບໃຫຍ່ຂະຫຍາຍຕົວ, ປະຊາຊົນສາມາດເຂົ້າເຖິງການບໍລິການສາທາລະນະສຸກ, ການສຶກສາ,
ແລະ ສິ່ງອຳນວຍຄວາມສະດວກອື່ນໆ, ວຽກງານວັດທະນະທຳ-ສັງຄົມ, ໄດ້ຮັບການປົວແປງເຮັດໃຫ້ຊີວິດການເປັນຢູ່ຂອງປະຊາຊົນນັບມື້ດີຂຶ້ນເປັນກ້າວໆ.
No comments:
Post a Comment