ພິທີມອບ-ຮັບປຶ້ມແບບຮຍນຊັ້ນມັດທະຍົມຈຳນວນຫລາຍກວ່າ 1 ແສນເຫລັ້ມ ໄດ້ມີຂຶ້ນໃນວັນທີ 28 ມັງກອນນີ້, ຢູ່ກະຊວງສຶກສາທິການ ແລະ ກິລາ,
ນະຄອນຫລວງວຽງຈັນ ລະຫວ່າງທ່ານ ກຳພົນ ເອກເມທີພັນ ຮອງປະທານຝ່າຍປະຕິບັດການສຳນັກງານເຂດພູມີພາກແມ່ນ້ຳຂອງ ບໍລິສັດ ໂຕໂຍຕາ ມໍເຕີ ປະເທດໄທ ຈຳກັດ ແລະ ທ່ານ ກອງສີ
ແສງມະນີ ລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາ.
ທ່ານຮອງປະທານຝ່າຍປະຕິບັດການສຳນັກງານເຂດພູມີພາກແມ່ນ້ຳຂອງ ກ່າວໃນພິທີວ່າ: ນີ້ເປັນກິດຈະກຳໜຶ່ງທີ່ໂຕໂຕຍາ
ໄດ້ຈັດຂຶ້ນ, ພາຍໃຕ້ໂຄງການ “ໃຈດີໃຫ້ນ້ອງ” ນັບແຕ່ປີ 2011 ມາຮອດປັດຈຸບັນ ແລະ ໃນຄັ້ງນີ້ ມີປຶ້ມຈຳນວນ 1 ແສນກວ່າເຫລັ້ມເພື່ອມອບໃຫ້ນ້ອງໆນັກຮຽນຂອງໂຮງຮຽນຊັ້ນ
ມັດທະຍົມຕ່າງໆໃນທົ່ວປະເທດ, ໂດຍສະເພາະແມ່ນບັນດາແຂວງທີ່ຂາດເຂີນອຸປະກອນການຮຽນ-ການສອນ, ພ້ອມນີ້ ໂຕໂຍຕາ ຍັງໄດ້ໃຫ້ຄຳໝັ້ນສັນຍາວ່າຈະສືບຕໍ່ຈັດກິດຈະກຳຕ່າງໆ ເພື່ອສັງຄົມລາວຕໍ່ໄປ ແລະ ຜ່ານມາໂຕໂຍຕາ ກໍເຄີຍໄດ້ມອບປຶ້ມແບບຮຽນດັ່ງກ່າວ ໃຫ້ໂຮງຮຽນຕ່າງທມາແລ້ວຫລາຍກວ່າ 4 ແສນເຫລັ້ມ.
ທ່ານລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາ ໄດ້ກ່າວຂອບໃຈມາຍັງຜູ້ບໍລິຫານ ກໍຄືບໍລິສັດ ໂຕໂຍຕາ ທີ່ໄດ້ນຳເອົາອຸປະກອນການຮຽນ-ການສອນ ກໍຄືປຶ້ມແບບຮຽນຊັ້ນມັດທະຍົມມາມອບໃຫ້ນ້ອງນັກຮຽນຄັ້ງນີ້, ອັນຈະໄດ້ປະກອບສ່ວນສຳຄັນເຂົ້າໃນການຍົກສູງຄຸນນະພາບການສຶກສາທີ່ດີຂຶ້ນ, ພ້ອມຍັງໄດ້ຊ່ວຍໃຫ້ນ້ອງນັກຮຽນຜູ້ທີ່ຂາດເຂີນ, ດ້ອຍໂອກາດໄດ້ນຳໃຊ້ປຶ້ມຈຳນວນດັ່ງກ່າວໃຫ້ມີປະໂຫຍດແກ່ຕົນເອງ ແລະ ປະເທດຊາດ.
No comments:
Post a Comment