ມອບ-ຮັບໜ້າທີ່ຫົວໜ້າບັນນາທິການໜັງສືພິມປະຊາຊົນ ແລະ ອຳນວຍການວິທະຍຸກະຈາຍສຽງແຫ່ງຊາດ

ພິທີມອບ-ຮັບໜ້າທີ່ຫົວໜ້າບັນນາທິການໜັງສືພິມປະຊາຊົນ ລະຫວ່າງທ່ານ ສີວຽງແຂກ ກອນນິວົງ ຫົວໜ້າບັນນາທິການຜູ້ເກົ່າ ແລະ ທ່ານ ດວງຈິດ ສະຫວັດບຸນມີ ຮັກສາການຫົວໜ້າບັນນາທິການຜູ້ໃໝ່ ໄດ້ຈັດຂຶ້ນໃນວັນທີ 26 ມັງກອນນີ້ ທີ່ນະຄອນຫລວງວຽງຈັນ ເພື່ອເປັນການປັບປຸງການຈັດຕັ້ງ ກໍຄືປະຕິບັດຕາມດຳລັດຂອງນາຍົກລັດຖະມົນຕີ ສະບັບເລກທີ 269/ນຍ, ລົງວັນທີ 7 ກັນຍາ 2015 ວ່າດ້ວຍການອະນຸມັດໃຫ້ພະນັກງານອອກພັກການ-ຮັບເບ້ຍບຳນານ ແລະ ຂໍ້ຕົກລົງຂອງລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເລກທີ 12/ຖວທ, ລົງວັນທີ 6/1/2016 ວ່າດ້ວຍການແຕ່ງຕັ້ງຜູ້ຮັກສາການຫົວໜ້າໜັງສືພິມປະຊາຊົນ.

ໂອກາດນີ້, ທ່ານ ສຈ. ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໄດ້ໃຫ້ກຽດໂອ້ລົມ ໂດຍໄດ້ສະແດງຄວາມຍ້ອງຍໍຊົມເຊີຍການຊີ້ນຳ-ນຳພາວຽກງານຂອງຫົວໜ້າບັນນາທິການໜັງສືພິມຜູ້ເກົ່າ, ພ້ອມຮຽກຮ້ອງໃຫ້ຫົວໜ້າຜູ້ໃໝ່ຈົ່ງເສີມຂະຫຍາຍມູນເຊື້ອຄວາມສາມັກຄີອັນເປັນປຶກແຜ່ນ, ຍາດໄດ້ຜົນສຳເລັດໃໝ່ໃຫຍ່ຫລວງກວ່າເກົ່າ ດ້ວຍການປັບປຸງເນື້ອໃນໃຫ້ມີຄຸນນະພາບຈັບໃຈຜູ້ອ່ານ ແລະ ຈັດສົ່ງໜັງສືພິມໃຫ້ເຖິງເຂດຫ່າງໄກສອກຫລີກໃຫ້ສົມກັບວ່າແມ່ນສຽງຂອງສູນກາງພັກປະຊາຊົນປະຕິວັດລາວ.

ຂ່າວໃຫ້ຮູ້ອີກວ່າ: ໃນຕອນບ່າຍຂອງວັນດຽວກັນ ກໍໄດ້ມີພິທີມອບ-ຮັບໜ້າທີ່ອຳນວຍການໃຫຍ່ວິທະຍຸກະຈາຍສຽງແຫ່ງຊາດ ລະຫວ່າງທ່ານ ສີພາ ນົງລາດ ຫົວໜ້າອຳນວຍການຜູ້ເກົ່າ ແລະ ທ່ານ ໂພສີ ແກ້ວມະນີວົງ ຮັກສາການອຳນວຍການວິທະຍຸກະຈາຍສຽງດັ່ງກ່າວ (ຜູ້ໃໝ່) ໂດຍການໃຫ້ກຽດເຂົ້າຮ່ວມ ແລະ ໂອ້ລົມຊີ້ນຳຂອງທ່ານ ສຈ. ດຣ. ບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ເຊັ່ນກັນ.