ແຂວງຫົວພັນ ໄດ້ຮັບເຄື່ອງຊ່ວຍເຫລືອບັນເທົາທຸກ ເພື່ອຕ້ານໄພໜາວ ຈາກບັນດາຫ້າງຮ້ານ ແລະ ບໍລິສັດຈຳນວນໜຶ່ງ ລວມມູນຄ່າ 56 ລ້ານກີບ, ໃນນັ້ ທ່ານ ດຣ. ຄຳມະນີ ອິນທິລາດ ລັດຖະ ມົນຕີວ່າການກະຊວງພະລັງງານ ແລະ ບໍ່ແຮ່ ມອບເງິນສ່ວນຕົວ ຈຳນວນ 10 ລ້ານກີບ, ຮ້ານອາປິງ ຕົວແທນຈຳໜ່າຍ ໂທລະສັບຫົວເວີຍ ມອບຜ້າຫົ່ມ 175 ຜືນ, ໂສ້ງ 400 ຜືນ ລວມມູນຄ່າ 27 ລ້ານກີບ, ທ່ານ ອາໂກ ນັກທຸລະກິດຈີນ ມອບຜ້າຫົ່ມ 300 ຜືນ ມູນຄ່າ 19 ລ້ານກວ່າກີບ, ໂດຍພິທີມອບ-ຮັບ ເຄື່ອງຊ່ວຍເຫລືອດັ່ງກ່າວ ມີຂຶ້ນໃນວັນທີ 26 ມັງກອນນີ້, ໂດຍແມ່ນທ່ານ ວັນໄຊ ແພງຊຸມມາ ເຈົ້າແຂວງໆຫົວພັນ ເປັນຜູ້ຮັບ ເພື່ອນຳໄປມອບໃຫ້ບັນດາເມືອງ, ບ້ານທີ່ຢູ່ເຂດຫ່າງໄກສອກຫລີກ ທີ່ປະສົບໄພໜາວດັ່ງກ່າວ, ພ້ອມດຽວກັນນັ້ນ ພະແນກແຮງງານ ແລະ ສະຫວັດດີການສັງຄົມ ແຂວງຊຽງຂວາງ ແລະ ແຂວງອື່ນໆ ໃນຂອບເຂດທົ່ວປະເທດ ກໍໄດ້ນຳເອົາເຄື່ອງນຸ່ງຫົ່ມເປັນຕົ້ນເສື້ອກັນໜາວ, ສົ້ງ, ຜ້າພັນຄໍ ໄປມອບໃຫ້ປະຊາຊົນທີ່
ປະສົບໄພໜາວເຊັ່ນດຽວກັນ ແລະ ຈະສືບຕໍ່ປຸກລະດົມ ໃຫ້ບັນດາບໍລິສັດ ທັງພາກລັດ, ເອກກະຊົນ ໃຫ້ມີສ່ວນຮ່ວມໃນການປະກອບສ່ວນຊ່ວຍເຫລືອປະຊາຊົນ ຜູ້ທີ່ປະສົບໄພໜາວ ໃຫ້ມີຊີວິດການເປັນຢູ່ອົບອຸ່ນດີຂຶ້ນ ຂະນະດຽວກັນພະແນກສາທາລະນະສຸກ ຢູ່ບັນດາແຂວງຕ່າງໆໃນຂອບເຂດທົ່ວປະເທດໂດຍສະເພາະແມ່ນແຂວງພາກເໜືອຄື: ຊຽງຂວາງ, ຫົວພັນ ແລະ ຜົ້ງສາລີໄດ້ອອກແຈ້ງເຕືອນໃຫ້ບັນດາເມືອງເຝົ້າລະວັງເປັນພິເສດ ຕໍ່ພະຍາດທີ່ອາດຈະເກີດຂຶ້ນໃນຊ່ວງອາກາດໜາວ ໂດຍສະເພາະແມ່ນພະຍາດອັບເສບລະບົບຫາຍໃຈເຊັ່ນ: ໄຂ້ຫວັດ, ຄໍແດງ, ໄຂ້ຫວັດໃຫຍ່ ແລະ ອັບເສບປອດ ໃນກຸ່ມເດັກນ້ອຍ ແລະ ຜູ້ສູງອາຍຸ ເຊິ່ງໄດ້ຈັດຕັ້ງໜ່ວຍງານລົງໂຄສະນາສຸຂະສຶກສາຢູ່ຕາມໂຮງໝໍ, ກຸ່ມບ້ານ ແລະ ສຸກສາລາ ໃຫ້ປະຊາຊົນເອົາໃຈໃສ່ປະຕິບັດຫລັກການ ອະນາໄມ 3 ສະອາດ ຢ່າງເຂັ້ມງວດ ແລະ ຕ້ອງເຮັດໃຫ້ຮ່າງກາຍອົບອຸ່ນ.
ຕາມການລາຍງານຂອງທ່ານ ດຣ. ວິລະພອນ ພົມວົງສີ ຮອງຫົວໜ້າພະແນກ ສາທາລະນະສຸກ ແຂວງຫົວພັນ ໃນວັນທີ 27 ມັງກອນນີ້ວ່າ: ສະເພາະແຂວງຫົວພັນ ຍັງບໍ່ມີການລະບາດຂອງພະຍາດ ທີ່ເກີດຈາກສະພາບອາກາດໜາວ ແຕ່ເພື່ອປ້ອງກັນການລະບາດ ກໍໄດ້ແຈ້ໃຫ້ບັນດາເມືອງເອົາໃຈໃສ່ເຝົ້າລະວັງ ແລະ ຕິດຕາມສະພາບຢ່າງໃກ້ຊິດ, ພ້ອມທັງມີການລາຍງານທຸກໆມື້ ຄຽງຄູ່ກັບການລົງໂຄສະນາສຸຂະສຶກສາໃຫ້ປະຊາຊົນກຸ່ມເປົ້າໝາຍ ໂດຍເນັ້ນໃສ່ເດັກນ້ອຍ ແລະ ຜູ້ສູງອາຍຸໃຫ້ເອົາໃຈໃສ່ຮັກສາສຸຂະພາບເປັນພິເສດ.
ສຳລັບຢູ່ແຂວງຊຽງຂວາງ ທ່ານນາງ ກົງເດືອນ ສິງຫາລາດ ວິຊາການພະແນກສາທາລະນະສຸກ ແຂວງດັ່ງກ່າວ ໄດ້ລາຍງານວ່າ: ຍັງບໍ່ມີການລະບາດຂອງພະຍາດຮ້າຍແຮງ, ມີພຽງເດັກນ້ອຍຈຳນວນໜຶ່ງ ມີອາການຄໍແດງ ແລະ ພວມປິ່ນປົວຢູ່ໂຮງໝໍແຂວງ, ສ່ວນຢູ່ຜົ້ງສາລີ ກໍຍັງບໍ່ມີລາຍງານວ່າມີການລະບາດຂອງພະຍາດໃນຊ່ວງອາກາດໜາວນີ້, ແຕ່ກໍໄດ້ມີມາດຕະການຕິດຕາມເຝົ້າລະວັງຢ່າງເຂັ້ມງວດແລ້ວ.
No comments:
Post a Comment