ໃນວັນທີ 16 ກຸມພາ 2016 ນີ້ ຢູ່ໂຮງແຮມລັດສະຫມີ ນະ ຄອນຫລວງວຽງຈັນ ສະຫະພັນກິລາກ໊ອຟແຫ່ງຊາດລາວ ຮ່ວມກັບ ວາລະສານ ທາເກັດ ໄດ້ຈັດພິທີຖະແຫລງຂ່າວກຽມຈັດການແຂ່ງຂັນ ລາວ ກ໊ອຟ ຊາເລນ ຄັ້ງທີ 4 ( Lao Golf
Challenge ) ປະຈຳປີ 2016 ເພື່ອຊີງຄວາມເປັນຫນຶ່ງ ພ້ອມຂັນລາງວັນກຽດຕິຍົດທີ່ຈະມີຂຶ້ນໃນວັນທີ 12 ມີນາ 2016 ຢູ່ສະຫນາມກ໊ອຟ ລອງວຽນ ກ໊ອຟຄລັບ ນະຄອນຫລວງວຽງຈັນ. ໂດຍການເຂົ້າຮ່ວມຂອງທ່ານ ສູນທອນ ສິຣິສັກ ປະທານສະຫະພັນກ໊ອຟແຫ່ງຊາດລາວ, ທ່ານ ໄຊຍະສອນ ປັນຍາທິບ ຜູ້ອຳນວຍການວາລະສານທາເກັດ ພ້ອມດ້ວຍແຂກໂຕແທນຜູ້ສະຫນັບສະຫນູນນຳອີກ.
ທ່ານ ສູນທອນ ສິຣິສັກ ປະທານສະຫະພັນກ໊ອຟແຫ່ງຊາດລາວ ກ່າວໃນພິທີຖະແຫລງຂ່າວກຽມຈັດການແຂ່ງຂັນດັ່ງກ່າວວ່າ: ຈຸດປະສົງການຈັດງານໃນຄັ້ງນີ້ ເພື່ອຊຸກຍູ້ສົ່ງເສີມ ແລະ ພັດທະ ນາກິລາກ໊ອຟຂອງລາວເຮົາ ໃຫ້ກ້າວສູ່ລະດັບມືອາຊີບ, ລະດັບສາກົນໃນອະນາຄົດ ກໍຄືຊອກຫາຜູ້ຊະນະເລີດໃນແຕ່ລະສາຍເປັນຕົວແທນໃຫ້ແກ່ນັກກິລາກອ໊ຟລາວເພື່ອເຂົ້າຮ່ວມໃນລາຍການແຂ່ງຂັນກິລາກ໊ອຟຕ່າງໆຢູ່ຕ່າງປະເທດທີ່ກຽມຈະຈັດຂຶ້ນໃນອະນາຄົດອັນໃກ້ນີ້.
ການແຂ່ງຂັນດັ່ງກ່າວເປີດຮັບສະຫມັກເລີ່ມແຕ່ວັນທີ 16 ກຸມພາ - 7 ມີນາ 2016 ນີ້ເທົ່ານັ້ນ. ໂດຍມີການແບ່ງສາຍຄື : ສາຍ Challenge Junior, ສາຍ Professional ມີ1 ລາງວັນ, ສາຍ Special
Prizes ມີ 3 ລາງວັນ, ສາຍ Challenge ມີ 3 ລາງວັນ, ສາຍ Gallaway VIP ມີ 3 ລາງວັນ ແລະ ສາຍ Gallaway ມີ 3 ລາງວັນ. ລວມມູນຄ່າທັງຫມົດຫລາຍກວ່າ 800 ລ້ານກີບ.
ສຳລັບທ່ານທີ່ລົງທະບຽນ ແລະ ຊຳລະເງິນພາຍໃນວັນທີ 16 ກຸມພາ - 1 ມີນາ 2016 ນີ້ ແມ່ນຈ່າຍຄ່າລົງທະບຽນພຽງແຕ່ 1.000.000 ກີບ ຈາກລາຄາເຕັມແມ່ນ 1.200.000 ກີບ. ສ່ວນສາຍ Junior ແມ່ນບໍ່ມີສ່ວນຫລຸດ ຄ່າລົງທະບຽນ 800.000 ກີບ/ທ່ານ.
No comments:
Post a Comment