ຂັບດີ, ມີສະຕິສາມາດຫລຸດຜ່ອນອຸປະຕິເຫດບົນທ້ອງຖະໜົນ

ກະຊວງໂຍທາທິການ ແລະ ຂົນສົ່ງ(ຍທຂ)ໃຫ້ຮູ້ວ່າ: ໃນແຕ່ລະປີຕົວເລກອຸປະຕິເຫດບົນທ້ອງຖະໜົນໄດ້ເພີ່ມຂຶ້ນຢ່າງໜ້າຕົກໃຈ, ອັນໄດ້ສ້າງຄວາມສູນເສຍຕໍ່ຊີວິດ ແລະ ຊັບສິນຂອງບຸກຄົນ ແລະ ສ່ວນລວມຈໍານວນບໍ່ໜ້ອຍ, ສະນັ້ນ ການຫລຸດຜ່ອນອຸປະຕິເຫດບົນທ້ອງຖະໜົນຈຶ່ງແມ່ນວຽກງານບູລິມະສິດສໍາຄັນໜຶ່ງຂອງລັດຖະບານທີ່ມີຄວາມພະຍາຍາມແກ້ໄຂມາໂດຍຕະຫລອດ ແລະ ເພື່ອປະຕິບັດຕາມພາລະບົດບາດໃນການຄຸ້ມຄອງມະຫາພາກ, ກະຊວງ ຍທຂ ຈຶ່ງໄດ້ສ້າງແຜນຍຸດທະສາດແລະ ແຜນດໍາເນີນງານຄວາມປອດໄພຕາມທ້ອງຖະໜົນແຫ່ງທົດສະວັດແຕ່ປີ 2011-2020  ຊຶ່ງໄດ້ມີການກໍານົດແຜນການ, ໂຄງການລະອຽດໃນແຕ່ລະໄລຍະ ແລະ ມອບໃຫ້ແຕ່ລະທ້ອງຖິ່ນເປັນຜູ້ຊີ້ນໍາ, ຄຸ້ມຄອງ ແລະ ຈັດຕັ້ງປະຕິບັດໂດຍສົມທົບກັບເຈົ້າໜ້າທີ່ກ່ຽວຂ້ອງເພື່ອດໍາເນີນບັນດາມາດຕະການແກ້ໄຂທັງໃນສະເພາະໜ້າ ແລະ ຍາວນານຄື: ສົມທົບກັບເຈົ້າໜ້າທີ່ຈະລາຈອນແຕ່ລະທ້ອງຖິ່ນຈັດຕັ້ງການກວດກາເປັນບາງຄັ້ງຄາວ

ໃນຍາມມີເທດສະການ ແລະ ງານບຸນຕ່າງໆເພື່ອກວດກາທາດເຫລົ້າ, ເອກະສານຕ່າງໆແລະກວດກາຄວາມໄວຂອງຜູ້ຂັບຂີ່ໃນເຂດຊານເມືອງ, ແຕ້ມເສັ້ນຈະລາ ຈອນ, ຕິດຕັ້ງປ້າຍເຕືອນ, ປ້າຍຫ້າມ ແລະ ລະບົບໄຟອໍານາດຕາມຈຸດ 3 ແຍກ 4 ແຍກ, ເພີ່ມທະວີການຈັດສໍາມະນາ, ສຶກສາອົບຮົມໃຫ້ນັກຮຽນ-ນັກສຶກສາ, ນັກຂັບຂີ່ຮູ້ກົດລະບຽບຈະລາຈອນ ແລະ ມີສະຕິເຄົາລົບລະບຽບສູງກວ່າເກົ່າ, ໂດຍສະເພາະຕ້ອງໄດ້ສ້າງປື້ມຄູ່ມືການຂັບຂີ່ເພື່ອເອົາເຂົ້າໃນຫລັກສູດການສອນຢູ່ໃນສະຖາບັນການສຶກສາລະດັບຕ່າງໆເພື່ອປູກຈິດສໍານຶກໃຫ້ແກ່ນັກຮຽນ-ນັກສຶກສາໃນເລື່ອງຂອງການຂັບຂີ່ທີ່ດີແລະປອດໄພ, ສືບຕໍ່ປັບປຸງດໍາລັດຂອງນາຍົກລັດຖະມົນຕີວ່າດ້ວຍການປັບໃໝ ແລະ ມາດຕະການຕ່າງໆຕໍ່ຜູ້ລະເມີດລະບຽບກົດໝາຍໃຫ້ເຄັງຄັດເຂັ້ມງວດກວ່າເກົ່າ ແລະ ຍົກລະດັບໂຮງຮຽນສອນຂັບລົດ ແລະ ລະບຽບການສອບເສັງຂັບຂີ່ໃຫ້ມີມາດຕະຖານສູງ.

ກະຊວງດັ່ງກ່າວໃຫ້ຮູ້ວ່າ: ຜ່ານການສຶກສາຂອງໜ່ວຍງານກ່ຽວຂ້ອງເຫັນວ່າມີຫລາຍສາເຫດທີ່ພາໃຫ້ເກີດອຸປະຕິເຫດບົນທ້ອງຖະໜົນເພີ່ມຂຶ້ນໃນປັດຈຸບັນເຊັ່ນ: ສະພາບເສັ້ນທາງທີ່ບໍ່ດີ, ຂັບຂີ່ແບບປະໝາດ, ສະພາບເຕັກນິກລົດບໍ່ຮັບປະກັນ ແລະ ອື່ນໆ, ສະນັ້ນ ວິທີຫລີກລຽງຈາກການເກີດອຸປະຕິເຫດດີທີ່ສຸດກໍຄືການເພີ່ມສະຕິລະວັງຕົວໃນເວລາຂັບຂີ່ໃຫ້ສູງ, ເຄົາລົບກົດລະບຽບຈະລາຈອນຢ່າງເຂັ້ມງວດ ແລະໝັ່ນກວດກາສະພາບເຕັກນິກຂອງລົດໃຫ້ຮັບປະກັນດີຢູ່ຕະຫລອດເວລາ.