ຜູ້ດ້ອຍໂອກາດຈະສາມາດເຂົ້າເຖິງການສຶກສາຂັ້ນພື້ນຖານຫລາຍຂຶ້ນ

ຜູ້ດ້ອຍໂອກາດໃນເຂດຫ່າງໄກສອກຫລີກຫລາຍທ້ອງຖິ່ນຈະໄດ້ມີໂອກາດເຂົ້າເຖິງການສຶກສາຂັ້ນພື້ນຖານຫລາຍຂຶ້ນ, ພາຍຫລັງໂຄງການບໍລິຫານ, ຄວາມສະເໝີພາບ, ຄຸນນະພາບແລະ ການເຂົ້າເຖິງການສຶກສາຂັ້ນພື້ນຖານໄດ້ເລີ່ມຈັດຕັ້ງປະຕິບັດແຕ່ນີ້ຮອດ 10 ປີຂ້າງໜ້າ.

ທ່ານລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລານາງ ແສງເດືອນຫລ້າຈັນທະບູນ ໄດ້ມີຄໍາເຫັນໃນໂອກາດເປີດໂຄງການດັ່ງກ່າວເມື່ອບໍ່ດົນມານີວ່າ: ສະຫະພາບເອີຣົບໄດ້ໃຫ້ການສະໜັບ ສະໜູນເງິນຈໍານວນ 15 ລ້ານເອີໂຣ ເພື່ອປະກອບສ່ວນໃຫ້ແກ່ການຈັດຕັ້ງປະຕິບັດໂຄງການປັບປຸງຄຸນນະພາບ ແລະ ຂະຫຍາຍໂອກາດການເຂົ້າຮຽນສໍາລັບການສຶກສາຂັ້ນພື້ນຖານຢູ່ລາວຫລືບີກົວ

(BEQUAL) ຮ່ວມກັບລັດຖະບານອົດສະຕາລີທີ່ມີໄລຍະເວລາຈັດຕັ້ງປະຕິບັດ 10 ປີ, ຊຶ່ງຈະສຸມໃສ່ 66 ເມືອງທີ່ດ້ອຍໂອກາດທາງດ້ານການສຶກສາເພື່ອປະກອບສ່ວນສົ່ງເສີມໃຫ້ນັກຮຽນໂດຍສະ ເພາະຜູ້ທີ່ດ້ອຍໂອກາດໄດ້ເຂົ້າເຖິງການສຶກສາຢ່າງເທົ່າທຽມ, ພ້ອມທັງຮັບປະກັນໃຫ້ເຂົາເຈົ້າສືບຕໍ່ຮຽນຈົບຊັ້ນປະຖົມສຶກສາ.

ທ່ານລັດຖະມົນຕີຊ່ວຍວ່າການກະຊວງສຶກສາທິການ ແລະ ກິລາໃຫ້ຮູ້ວ່າ: ໃນຈໍານວນເງິນ 15 ລ້ານເອີໂຣທີ່ໄດ້ຮັບຈາກສະຫະພາບເອີຣົບນັ້ນແມ່ນຈະຖືກນໍາໃຊ້ເຂົ້າໃນແຜນງານBEQUALຈໍານວນ 11,5 ລ້ານເອີໂຣ ແລະ 3,25 ລ້ານເອີໂຣຈະນໍາໃຊ້ເຂົ້າໃນການຊ່ວຍເຫລືອດ້ານວິຊາການເພື່ອປັບປຸງລະບົບການສຶກສາເຊັ່ນ: ພັດທະນາຂີດຄວາມສາມາດໃນການວາງແຜນໃຫ້ແກ່ພະນັກງານລະດັບເມືອງ, ແຂວງ ແລະ ສູນກາງ, ພັດທະນາລະບົບເຄື່ອງມືຄຸ້ມຄອງງົບປະມານ, ຍົກລະດັບດ້ານການນໍາໃຊ້ຄູ່ມືຄຸ້ມຄອງໃຫ້ແກ່ຜູ້ບໍລິຫານໂຮງຮຽນ, ການປັບປຸງນະໂຍບາຍ ແລະ ຍຸດທະສາດຂອງ

ວຽກງານການສຶກສາໂດຍສະເພາະການຈັດກອງປະຊຸມຂອງໜ່ວຍງານວິຊາການຂະແໜງສຶກສາ, ສ່ວນວົງເງິນອີກ 250 ພັນເອີໂຣຈະນໍາໃຊ້ເຂົ້າໃນການປະເມີນ ແລະ ກວດສອບໂຄງການ.

ທ່ານລັດຖະມົນຕີຊ່ວຍກະຊວງດັ່ງກ່າວໃຫ້ຮູ້ວ່າ: ໃນໄລຍະຜ່ານມາສະຫະພາບເອີຣົບໄດ້ໃຫ້ ການສະໜັບສະໜູນຕໍ່ຂະແໜງການສຶກສາ, ໂດຍສະເພາະໄດ້ສົ່ງຊ່ຽວຊານເພື່ອມາສ້າງຄວາມອາດສາມາດໃຫ້ແກ່ວຽກງານການຕິດຕາມປະເມີນຜົນ ແລະ ວຽກງານແຜນການ-ການເງິນ, ຊຶ່ງນັບວ່າເປັນການຊ່ວຍເຫລືອທີ່ມີຜົນປະໂຫຍດໃຫຍ່ຫລວງເຂົ້າໃນການພັດທະນາວຽກງານສຶກສາຢູ່ລາວ.