ຈະມີການຝຶກອົບຮົມກ່ຽວກັບການເຂົ້າໃຈໃນວຽກງານສື່

ສະຖານີວິທະຍຸກະຈາຍສຽງແຫ່ງຊາດ (ວສລ) ຈະຈັດຝຶກອົບຮົມຫົວຂໍ້ “ການເຂົ້າໃຈ ແລະ ເຂົ້າ ເຖິງວຽກງານສື່ (Media Literacy) ໃຫ້ບັນດານັກຂ່າວ, ນັກຈັດລາຍການ ແລະ ຜູ້ຜະລິດສື່ພາຍໃນປະເທດຂຶ້ນໃນລະຫວ່າງວັນທີ 22-24 ກຸມພາຈະເຖິງນີ້, ໂດຍການສະໜັບສະໜູນຈາກສະຖາບັນອາຊີເພື່ອການພັດທະນາສື່ກະຈາຍສຽງ ແລະ ພາບ(AIBD).

ຊຸດຝຶກອົບຮົມດັ່ງກ່າວຈັດຂຶ້ນພາຍຫລັງເຫັນວ່າບັນດາຜູ້ບໍລິໂພກສື່ໃນຍຸກໃໝ່ທັນສະໄໝພວມຖືກຈູ່ໂຈມແບບບໍ່ເວັ້ນແຕ່ລະວັນດ້ວຍຂໍ້ມູນຂ່າວສານອັນຫລາກຫລາຍຮູບແບບຈາກສື່ສັງຄົມອອນລາຍ, ສະນັ້ນ ມັນຈິ່ງມີຄວາມຈໍາເປັນໃຫ້ແກ່ນັກຈັດລາຍການ ແລະ ຜູ້ຜະລິດສື່ທັງຫລາຍໃຫ້ມີຄວາມເຂົ້າໃຈ ແລະ ຮັບຮູ້

ພາລະບົດບາດໜ້າທີ່ຂອງຕົນໃນການປະກອບສ່ວນກະຕຸກຊຸກຍູ້ບັນດາຜູ້ບໍລິໂພກສື່ຂອງຕົນຮູ້ຈັກປະເມີນ, ວິເຄາະ ແລະ ຮັບມືກັບບັນດາເນື້ອໃນຈາກສື່ສັງຄົມອອນລາຍດ້ວຍຄວາມເໝາະສົມ, ມີຈັນຍາບັນ ແລະ ຮູ້ຈັກເລືອກເຟັ້ນຮັບເອົາແຕ່ເນື້ອຫາສາລະທີ່ມີປະໂຫຍດໃຫ້ກັບຕົນເອງ, ໂດຍຜ່ານການເຂົ້າໃຈ ແລະ ເຂົ້າເຖິງວຽກງານສື່ນັ້ນເອງ.

ການຝືກອົບຮົມດັ່ງກ່າວຍັງແມ່ນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກໃນການສືບຕໍ່ປະຕິບັດແນວທາງ 4 ບຸກທະລຸ, ໂດຍສະເພາະການບຸກທະລຸດ້ານການພັດທະນາຊັບພະຍາ ກອນມະນຸດໃນຂົງເຂດວຽກງານສື່ມວນຊົນໃຫ້ໜັກແໜ້ນກວ່າເກົ່າ ແລະ ມີປະສິດທິພາບໃນການຮັບໃຊ້ໜ້າທີ່ການເມືອງທີ່ພັກ ແລະ ລັດມອບໃຫ້ປະສົບຜົນສໍາເລັດດີກວ່າເກົ່າ.