ເປີດໂຄງການລາວແຟຊັ້ນວີກ 2016 ແລະ ການສະແດງອາພອນລະດູໜາວ

ໃນວັນທີ 29 ມັງກອນ ຜ່ານມານີ້, ຢູ່ທີ່ສູນການຄ້າ ວຽງຈັນເຊັນເຕີ ນະຄອນຫຼວງວຽງຈັນ ໄດ້ມີການເປີດໂຄງ ການລາວແຟຊັ້ນວີກ ແລະ ການສະແດງອາພອນລະດູໜາວ ຈາກບັນດານັກອອກແບບຊື່ດັງໃນລາວ ແລະ ຕ່າງປະເທດ, ເພື່ອຊອກຫານັກອອກແບບຫນຸ່ມນ້ອຍດີເດັ່ນຂອງລາວປະຈຳປີ 2016, ໂດຍມີຜູ້ຕາງໜ້າອົງການຈັດຕັ້ງສາກົນ, ແຂກຖືກເຊີນ ແລະ ວົງການແຟຊັ້ນເຂົ້າຮ່ວມເປັນຈຳນວນຫຼາຍ.

ຜູ້ອຳນວຍການໂຄງການລາວແຟຊັ້ນວີກທ່ານ ນາງ ປານີ ໄຊຍະວົງ ກ່າວວ່າ: ເພື່ອສ້າງຄວາມຍິ່ງໃຫຍ່ຂອງລາວແຟຊັ້ນວີກ ແລະ ສ້າງປະຫວັດສາດໜ້າໃໝ່ຢູ່ໃນວົງການດັ່ງກ່າວ ໂດຍໄດ້ຈັດໃຫ້ມີໂຄງການສົ່ງເສີມນັກອອກແບບໜຸ່ມນ້ອຍດີເດັ່ນຂອງລາວ ແລະ ສົ່ງເສີມວັດທະນະທຳອາຊຽນ ແລະ ເປັນການສະເຫຼີມ

ສະຫຼອງການເຂົ້າຮ່ວມເປັນສະມາຊິກປະຊາຄົມອາຊຽນ, ທັງເປັນການເຊື່ອມໂຍງຂອງວົງການແຟຊັ້ນລາວໃຫ້ກ້າວໄປເປັນສ່ວນໜຶ່ງຂອງເຄືອຄ່າຍວົງການແຟຊັ້ນສາກົນ, ໃນການຈັດການສະແດງອາພອນຈາກບັນດານັກອອກແບບຊັ້ນນຳ ແລະ ການສະແດງສິລະປະວັດທະນະທຳຕ່າງໆ, ຊຶ່ງເຕັມໄປດ້ວຍຄວາມງາມ, ຄວາມສາມາດ, ຄວາມໝັ້ນໃຈໃນຕົວເອງ, ພ້ອມທັງກິລິຍາມາລະຍາດ ແລະ ຈິດສຳນຶກໃນວັດທະນະ ທຳລາວ ຫຼື ເວົ້າອີກຢ່າງໜຶ່ງແມ່ນ: ແມ່ຍິງລາວຍຸກໃໝ່. ນອກຈາກນັ້ນ, ລາວແຟຊັ້ນວີກ, ຍັງໄດ້ປະກາດການແຂ່ງຂັນການອອກແບບອາພອນປະຈຳປີ 2016 ໃນຫົວຂໍ້ “ ປີໃຫມ່ລາວ ” ເພື່ອຄົ້ນຫານັກອອກແບບໜຸ່ມນ້ອຍດີເດັ່ນຂອງລາວ, ໂດຍຈະໄດ້ຮັບທຶນການສຶກສາຕໍ່ທີ່ສະຖາບັນເອັດສໂມດ, ນະຄອນຫຼວງ ປາຣີ, ປະເທດ ຝຣັ່ງນຳດ້ວຍ.