ສ້າງຊັບພະຍາກອນມະນຸດໃຫ້ໄດ້ທັງຄຸນະພາບ ແລະ ປະລິມານຄືໜ້າທີ່ຕົ້ນຕໍຂອງພັກເຮົາ

ເພື່ອສາມາດຕອບສະໜອງຄວາມຕ້ອງການອັນຈໍາເປັນຂອງໜ້າທີ່ການເມືອງໃນໄລຍະໃໝ່ການສ້າງ ແລະ ບໍາລຸງຍົກລະດັບພະນັກງານຫລັກແຫລ່ງນໍາພາ ແລະ ຄຸ້ມຄອງນັ້ນຕ້ອງຖືມາດຕະການຄວາມຮູ້ດ້ານແນວທາງນະໂຍບາຍຂອງພັກ, ຖືທັດສະນະຫລັກໝັ້ນການເມືອງ ແລະ ຄຸນສົມບັດສີນທໍາເປັນບູລິມະສິດ, ຖືຄວາມຮູ້ຄວາມສາມາດ, ຄວາມບາກບັ່ນສູ້ຊົນ ແລະ ແບບແຜນວິທີເຮັດວຽກເປັນສໍາຄັນ ແລະ ຈໍາເປັນ, ພະນັກງານຫລັກແຫລ່ງຕ້ອງໄດ້ຜ່ານການສຶກສາຮໍ່າຮຽນໃນລະບົບໂຮງຮຽນຂອງພັກ ແລະ ໄດ້ຜ່ານການຝຶກຝົນທົດສອບໃນຂະບວນການວຽກງານຕົວຈິງ, ຜ່ານການກວດກາຕີລາຄາ ແລະ ເລືອກເຟັ້ນບົນພື້ນຖານຜົນງານອັນເປັນທີຍອມຮັບຈາກກົມກອງ, ທ້ອງຖິ່ນກໍຄືສະມາຊິກພັກ, ພະນັກງານ ແລະ ມະຫາຊົນ ໃນບ່ອນທີ່ຜູ້ນັ້ນສັງກັດຢູ່.

             ເພີ່ມທະວີຄວາມສາມາດໃນການກໍ່ສ້າງພະນັກງານວິຊາການ, ຜູ້ຊ່ຽວຊານສະເພາະດ້ານ, ພະນັກງານຄຸ້ມຄອງ-ບໍລິຫານ ໃຫ້ໄດ້ທັງຈໍານວນ ແລະ ຄຸນະພາບ ເພື່ອຕອບສະໜອງຄວາມຮຽກຮ້ອງຕ້ອງການຂອງການພັດທະນາ ແລະ ການ

ເຊື່ອມໂຍງກັບສາກົນໃຫ້ໄດ້ໂດຍພຶ້ນຖານສຸມໃສ່ສ້າງພະນັກງານເພື່ອປະກອບໃຫ້ເມືອງ ແລະ ຮາກຖານຕາມທິດ 3 ສ້າງ, ພິເສດແມ່ນຕ້ອງສ້າງໃຫ້ໄດ້ພະນັກງານກັບທີ່, ພະນັກງານຊົນເຜົ່າ ແລະ ເພດຍິງ, ຮັບປະກັນໃຫ້ຮາກຖານມີກໍາລັງແຮງໃນການສ້າງຄວາມເຂັ້ມແຂງ ແລະ ການພັດທະນາ, ປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ອັນຮີບດ່ວນໃນຕໍ່

ໜ້ານີ້ແມ່ນຕ້ອງສ້າງໃຫ້ໄດ້ແຜນຍຸດທະສາດກ່ຽວກັບການບໍາລຸງສ້າງພະນັກງານໄລຍະຫັນເປັນອຸດສະຫະກໍາ ແລະ ທັນສະໄໝ, ເອົາໃຈໃສ່ການຂຶ້ນແຜນກໍານົດພະນັກງານແຕ່ຮາກຖານຂຶ້ນມາໃຫ້ມີຄວາມຊັດເຈນ ເພື່ອຕອບສະໜອງຄວາມຕ້ອງການ

ໃນແຕ່ລະໄລຍະ ແລະ ແຕ່ລະຂະແໜງການ, ທ້ອງຖິ່ນໃຫ້ທັນການ, ຕ້ອງຖືວຽກນີ້ເປັນວຽກທີ່ຕ້ອງເຮັດເປັນປົກກະຕິຕໍ່ເນື່ອງເພື່ອເປັນເງື່ອນໄຂກະຕຸກຊຸກຍູ້ພະນັກງານປະຕິບັດໜ້າທີ່ດ້ວຍຄວາມຮັບຜິດຊອບ ແລະ ມີຜົນສໍາເລັດ, ທັງເປັນການສ້າງໂອກາດໃຫ້ເຂົາເຈົ້າໄດ້ຝຶກຝົນຫລໍ່ຫລອມທົດສອບ ແລະ ທຸ້ມເທຄວາມຮູ້ຄວາມສາມາດຂອງຕົນຢ່າງເຕັມສ່ວນ.