ປີຜ່ານມາ ລົດຟອດມີຈຳໜ່າຍເພີ່ມຂຶ້ນ 3,3% ໃນຂົງເຂດອາຊີປາຊີຟິກ

      ໜຶ່ງປີຜ່ານມານີ້, ບໍລິສັດ ຟອດມໍເຕີ້ ໄດ້ສະຫລຸບຍອດຈຳໜ່າຍລົດຟອດທຸກຮຸ່ນ, ໃນທົ່ວຂົງເຂດອາຊີປາຊີຟິກ ແລະ ເຫັນວ່າມີຍອດຈຳໜ່າຍສູງເຖິງ 103.975 ຄັນ, ທຽບໃສ່ປີກ່ອນເພີ່ມຂຶ້ນ 3,3%, ໃນນັ້ນ ຢູ່ສປປ ລາວ ເພີ່ມຂຶ້ນ 5% ເທົ່າກັບ 653 ຄັນ ແລະ ປະເທດອື່ນໆກໍເພີ່ມຂຶ້ນເຊັ່ນດຽວກັນ.

     ທ່ານ ມາກ ຄອບແມນ ປະທານບໍລິສັດ ຟອດອາຊຽນ ໃຫ້ຮູ້ວ່າ: ລົດຟອດທີ່ຂາຍດີກວ່າໝູ່ໃນປັດຈຸບັນແມ່ນລົດກະບະ ຟອດເຣນເຈີ, ລົດຈິບ ຟອດເອເວີເຣດ, ລົດເກັງ ຟອດເອກໂຄສະປອດ ແລະ ຟອດທຣານສິດ, ຊຶ່ງເຫັນວ່າເປັນທີ່ຕ້ອງການຂອງສັງຄົມຫລາຍຂຶ້ນ, ໂດຍສະເພາະ

ລົດກະບະ ຟອດເຣນເຈີ ຮຸ້ນໃໝ່, ຊຶ່ງເປັນລົດທີ່ສ້າງຂຶ້ນມາດ້ວຍມາດຕະຖານສູງ, ເທັກໂນໂລຊີທີ່ອັດສະລິຍະ, ຄວາມສາມາດເໜືອຊັ້ນ, ມີປະສິດທິພາບໃນການໃຊ້ເຊື້ອເພີງ, ພາຍໃນກ້ວາງຂວາງ ສະດວກສະບາຍ ແລະ ມີຄວາມແຂງແກ່ນເປັນທີ່ສຸດ, ເນື່ອງຈາກວ່າລົດຮຸ່ນດັ່ງກ່າວ ແມ່ນໄດ້ຮັບລາງວັນມາດຕະຖານຄວາມປອດໄພ ລະດັບ 5 ດາວຈາກສາກົນ. ນອກຈາກນີ້ ຟອດເອເວີເຣດ ຍັງເປັນໜຶ່ງໃນລົດຈິບທີ່ມີຄວາມທົນທານ, ນຳໃຊ້ໃນທຸກສະພາບເສັ້ນທາງໄດ້ຢ່າງສະດວກສະບາຍ ແລະ ຄາດວ່າໃນຕໍ່ໜ້າຢູ່ ສປປ ລາວ ຈະສາມາດຈຳໜ່າຍລົດຟອດໄດ້ສູງເປັນອັນດັບທີໜຶ່ງໃນປະເທດ.

     ບໍລິສັດ ຟອດມໍເຕີ ເປັນບໍລິສັດຊັ້ນນຳໃນອຸດສາຫະກຳລົດຍົນຂອງໂລກ, ເຊິ່ງຕັ້ງຢູ່ເມືອງເດີຍບອນ ມົນລະຣັດ ມິກຊິແກນ ປະເທດອາເມລິກາ, ໂດຍມີໂຮງງານຢູ່ 67 ແຫ່ງທົ່ວໂລກ.