ສົ່ງເສີມຄວາມກ້າວໜ້າແມ່ຍິງໃຫ້ບັນລຸເປົ້າໝາຍພັດທະນາແບບຍືນຍົງ

ຄະນະກໍາມາທິການເພື່ອຄວາມກ້າວໜ້າແມ່ຍິງ ແລະ ຄະນະກໍາມາທິການເພື່ອແມ່ ແລະ ເດັກ ກະຊວງແຜນການ ແລະ ການລົງທຶນ(ຜທ) ຈັດກອງປະຊຸມສະຫລຸບປະຈໍາປີ 2015-2016 ໃນວັນທີ 15 ກຸມພານີ້ ທີ່ກະຊວງດັ່ງກ່າວ, ໂດຍການເປັນປະທານ ຂອງທ່ານ ດຣ.ຄໍາລຽນ ພົນເສນາ ລັດຖະມົນຕີຊ່ວຍວ່າການ ກະຊວງ ຜທ, ທັງເປັນປະທານຄະນະກໍາມາທິການ ເພື່ອຄວາມກ້າວໜ້າແມ່ຍິງ ແລະ ຄະນະກໍາມາທິການເພື່ອແມ່ ແລະ ເດັກ, ມີຄະນະກົມ ແລະ ພະນັກງານກ່ຽວຂ້ອງຕ່າງໆ ເຂົ້າຮ່ວມເປັນຈຳນວນຫລາຍ.ທ່ານ ດຣ .ຄໍາລຽນ ພົນເສນາ ກ່າວວ່າ: ວຽກງານສົ່ງເສີມຄວາມກ້າວໜ້າແມ່ຍິງ ກໍຄືແມ່

ແລະ ເດັກ ແມ່ນມີຄວາມໝາຍສໍາຄັນຍິ່ງ ໂດຍສະ ເພາະໃນແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII , ການເຊື່ອມສານເປົ້າໝາຍການພັດທະນາແບບຍືນຍົງ(SDGS) ເປົ້າໝາຍທີ 4 ຄື: ຮັບປະກັນຄວາມເທົ່າທຽມດ້ານການສຶກສາຢ່າງທົ່ວເຖິງ ແລະ ສົ່ງເສີມໂອກາດ ດ້ານການສຶກສາໃຫ້ແກ່ທຸກຄົນ ແລະ ເປົ້າໝາຍທີ 5 ການບັນລຸຄວາມສະເໝີພາບລະຫວ່າງເພດ ແລະ ສົ່ງເສີມບົດບາດຂອງແມ່ຍິງ ແລະ ເດັກນ້ອຍຍິງ.

ສະເພາະກະຊວງ(ຜທ) ຈະໄດ້ປະສານສົມທົບກັບບັນດາຂະແໜງການ ໃນການສ້າງແຜນງານໃຫ້ບັນລຸເປົ້າໝາຍທີ 4 ແລະ  5 ໃນປີ 2030. ເພື່ອຮັບປະກັນໃຫ້ເດັກນ້ອຍທັງຍິງ ແລະ ຊາຍ ສໍາເລັດການສຶກສາຂັ້ນປະຖົມ ແລະ ມັດທະຍົມໂດຍບໍ່ເສຍຄ່າ, ໂດຍໃຫ້ມີຄຸນນະພາບ ແລະ ສະເໝີພາບ ໃຫ້ເຂົ້າເຈົ້າມີສິດເທົ່າທຽມກັນໃນການເຂົ້າເຖິງການສຶກສາດ້ານວິຊາການ, ວິຊາຊີບ ແລະ ຂັ້ນສູງ, ລວມທັງວິທະຍາໄລທີ່ມີຄຸນນະພາບ. ລືບລ້າງການຈໍາແນກເພດໃນການສຶກສາ ແລະ ຮັບປະກັນຄວາມເທົ່າທຽມກັນ ໃນທຸກລະດັບຂອງການສຶກສາ ແລະ ການຝຶກອົບຮົມວິຊາຊີບ ສໍາລັບຜູ້ດ້ອຍໂອກາດ, ລວມທັງຄົນພິການ ແລະ ປະຊາຊົນບັນດາເຜົ່າ. ລຶບລ້າງທຸກຮູບແບບຂອງການຈໍາແນກ ແລະ ໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ໃນເຂດສາທາລະນະ ແລະ ເຂດສ່ວນບຸກຄົນ, ລວມທັງການຄ້າມະນຸດ ແລະ ການຂູດຮີດທາງເພດ ແລະ ອື່ນໆ. ຮັບປະກັນໃຫ້ແມ່ຍິງ ໄດ້ມີສ່ວນຮ່ວມຢ່າງເຕັມສ່ວນ, ມີສິດສະເໝີພາບ ແລະ ມີຄວາມເທົ່າທຽມກັນ ໃນການໄດ້ຮັບໂອກາດເຮັດວຽກໃນລະດັບການນໍາໃນທຸກຂົງເຂດ ກໍຄືການຕັດສິນໃຈທາງດ້ານການເມືອງ, ເສດຖະກິດ ແລະ ຊິວິດການເປັນຢູ່. ຮັບປະກັນການເຂົ້າເຖິງການບໍລິການທາງດ້ານສາທາລະນະສຸກ ກ່ຽວກັບສຸຂະພາບຈະເລີນພັນ ແລະ ສິດທິກ່ຽວກັບສຸຂະພາບຈະເລີນພັນ ຕາມທີ່ກໍານົດໃນແຜນດໍາເນີນງານສາກົນ ດ້ານປະຊາກອນ ແລະ ແຜນດໍາເນີນງານປັກກິ່ງ ແລະ ເອກະສານອື່ນໆ.