ລາວໂຮມຊຸມນຸມລະນຶກວັນນັກຮົບເສຍອົງຄະ ແລະ ເສຍສະຫລະຊີວິດເພື່ອປະເທດຊາດຄົບຮອບ 70 ປີ

           ພິທີໂຮມຊຸມນຸມລະນຶກວັນນັກຮົບເສຍອົງຄະ ແລະ ເສຍສະຫລະຊີວິດເພື່ອປະເທດຊາດຄົບ ຮອບ 70 ປີ(21 ມີນາ 1946 – 21 ມີນາ 2016), ໄດ້ຈັດຂຶ້ນຢ່າງສົມກຽດໃນວັນທີ 21 ມີນານີ້, ທີ່ຫໍປະຊຸມແຫ່ງຊາດ, ໂດຍການໃຫ້ກຽດເຂົ້າຮ່ວມຂອງທ່ານປະທານປະເທດ ຈູມມາລີ ໄຊຍະສອນ,ທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານພັກປະຊາຊົນປະຕິວັດລາວ, ມີບັນດາກົມການເມືອງສູນກາງພັກ, ລັດຖະມົນຕີ, ເຈົ້າແຂວງ, ພ້ອມດ້ວຍພະນັກງານປະຕິວັດອາວຸໂສ ເຂົ້າຮ່ວມເປັນຈໍານວນຫລາຍ.

           ໃນພິທີອັນມີຄວາມໝາຍສໍາຄັນນີ້, ທ່ານເລຂາທິການໃຫຍ່ ບຸນຍັງ ວໍລະຈິດ ໄດ້ຂຶ້ນກ່າວຄໍາປາໄສວ່າ: ຂະບວນການຕໍ່ສູ້ເພື່ອຄວາມເປັນເອກະລາດຢູ່ປະເທດເຮົາແມ່ນໄດ້ເກີດຂຶ້ນມາຫລາຍຮ້ອຍປີ, ແຕ່ດຸເດືອດຮຸນແຮງທີ່ສຸດແມ່ນຊ່ວງໄລຍະປີ 1964-1973 ເຊິ່ງເປັນສົງຄາມຕໍ່ສູ້ຕ້ານກັບພວກສັດຕູຮຸກຮານ

ເຊັ່ນ: ບັ້ນຮົບນໍ້າບາກ, ກູ້ກຽດ, ລາມເຊີນ, ພູກູດ, ທົ່ງໄຫຫີນ, ຜາທີ ແລະ ອື່ນໆໃນທົ່ວປະເທດຢ່າງພິລະອາດຫານຂອງປະຊາຊົນລາວບັນດາເຜົ່າ. ສະນັ້ນ ບັນດາທ່ານທີ່ເສຍອົງຄະຢູ່ບັນດາສູນເສຍອົງຄະ ກໍແມ່ນນັກກູ້ຊາດເພື່ອຍາດເອົາຄວາມເປັນເອກະລາດດ້ວຍຄວາມຈົ່ງຮັກພັກດີຕໍ່ພັກ-ລັດ ຈົນໄດ້ຮັບບາດເຈັບ ແລະ ເສຍຊີວິດກໍມີຈໍານວນບໍ່ໜ້ອຍ ແລະ ຕະຫລອດໄລຍະແຫ່ງການຕໍ່ສູ້ຢ່າງ ລະອິດລະອ້ຽວ, ແຕ່ມີກຽດສະຫງ່າງາມຂອງພັກປະຊາຊົນປະຕິວັດລາວ, ພັກ ແລະ ລັດຖະບານ ຍາມໃດກໍໄດ້ຖືສໍາຄັນເອົາໃຈໃສ່ເບິ່ງແຍງບັນດານັກຮົບປະຕິວັດທີ່ຖືກບາດເຈັບເສຍອົງຄະ, ໂດຍສະເພາະໄດ້ອອກດໍາລັດຮັບຮອງເອົາວັນທີ 21 ມີນາເປັນວັນນັກຮົບເສຍອົງຄະ ແລະ ເສຍສະຫລະຊີວິດເພື່ອປະເທດຊາດ ແລະ ໄດ້ພະຍາຍາມສ້າງທຸກເງື່ອນໄຂອໍານວຍຄວາມສະດວກໃຫ້ຜູ້ເສຍອົງຄະດັ່ງກ່າວໂດຍໄດ້ສ້າງສູນເສຍອົງຄະເພື່ອເຕົ້າໂຮມເອົາຜູ້ເສຍອົງຄະມາຢູ່ເພື່ອໃຫ້ສະດວກໃນການເບິ່ງແຍງ ແລະ ພັດທະນາທາງດ້ານຊີວິດການເປັນຢູ່ໃຫ້ນັບມື້ດີຂຶ້ນ, ສ່ວນຜູ້ເສຍຊີວິດກໍໄດ້ສ້າງອານຸສະວະລີ ແລະ ປ່າຊ້ານັກຮົບນິລະນາມໃນທົ່ວປະເທດ ເພື່ອໃຫ້ຄົນຮຸ້ນຫລັງໄດ້ເຄົາລົບບູຊາຄຸນງາມຄວາມດີຂອງພວກເພີ່ນ.