ກອງປະຊຸມປຶກສາຫາລືເພື່ອປັບປຸງການຄຸ້ມຄອງ ແລະ ກວດກາປ່າໄມ້, ໄດ້ຈັດຂຶ້ນເມື່ອທ້າຍອາທິດຜ່ານມານີ້, ທີ່ກະຊວງກະສິກໍາ ແລະ ປ່າໄມ້, ໂດຍການເປັນປະທານຂອງທ່ານ ດຣ ເພັດ ພົມພິພັກ ລັດຖະມົນຕີວ່າການກະຊວງດັ່ງກ່າວ.
ທີ່ປະຊຸມໄດ້ເນັ້ນໃສ່ການຄົ້ນຄວ້າຫລາຍບັນຫາສຳຄັນຄື: ການປັບປຸງວຽກງານໂຄສະນາເຜີຍແຜ່ນິຕິກຳ, ການຄຸ້ມຄອງປ່າໄມ້, ປ່າຜະລິດ, ການສຳຫລວດ ແລະ ການຈັດສັນປ່າໄມ້ ເພື່ອໃຫ້ມີຄວາມຮັດກຸມ ແລະ ຊັດເຈນທາງດ້ານຕົວເລກຂອງເນື້ອທີ່ປ່າໄມ້ປະເພດຕ່າງໆ, ສ່ວນວຽກງານຄຸ້ມຄອງການຂຸດຄົ້ນໄມ້ກໍໄດ້ມີການຫາລືຄືນນັບແຕ່ຂະບວນການຕັດຈົນຮອດການສົ່ງໄມ້ເຂົ້າສະໜາມ III, ລວມເຖິງວຽກງານຄຸ້ມຄອງການເຄື່ອນຍ້າຍໄມ້, ການຄຸ້ມຄອງພະນັກງານຜູ້ທີ່ປະລະໜ້າທີ່, ສົມຮູ້ຮ່ວມຄິດ, ສວຍໃຊ້ໜ້າທີ່ຕຳແໜ່ງ ແລະ ລະເມີດລະບຽບກົດໝາຍຄວນປະຕິບັດມາດຕະການແບບໃດ,ທັງນີ້ເພື່ອໃຫ້ເປັນເອກະພາບຕໍ່ກັນຕໍ່ເນື້ອໃນຂອງຮ່າງຄຳສັ່ງຂອງລັດຖະມົນຕີກະຊວງກະສິກຳ ແລະ
ປ່າໄມ້ໃຫ້ມີຄວາມຮັດກຸມເພື່ອຄວາມເປັນເອກະພາບໃນການຈັດຕັ້ງປະຕິບັດ ແລະ
ໃຫ້ໄປຕາມລວງດຽວກັນໃນຂອບເຂດທົ່ວປະເທດ.
ທ່ານລັດຖະມົນຕີກະຊວງກະສິກຳ-ປ່າໄມ້ ກ່າວວ່າ: ການຄົ້ນຄວ້າປຶກສາຫາລືຄັ້ງນີ້ແມ່ນມີຄວາມສໍາຄັນຍິ່ງ, ເນື່ອງຈາກຕ້ອງໃຫ້ເກີດຄວາມເຂົ້າໃຈຢ່າງເປັນເອກະພາບແລ້ວກຳນົດເປັນມາດຕະການລະອຽດເຂົ້າໃສ່ໃນຮ່າງຄຳສັ່ງ ເພື່ອເປັນບ່ອນອີງໃນການປະຕິບັດຕົວຈິງແນໃສ່ເພື່ອແກ້ໄຂບັນຫາປະກົດການຫຍໍ້ທໍ້ໃນຂະແໜງປ່າໄມ້ກໍຄືຂົງເຂດວຽກງານປ່າໄມ້ໃຫ້ໝົດໄປເທື່ອລະກ້າວ, ເຮັດໃຫ້ວຽກງານປ່າໄມ້ໄດ້ຮັບການພັດທະນາຕາມແນວທາງນະໂຍບາຍຂອງພັກ ແລະ ລັດຖະບານ.
No comments:
Post a Comment