ບັນດາລັດຖະມົນຕີເສດຖະກິດອາຊຽນ (AEM) ຮ່ວມກັບກໍາມະການດ້ານການຄ້າສະຫະພາບເອີຣົບ, ໄດ້ຈັດກອງປະຊຸມປຶກສາຫາລືດ້ານການຄ້າອາຊຽນ-ເອີຣົບຄັ້ງທີ 14 ຂຶ້ນທີ່ຈັງຫວັດຊຽງໃໝ່,ປະເທດໄທໃນວັນທີ 3 ມີນານີ້, ເພື່ອເພີ່ມທະວີສາຍພົວພັນດ້ານການຄ້າ ແລະ ການລົງທຶນ
ໃຫ້ມີຄວາມເຂັ້ມແຂງຂຶ້ນກວ່າເກົ່າ ຢູ່ໃນ 2 ພາກພື້ນໂດຍເປັນປະທານຮ່ວມລະຫວ່າງທ່ານນາງ
ເຂັມມະນີ ພົນເສນາ ລັດຖະມົນຕີວ່າການກະຊວງອຸດສາຫະກໍາ ແລະ ການຄ້າລາວ ແລະ ທ່ານ ນາງ
ເຊສິເລຍ ມານສະຕຣອມ (Cecilia Malmström) ລັດຖະມົນຕີການຄ້າສະຫະພາບເອີຣົບ.
ໃນກອງປະຊຸມຄັ້ງນີ້, ຄະນະຜູ້ແທນໄດ້ມີການແລກປ່ຽນທັດສະນະ, ພ້ອມທັງຍົກໃຫ້ເຫັນການພົວພັນຮ່ວມມືດ້ານການຄ້າ
ແລະ ການລົງທຶນ ຈາກອະດີດເຖິງປັດຈຸບັນ, ຊຶ່ງເຫັນວ່າໄດ້ມີການເຕີບໃຫຍ່ຂະຫຍາຍຕົວເຂັ້ມແຂງຂຶ້ນເລື້ອຍໆ, ໂດຍສະເພາະສະຫະພາບເອີຣົບເປັນຄູ່ຮ່ວມດ້ານການຄ້າ-ການລົງທຶນໃຫຍ່ເປັນອັນດັບ 2 ຂອງອາຊຽນ. ປີ 2015 ຜ່ານມາ,ການຮ່ວມມືດ້ານຄ້າອາຊຽນ-ເອີຣົບບັນລຸ 201 ຕື້ເອີໂຣເທົ່າກັບ 11% ຕໍ່ປີ. ຂະນະທີ່ການລົງທຶນໂດຍກົງ (FDI) ພົບວ່າແຫລ່ງທຶນຈາກສະຫະພາບເອີຣົບເຂົ້າອາຊຽນເພີ່ມຂຶ້ນ
31.2% ຫລື 29 ຕື້ກວ່າໂດລາສະຫະລັດ.
ນອກຈາກນີ້, ສອງຝ່າຍອາຊຽນ- ອີຢູ, ໄດ້ຢືນຢັນຮ່ວມກັນຈະສືບຕໍ່ຮັດແໜ້ນການພົວພັນ ແລະ ການຮ່ວມມືດ້ານເສດຖະກິດໃຫ້ມີຄວາມເລີກເຊິ່ງເຂັ້ມແຂງຂຶ້ນກວ່າເກົ່າ.
No comments:
Post a Comment