ວັນທີ
4 ມີນານີ້, ຢູ່ຫ້ອງຕຳຫລວດນະຄອນຫລວງວຽງຈັນ ທ່ານ ພັນໂທ
ຄຳແພງ ໄຊຍະລາດ
ຮອງກອງບັນຊາການ ປກສ ນະຄອນຫລວງວຽງຈັນ, ໄດ້ຖະແຫລງຕໍ່ສື່ມວນຊົນກ່ຽວກັບຜົນການຈັບກຸມເປົ້າໝາຍທີ່ກໍ່ຄວາມບໍ່ສະຫງົບໃນຕົວເມືອງ, ໂດຍການນຳເຂົ້າອາວຸດເສິກ ແລະ ວັດຖຸລະເບີດຈຳນວນຫລາຍ ເພື່ອກໍ່ຄວາມບໍ່ສະຫງົບຢູ່ນະຄອນຫລວງວຽງຈັນວ່າ: ພາຍຫລັງໄດ້ຮັບແຈ້ງວ່າມີການເຄື່ອນໄຫວຂອງກຸ່ມຄົນບໍ່ດີ, ມີການນຳເຂົ້າອາວຸດເສິກຈຳນວນບໍ່ໜ້ອຍເພື່ອມາຈຳໜ່າຍໃຫ້ກຸ່ມຄົນບໍ່ດີຢູ່ໃນນະຄອນຫລວງວຽງຈັນ, ດັ່ງນັ້ນ ເຈົ້າໜ້າທີ່ ປກສ ນະຄອນຫລວງວຽງຈັນ ໄດ້ແຕ່ງຕັ້ງເຈົ້າໜ້າທີ່ວິຊາສະເພາະສົມທົບກັບພາກສ່ວນກ່ຽວຂ້ອງເພື່ອເກັບກໍາຂໍ້ມູນນັບແຕ່ເດືອນມີຖຸນາ 2015 ຈົນຮອດວັນທີ 24
ພະຈິກ 2015 ຈຶ່ງສາມາດຈັບກຸມເປົ້າໝາຍໄດ້ ທັງໝົດ 12 ຄົນ, ຍິງ 3 ຄົນ, ໃນນັ້ນ ມີສັນຊາດໄທ 9 ຄົນ, ຍິງ 2 ຄົນ. ພ້ອມນີ້ ຍັງສາມາດຢືດຂອງກາງໄດ້ຄື:
ປືນປະເພດຕ່າງໆ 28 ກະບອກ, ໝາກແຕກ 24 ໜ່ວຍ, ລູກປືນ 700 ລູກ ແລະ ກະສອບລູກປຶນມີແກັບ 53 ກະສອບ, ໂຄງໃສ່ປືນສັ້ນສຳລັບຍິງໄກ 3 ຊຸດ, ກ້ອງສ່ອງ ສຳລັບຕິດປືນ 3 ໜ່ວຍ, ສິ້ນສ່ວນປະກອບປືນສັ້ນ 13 ອັນ, ອາວຸດໜ້າເຮັດດ້ວຍເຫລັກ 1 ອັນ, ງ້າວ 3 ດວງ, ຢາໄອ້ 1 ຖົງໃຫຍ່ ແລະ 19 ຖົງນ້ອຍ, ຢາບ້ານ 119 ເມັດ ແລະ ວັດຖຸອື່ນໆຈຳນວນໜຶ່ງ.
ເຈົ້າໜ້າທີ່ ໃຫ້ຮູ້ວ່າ: ຜ່ານການສືບສວນ-ສອບສວນ ພວກກ່ຽວຮັບສາລະພາບວ່າ ໄດ້ຮ່ວມກັນຊື້ຂາຍ, ຂົນສົ່ງ, ຄອບຄອງອາວຸດເສິກ ແລະ ມີຢາເສບຕິດໄວ້ໃນຄອບຄອງຄືປະເພດຢາໄອ້, ຢາບ້າ ແລະ ຂອງການທີ່ເຈົ້າໜ້າທີ່ກວດພົບນັ້ນ ເປັນຂອງພວກຕົນແທ້. ພ້ອມນີ້ ເຈົ້າໜ້າທີ່ຍັງຈະສືບຕໍ່ດຳເນີນການສືບສວນ-ສອບສວນ ເກັບກຳຂໍ້ມູນຫລັກຖານຂະຫຍາຍຜົນໄປຫາກຸ່ມແກ້ງເຄືອຂ່າຍທີ່ຍັງເຫລືອ ເພື່ອນຳຈັບຕົວມາດຳເນີນຄະດີຕາມລະບຽບກົດໝາຍໂດຍໄວ.
No comments:
Post a Comment