ສະຫາຍເລຂາທິການໃຫຍ່ ບຸນຍັງ ວໍລະຈິດ ອວຍພອນວັນແມ່ຍິງສາກົນ

          ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາ ຊົນຕິວັດລາວ, ໄດ້ສົ່ງສານອວຍພອນວັນແມ່ຍິງສາກົນ ຄົບຮອບ 106 ປີ ເນື່ອງໃນໂອກາດສະເຫລີມ ສະ ຫລອງວັນແມ່ຍິງສາກົນ ວັນທີ 8 ມີນາ ຄົບຮອບ 106 ປີໂດຍມີເນື້ອໃນວ່າ: ຂ້າພະເຈົ້າ, ຕາງໜ້າໃຫ້ການນຳ ພັກ-ລັດ ແຫ່ງສປປ ລາວ ແລະ ໃນນາມສ່ວນຕົວ ຂໍສົ່ງພອນໄຊອັນປະເສີດ ມາຍັງເອື້ອຍນ້ອງແມ່ຍິງລາວ ຢູ່ພາຍໃນ ແລະ ຕ່າງປະເທດທຸກຖ້ວນໜ້າ, ພ້ອມທັງເອື້ອຍນ້ອງແມ່ຍິງຊາວຕ່າງດ້າວ, ຊາວຕ່າງປະເທດທີ່ດຳລົງຊີວິດ ແລະ ປະຕິບັດໜ້າທີ່ຂອງຕົນຢູ່ ສປປ ລາວ. ຂໍໃຫ້ເອື້ອຍນ້ອງແມ່ຍິງທຸກຄົນຈົ່ງມີແຕ່ຄວາມສຸກ, ຄວາມເບີກບານ ມ່ວນຊື່ນ ແລະ ມີຜົນສຳເລັດ.

   ການສະເຫລີມສະຫລອງ ວັນແມ່ຍິງສາກົນດັ່ງກ່າວ, ມີຄວາມໝາຍສຳຄັນຢ່າງເລິກເຊິ່ງເພາະ ສປປ ລາວ ໄດ້ຮັບກຽດເຂົ້າເປັນປະຊາຄົມເສດຖະກິດອາຊຽນ, ເປັນປະທານໝູນວຽນອາຊຽນ ອີກວາ ລະໜຶ່ງ, ເປັນປີທີ່ພັກປະຊາຊົນປະຕິວັດລາວ ດຳເນີນກອງປະຊຸມໃຫຍ່ ຄັ້ງທີ X ຂອງຕົນ ສຳເລັດລົງດ້ວຍຄວາມຈົບງາມ ແລະ ກະກຽມການເລືອກຕັ້ງສະພາແຫ່ງຊາດ ຊຸດທີ VIII, ກຽມເລືອກຕັ້ງສະພາປະຊາຊົນຂັ້ນແຂວງທົ່ວປະເທດໃນມໍ່ໆນີ້. ເສັ້ນທາງການຕໍ່ສູ້ຂອງເອື້ອຍນ້ອງແມ່ຍິງສາກົນ ເປັນເສັ້ນ ທາງຍາວໄກ ແຕ່ມື້ເລີ່ມຕົ້ນມາເຖິງປະຈຸບັນ ມີອາຍຸ 106 ປີ ຍິ່ງຕໍ່ສູ້ກໍຍິ່ງເຕີບໃຫຍ່ຂະຫຍາຍຕົວ ເຮັດໃຫ້ອົງການຈັດຕັ້ງສາກົນຮັບຮູ້ບົດບາດ ແລະ ຄວາມສຳຄັນຂອງເອື້ອຍນ້ອງແມ່ຍິງ ມາຮອດປີ 1976 ສະມັດຊາໃຫຍ່ ອົງການສະຫະປະຊາຊາດໄດ້ ຕົກລົງສ້າງຕັ້ງກອງທຶນສະຫະປະຊາຊາດ ເພື່ອແມ່ຍິງເອີ້ນວ່າ: ອົງການຢູນີແຟມ (UNIFEM) ແລະ ໄດ້ສ້າງຕັ້ງສະຖາບັນຄົ້ນຄວ້າ ແລະ ຝຶກອົບຮົມສາກົນ ເພື່ອຄວາມກ້າວໜ້າຂອງແມ່ຍິງ, ປີ 1979 ອົງການສະຫະປະຊາຊາດ ໄດ້ຜ່ານມະຕິກ່ຽວກັບສົນທິສັນ ຍາ ວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງເອີ້ນວ່າ: ສົນທິສັນຍາຊີດໍ (CEDAW) ມີລັດ ຖະບານ 189 ປະເທດເປັນພາຄີ, ສປປ ລາວ ໄດ້ເຂົ້າເປັນພາຄີສົນທິສັນຍາ ດັ່ງກ່າວ ໃນປີ 1981.

ຜ່ານມາພັກ-ລັດ ແຫ່ງສປປ ລາວ ໄດ້ມີແນວທາງນະໂຍບາຍຕໍ່ການພັດທະນາ, ການປົກປ້ອງສິດຜົນປະໂຫຍດຂອງແມ່ຍິງ ແລະ ການສົ່ງເສີມຄວາມສະເໝີພາບລະຫວ່າງຍິງ-ຊາຍ ເຊິ່ງໄດ້ກຳນົດແຈ້ງຢູ່ໃນລັດຖະທຳມະນູນ ແລະ ກົດໝາຍ. ພ້ອມກັນນັ້ນ, ລັດຖະບານ ສປປ ລາວ ຍັງໄດ້ເປັນພາຄີຂອງສົນທິສັນຍາສາກົນ ທີ່ກ່ຽວຂ້ອງກັບການປົກປ້ອງສິດທິຂອງແມ່ຍິງ, ລັດຖະທຳມະນູນສະບັບທຳອິດຂອງສປປ ລາວ ໄດ້ລະບຸວ່າ: ພົນລະເມືອງລາວ ຍິງ-ຊາຍ ມີສິດເທົ່າທຽມກັນທາງດ້າການເມືອງ ວັດທະນະທຳ-ສັງຄົມ ແລະ ຄອບຄົວ. ສປປ ລາວ ໄດ້ມີກົດໝາຍວ່າດ້ວຍການພັດທະນາ ແລະ ປົກປ້ອງແມ່ຍິງ ເຊິ່ງເລັ່ງໃສ່ຮັບຮອງ ແລະ ຍົກສູງບົດບາດຂອງແມ່ຍິງ, ປົກປ້ອງສິດຜົນປະໂຫຍດອັນຊອບທຳຂອງແມ່ຍິງ, ກຳນົດຄວາມຮັບຜິດຊອບຂອງລັດ, ສັງຄົມ ແລະ ຄອບຄົວຕໍ່ແມ່ຍິງ ແນໃສ່ສົ່ງ ເສີມຄວາມຮູ້, ຄວາມສາມາດ, ຄຸນສົມບັດສິນທຳປະຕິວັດ; ຕ້ານການຄ້າແມ່ຍິງ ແລະ ເດັກນ້ອຍ, ຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ສ້າງເງື່ອນໄຂໃຫ້ແມ່ຍິງໄດ້ຮັບການພັດທະນາໃນທຸກດ້ານ, ເພື່ອຮັບປະກັນສິດທິໃນການເຂົ້າເຖິງການສຶກສາຢ່າງສະເໝີພາບເທົ່າທຽມກັນ ຂອງຜູ້ທີ່ດ້ອຍໂອກາດ ໂດຍສະເພາະແມ່ນ ເດັກຍິງ ແລະ ແມ່ຍິງຊົນເຜົ່າ. ກົດໝາຍວ່າດ້ວຍສະຫະພັນແມ່ຍິງລາວ ແນໃສ່ພັດທະນາ, ປົກປ້ອງສິດຜົນປະໂຫຍດອັນຊອບທຳຂອງສະມາຊິກສະຫະພັນແມ່ຍິງ ແລະ ແມ່ຍິງລາວບັນດາເຜົ່າໃນທົ່ວປະເທດ ດ້ວຍການເຂົ້າຮ່ວມຂອງລັດ, ແນວລາວສ້າງຊາດ, ອົງການຈັດ ຕັ້ງມະຫາຊົນ, ສັງຄົມ ແລະ ຄອບຄົວ. ດ້ວຍເຫດນີ້ ຂ້າພະເຈົ້າ ຂໍຮຽກຮ້ອງມາຍັງທຸກທ່ານ ຈົ່ງພ້ອມກັນເພີ່ມທະວີຄວາມສາມັກຄີ ອັນເປັນປຶກແຜ່ນແໜ້ນໜາຂອງຊາວລາວທັງຍິງ ແລະ ຊາຍ ໃນທົ່ວປະ ເທດ ກໍຄືກັບຊາວລາວ ຢູ່ຕ່າງປະເທດ ໂດຍຢຶດໝັ້ນໃນແນວທາງພາຍໃນ ແລະ ຕ່າງປະເທດຂອງພັກ-ລັດເຮົາ ຢ່າງສະເໝີຕົ້ນສະເໝີປາຍ ເພື່ອສືບຕໍ່ສ້າງ ແລະ ຫັນປ່ຽນຢ່າງແຂງແຮງ ພ້ອມກັນຜ່ານຜ່າຄວາມຫຍຸ້ງຍາກ ແລະ ສິ່ງທ້າທາຍທົດສອບທຸກປະການ ເພື່ອກ້າວຂຶ້ນຢ່າງບໍ່ຢຸດຢັ້ງ, ທັງໝົດນີ້ ແມ່ນເພື່ອເຮັດໃຫ້ປະເທດຊາດມັ່ງຄັ່ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມຍຸຕິທຳ ແລະ ສີວິໄລ.

ໃນໂອກາດທີ່ມີຄວາມໝາຍນີ້, ຂ້າພະເຈົ້າຂໍສົ່ງພອນອັນປະເສີດມາຍັງເອື້ອຍນ້ອງແມ່ຍິງລາວບັນດາເຜົ່າ ຈົ່ງປະສົບແຕ່ຄວາມຜາສຸກໃນຊີວິດສ່ວນຕົວ, ຄອບຄົວ ແລະ ມີຜົນສຳເລັດຈົບງາມ ໃນ ໜ້າທີ່ການງານຂອງຕົນທຸກປະການ. ພິເສດ ຂ້າພະເຈົ້າຂໍຝາກຄວາມຢ້ຽມຢາມຖາມຂ່າວ ແລະ ຄວາມເປັນຫ່ວງເປັນໄຍ ພ້ອມທັງພອນໄຊອັນປະເສີດໄປຍັງເອື້ອຍນ້ອງແມ່ຍິງລາວ ທີ່ດຳລົງຊີວິດຢູ່ທຸກແຫ່ງຫົນຈົ່ງມີສຸຂະພາບເຂັ້ມແຂງ ແລະ ມີພະລານາໄມສົມບູນ. ພ້ອມດຽວກັນນີ້, ຂ້າພະເຈົ້າຂໍຝາກຄວາມຢ້ຽມຢາມຖາມຂ່າວ ອັນອົບອຸ່ນມາຍັງພະນັກງານເພດຍິງ ທີ່ຮັບເບ້ຍບຳນານ, ເສຍອົງຄະທຸກຖ້ວນໜ້າ ຈົ່ງມີສຸຂະພາບແຂງແຮງ ແລະ ຝາກຄວາມຢ້ຽມຢາມເອື້ອຍນ້ອງແມ່ຍິງ ຜູ້ທີ່ພວມຮັກສາປິ່ນປົວຢູ່ຕາມໂຮງໝໍແຫ່ງຕ່າງໆ ຈົ່ງຫາຍຈາກພະຍາດໂລຄາທັງປວງໂດຍໄວ ເພື່ອກັບຄືນເມືອກົມກອງ, ຄອບຄົວ ຄຽງບ່າຄຽງໄຫລ່ເພດຊາຍ ເຮັດໜ້າທີ່ປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຮຸ່ງເຮືອງສີວິໄລ.