ແມ່ຍິງລາວສ່ວນຫລາຍມັກພົບຄວາມຮຸນແຮງຫລັງແຕ່ງງານ

          ກອງເລຂາເພື່ອຄວາມກ້າວໜ້າຂອງແມ່ຍິງແຫ່ງຊາດ (ຄກມຊ), ໄດ້ເປີດເຜີຍບົດລາຍງານການສຶກສາລະດັບຊາດ ກ່ຽວກັບການໃຊ້ຄວາມຮຸນແຮງຕໍ່ແມ່ຍິງໃນຫົວຂໍ້: ການໃຊ້ຄວາມຮຸນແຮງຕໍ່ແມ່ຍິງພາຍໃນຄອບຄົວຢູ່ລາວ. ເຊິ່ງພົບວ່າການໃຊ້ຄວາມຮຸນແຮງໃນຄອບຄົວຍັງມີແຜ່ຫລາຍ, ໂດຍສະເພາະກັບຜູ້ຍິງຫລັງແຕ່ງງານ, ຊຶ່ງສະແດງອອກຄື: 15% ຂອງແມ່ຍິງທີ່ເຄີຍແຕ່ງດອງຖືກຄວາມຮຸນແຮງທາງຮ່າງກາຍ ແລະ ທາງເພດ ຈາກຜົວ ຫລື ຄູ່ຮ່ວມຊີວິດຫລາຍກວ່າ 1 ຄັ້ງ ແລະ 1/3 ຄົນແມ່ນຖືກຄວາມຮຸນແຮງນັບທັງໃນດ້ານຮ່າງກາຍ, ທາງເພດ ແລະ ຈິດໃຈ. ຂະນະທີ່ແມ່ຍິງສ່ວນຫລາຍຈະບໍ່ເປີດເຜີຍຄວາມຮຸນແຮງທີ່ຕົນຖືກກະທົບໃຫ້ສັງຄົມຮູ້ເພື່ອຫາຄວາມຊ່ວຍເຫລືອ, ນອກຈາກຄອບຄົວ, ຍາດ

ພີ່ນ້ອງ ແລະ ໝູ່ເພື່ອນທີ່ໃກ້ຊິດເທົ່ານັ້ນທີ່ພວກເຂົາກ້າເວົ້າສູ່ຟັງ, ຊຶ່ງຜູ້ຄົນເຫລົ່ານັ້ນມັກໃຫ້ການປອບໃຈ ແລະ ຊຸກຍູ້ໃຫ້ແມ່ຍິງທີ່ຖືກກະທົບມີຄວາມອົດທົນ, ອົດກັ້ນ ເພື່ອຮັກສາບໍ່ໃຫ້ຄອບຄົວເກີດຄວາມແຕກແຍກ, ມີພຽງ 1/5 ຄົນເທົ່ານັ້ນທີ່ເລືອກໄປຂໍຄວາມຊ່ວຍເຫລືອຈາກອໍານາດການປົກຄອງ, ຕໍາຫລວດ ແລະ ແພດໝໍ.

           ຜົນການສຶກສາຍັງຊີ້ໃຫ້ເຫັນວ່າ: ຄວາມຮຸນແຮງໃນຄອບຄົວແມ່ນສົ່ງຜົນກະທົບຮ້າຍແຮງຕໍ່ສຸຂະພາບຮ່າງກາຍ, ຈິດໃຈ ແລະ ການຈະເລີນເຕີບໂຕຂອງແມ່ຍິງ, ໂດຍສະເພາະເຮັດໃຫ້ແມ່ຍິງມັກເຈັບປ່ວຍເປັນປະຈໍາ, ຍິ່ງໄປກວ່ານັ້ນໄດ້ເຮັດໃຫ້ແມ່ຍິງມີຄວາມຄິດຢາກຂ້າຕົວຕາຍສູງເຖິງ 4 ເທົ່າ,ສ່ວນໃນກຸ່ມແມ່ຍິງທີ່ຖືພາ ກໍຈະມີຄວາມສ່ຽງລຸລູກສູງເຖິງ 1,5 ເທົ່າ ແລະ ເອົາລູກອອກຫລາຍກວ່າ 2 ເທົ່າ ເມື່ອທຽບກັບແມ່ຍິງທີ່ບໍ່ຖືກຄວາມຮຸນແຮງ, ຂະນະດຽວກັນເດັກນ້ອຍອາຍຸລະຫວ່າງ 6 – 11 ປີທີ່ອາໄສຢູ່ໃນຄອບຄົວທີ່ແມ່ຂອງເຂົາເຈົ້າຖືກຄວາມຮຸນແຮງຈາກພໍ່ແມ່ນຈະມີບັນຫາໃນການປະພຶດ ເຊັ່ນ: ນອນຝັນຮ້າຍ, ຍ່ຽວໃສ່ບ່ອນ, ມີພຶດຕິກໍາແຂງກະດ້າງ ແລະ ການຮຽນບໍ່ດີ.

           ບົດລາຍງານຜົນການສຶກສາລະດັບຊາດດັ່ງກ່າວ, ແມ່ນສະບັບຄັ້ງລ້າສຸດທີ່ຫາກໍມີການເປີດເຜີຍຕໍ່ສື່ມວນຊົນເປັນຄັ້ງທໍາອິດເມື່ອຕອນບ່າຍວັນທີ 9 ມີນານີ້, ຢູ່ສະມາຄົມນັກຂ່າວແຫ່ງ ສປປ ລາວ ທີ່ນະຄອນຫລວງວຽງຈັນ.