ຜູ້ສະໝັກເລືອກຕັ້ງ ສສຊ ເຂດ 1 ລົງເຄື່ອນໄຫວນຳສະເໜີຕົນເອງຕໍ່ປະຊາຊົນ

ເຊົ້າວັນທີ 9 ມີນານີ້, ບັນດາຜູ້ສະໝັກຮັບເລືອກຕັ້ງ ສະມາຊິກສະພາແຫ່ງຊາດ (ສສຊ) ຊຸດທີ VIII ເຂດ I ນະຄອນຫລວງວຽງຈັນ ຈຸທີ I ປະກອບມີ 7 ທ່ານ, ຍິງ 2 ທ່ານ, ນຳໂດຍທ່ານ ຮສ.ດຣ ທອງສະລິດ ມັງໜໍ່ເມກ ຫົວໜ້າສະຖາບັນການເມືອງ-ການປົກຄອງແຫ່ງຊາດ, ໄດ້ລົງເຄື່ອນໄຫວນຳສະເໜີຕົນເອງຢູ່ກະຊວງແຮງງານ ແລະ ສະຫວັດດີການສັງຄົມ, ໂດຍມີທ່ານ ດຣ. ຄຳແກ້ວ ສານບຸນ ຄູນໄຊ ລັດຖະມົນຕີຊ່ວຍວ່າການກະຊວງດັ່ງກ່າວ, ໃຫ້ການຕ້ອນຮັບດ້ວຍຄວາມອົບອຸ່ນ, ໃນໂອກາດນີ້ ຜູ້ຮັບສະໝັກໄດ້ຜັດປ່ຽນກັນຂຶ້ນແນະນຳຕົນເອງ ແລະ ຜົນງານການເຄື່ອນໄຫວວຽກງານ, ພ້ອມຄວາມຫວັງຂອງຕົນໃນການປະຕິບັດໜ້າ ທີ່ເປັນຕົວແທນແຫ່ງສິດຜົນປະໂຫຍດຂອງປະຊາຊົນໃຫ້ສົມກັບຄວາມຮຽກຮ້ອງຕ້ອງການ

ຂອງວຽກງານ ແລະ ຮຽກຮ້ອງໃຫ້ປະຊາຊົນລາວບັນດາເຜົ່າມີຄວາມຕື່ນຕົວປະຕິບັດສິດເປັນເຈົ້າຂອງຕົນ, ໄປໃຊ້ສິດ ປ່ອນບັດເລືອກຕັ້ງເອົາຜູ້ມີມາດຖານເງື່ອນໄຂຖືກ ຕ້ອງເຂົ້າເປັນສະມາຊິກ ສະພາແຫ່ງຊາດຊຸດທີ VIII ມີຄຸນນະພາບສູງຂຶ້ນ.

ຂ່າວໃຫ້ຮູ້ຕື່ມວ່າ: ເມື່ອທ້າຍອາທິດຜ່ານມາ, ຜູ້ສະໝັກຮັບເລືອກຕັ້ງ ສສຊ ເຂດ I ນະຄອນ ຫລວງວຽງຈັນ ຈຸທີ II ມີ 8 ທ່ານ, ຍິງ 3 ທ່ານ, ນຳໂດຍທ່ານ ດຣ. ອານຸພາບ ຕຸນາລົມ ຮອງເຈົ້າຄອງນະຄອນຫລວງວຽງຈັນ, ໄດ້ລົງແນະນຳຕົນເອງ ຢູ່ກະຊວງປ້ອງກັນຄວາມສະຫງົບ, ໂດຍມີ ພົຈວ ອາລູ ວາລີຊື ຫົວໜ້າກົມ ໃຫຍ່ການເມືອງ ປກສ, ພ້ອມດ້ວຍພະນັກງານ ນັກຮົມອ້ອມຂ້າງກະ ຊວງດັ່ງກ່າວໃຫ້ການຕ້ອນຮັບຢ່າງອົບອຸ່ນ. ເພື່ອເຮັດໃຫ້ ການເລືອກຕັ້ງ ສສຊ ຊຸດທີ VIII ແລະ ສະ ມາຊິກສະພາປະຊາຊົນຂັ້ນແຂວງຄັ້ງນີ້ ປະສົບຜົນສຳເລັດຢ່າງຈົບງາມຕາມລະດັບຄາດໝາຍວາງໄວ້ຄື: ຮັບປະກັນໄດ້ຄວາມສະຫງົບປອດໄພ 100%, ຮັບປະກັນໃຫ້ຜູ້ມີສິດປ່ອນບັດເລືອກຕັ້ງໃນທົ່ວນະ ຄອນຫລວງວຽງຈັນ ສາມາດໄປໃຊ້ສິດປ່ອນບັດຄັດເລືອກເອົາຕົວແທນຂອງຕົນ ແລະ ຮັບປະກັນ 100% ບໍ່ໃຫ້ມີບັດເສຍບັດຕາຍ.