ກຽມເປີດອານຸສອນສັນຕິລາດຢູ່ແຂວງຫົວພັນຕ້ອນຮັບວັນສ້າງຕັ້ງກໍາລັງ ປກສ ຄົບຮອບ 55 ປີ

ຂ່າວ-ພາບ : ຫນັງສືພິມ ປກສ

           ລາວຈະເປີດໃຫ້ມວນຊົນສາມາດເຂົ້າຢ້ຽມຊົມອານຸສອນສະຖານສັນຕິລາດ, ຊຶ່ງຕັ້ງຢູ່ເທດສະບານເມືອງວຽງໄຊ, ແຂວງຫົວພັນນັບແຕ່ວັນທີ 11 ມີນານີ້ເປັນຕົ້ນໄປ, ພາຍຫລັງສໍາເລັດການກໍ່ສ້າງສະຖານທີ່ສໍາຄັນດັ່ງກ່າວເພື່ອຂໍ່ານັບຮັບຕ້ອນວັນສ້າງຕັ້ງກໍາລັງປ້ອງກັນຄວາມສະຫງົບ (ປກສ) ຄົບຮອບ 55 ປີ (5 ເມສາ 1961 – 5 ເມສາ 2016) ແລະ ເມື່ອທ້າຍອາທິດຜ່ານມາທ່ານຫົວໜ້າກົມຄົ້ນຄວ້າວິທະຍາສາດ ແລະ ປະຫວັດສາດກະຊວງ ປກສ  ໃຫ້ຮູ້ວ່າ: ອານຸສອນດັ່ງກ່າວມີຄວາມໝາຍສໍາຄັນຫລາຍຕໍ່ປະເທດຊາດ, ເວົ້າສະເພາະຕໍ່ກໍາລັງ ປກສ ເຊິ່ງເປັນບ່ອນດໍາລົງຊີວິດ ແລະ ເປັນສູນບັນຊາການເຄື່ອນໄຫວຊີ້ນໍາ, ບັນຊາຕໍ່ສູ້ຕ້ານສັດຕູຂອງກໍາລັງ ປກສ ເພື່ອປົກປັກຮັກສາເຂດທີ່ໝັ້ນຂອງການປະຕິວັດ, ໂດຍສະເພາະແມ່ນປ້ອງກັນພັກ ແລະ ບັນດາຜູ້ນໍາການປະຕິວັດລາວໃນໄລຍະຊຸມປີ 1964-1975.

            ທ່ານຫົວໜ້າກົມດັ່ງກ່າວ ໃຫ້ຮູ້ວ່າ: ສະຖານທີ່ແຫ່ງນີ້ອ້ອມຮອບໄປດ້ວຍຜາຫີນ ແລະ ມີຖໍ້າສໍາຄັນຄື:ຖໍ້າທ່ານ ຊົມຊື່ນ ຄໍາພິທູນ,ຖໍ້າພະລາທິການ (ຖໍ້າເຮືອນຄົວ),ຖໍ້າຫ້ອງສັນຕິລາດ, ຖໍ້າປະ ກອບອາວຸດ ແລະ ຈຸດທີ່ຕັ້ງກອງຮ້ອຍ 2. ການກໍ່ສ້າງສະຖານທີ່ດັ່ງກ່າວໃຫ້ເປັນອານຸສອນສະຖານສັນຕິລາດນີ້ ກໍເພື່ອສະແດງຄວາມເຄົາລົບ, ຮູ້ບຸນຄຸນ, ຈາລຶກເຖິງຄຸນງາມຄວາມດີ ແລະ ຜົນງານອັນໃຫຍ່ຫລວງຂອງກໍາລັງ ປກສ ຍາດມາໄດ້ໃນຫລາຍສີບປີຜ່ານມາ ແລະ ທັງເປັນການໂຄສະນາເຜີຍ  ແຜ່ໃຫ້ພະນັກງານ-ນັກຮົບໃນກໍາລັງ ປກສ ລວມເຖິງມວນຊົນທັງພາຍໃນ ແລະ ນັກທ່ອງທ່ຽວຕ່າງ ປະເທດໄດ້ຮັບຮູ້ປະຫວັດຄວາມເປັນມາຂອງສະຖານທີ່ປະຫວັດສາດສໍາຄັນດັ່ງກ່າວນໍາດ້ວຍ.