ອົບຮົມຄວາມຮູ້ພື້ນຖານການຊ່ວຍເຫຼືອຜູ້ປະສົບໄພພິບັດກໍລະນີສຸກເສີນ

ວັນທີ 9 ມີນານີ້, ສາທາລະນະສຸກນະຄອນຫຼວງວຽງຈັນຮ່ວມກັບອົງການຈັດຕັ້ງສາກົນເພື່ອການເຄື່ອນຍ້າຍຖິ່ນຖານ ( IOM ) ປະຈຳລາວ, ເປີດຊຸດຝຶກອົບຮົມກ່ຽວກັບຄວາມຮູ້ພື້ນຖານການຄຸ້ມຄອງ ແລະ ໃຫ້ຄວາມຊ່ວຍເຫຼືອຜູ້ປະສົບໄພພິບັດກໍລະນີສຸກເສີນຂື້ນທີ່ນະຄອນຫຼວງວຽງຈັນ, ໂດຍການເຂົ້າຮ່ວມຂອງທ່ານ ດຣ ພອນປະເສີດ ອຸນາພົມ, ຫົວໜ້າພະແນກສາທາລະນະສຸກນະຄອນຫຼວງວຽງຈັນ ແລະ ທ່ານ ເດມຽນ ຄິວເນີ ຫົວໜ້າຫ້ອງການ ອົງການ IOM ປະຈຳລາວ ມີຫົວໜ້າຫ້ອງການສາທາລະນະສຸກ 9 ຕົວເມືອງອ້ອມຂ້າງພ້ອມດ້ວຍພະນັກງານແພດໝໍເຂົ້າຮ່ວມເປັນຈຳນວນຫຼາຍ.

ທ່ານ ຫົວໜ້າພະແນກສາທາລະນະສຸກນະຄອນຫຼວງວຽງຈັນກ່າວໃນພິທີວ່າ: ປັດຈຸບັນສະ ຖານະການໄພພິບັດໃນປະເທດເຮົາມີແນວໂນມທະວີຄວາມຮຸນແຮງ ແລະ ຄວາມຖີ່ຂື້ນເຊັ່ນ: ໄພນ້ຳ ຖ້ວມ, ອັກຄີໄພ ແລະ ລົມພາຍຸ, ອັນໄດ້ສ້າງຄວາມເສຍຫາຍໃຫ້ແກ່ຊີວິດ ແລະ ຊັບສິນຂອງປະຊາຊົນເປັນຈຳນວນຫຼາຍ, ດ້ວຍເຫດນັ້ນປະເທດເຮົາຈຳເປັນຕ້ອງໄດ້ມີການພັດທະນາການຄຸ້ມຄອງ ແລະ ໃຫ້ຄວາມຊ່ວຍເຫຼືອຜູ້ປະສົບໄພພິບັດດັ່ງກ່າວໃຫ້ດີຂື້ນ ຄື: ໃນປີ 2015 ທີ່ຜ່ານມາ, ສະເພາະຢູ່ນະຄອນ ຫຼວງວຽງຈັນໄດ້ເກີດໄຟ ໄໜ້ເຮືອນປະຊາຊົນເຖິງ 92 ຫຼັງ, ເປັນເຫດໃຫ້ປະຊາຊົນ 414 ຄົນ ໄດ້ຮັບຜົນກະທົບ ແລະ ມີຫຼາຍກວ່າ 1.700 ຄອບຄົວໄດ້ຮັບຜົນກະທົບຈາກລົມພາຍຸ ແລະ ໄພພິບັດອື່ນໆ, ດ້ວຍເຫດຜົນດັ່ງກ່າວພະແນກສາທາລະນະສຸກນະຄອນຫຼວງວຽງຈັນ, ຊຶ່ງມີໜ້າທີ່ເປັນເສນາທິການໃຫ້ແກ່ກະຊວງສາທາລະນະສຸກຈຶ່ງໄດ້ຈັດຊຸກຝຶກອົບຮົມນີ້ຂື້ນ ເພື່ອເສີມສ້າງຄວາມຮູ້ ແລະ ຄວາມສາມາດໃຫ້ແກ່ພະນັກງານສາທາລະນະສຸກຂັ້ນເມືອງ. ເພື່ອສາມາດປະຕິບັດການຄຸ້ມຄອງ ແລະ ໃຫ້ຄວາມຊ່ວຍເຫຼືອຜູ້ປະສົບໄພພິບັດໄດ້, ທັງເປັນການພັດທະນາການໃຫ້ຄວາມຊ່ວຍເຫຼືອຜູ້ປະສົບໄພພິ ບັດຂອງອົງການປົກຄອງເມືອງ ແລະ ໜ່ວຍງານທີ່ກ່ຽວຂ້ອງໃຫ້ເປັນລະບົບ ແລະ ເປັນໄປໃນທິດດຽວກັນ ແລະ ເປັນການແລກປ່ຽນຄວາມຄິດເຫັນ ແລະ ປະສົບການລະຫວ່າງຜູ້ເຂົ້າຮ່ວມຝຶກອົບຮົມດ້ວຍກັນ.

ຫົວໜ້າພະແນກດັ່ງກ່າວໃຫ້ຮູ້ອີກວ່າ: ຊຸດຝຶກອົບຮົມຄັ້ງນີ້ຍັງເປັນການຕອບສະໜອງຄວາມຮຽກຮ້ອງຕ້ອງການຂອງແຜນພັດທະນາສາທາລະນະສຸກ ນະຄອນຫຼວງໃຫ້ມີປະສິດທິພາບສູງຂຶ້ນ, ໂດຍມີລະບົບບໍລິຫານ ແລະ ວິຊາການອັນເປັນເຄື່ອງມືສຳຄັນໃນການເຊື່ອມໂຍງຂະບວນການປະ ຕິບັດງານ ແລະ ສາມາດເປັນທິດທາງໃຫ້ແກ່ສາທາລະນະສຸກເມືອງໄດ້ນຳເອົາແນວທາງດັ່ງກ່າວໄປປະຕິບັດໃຫ້ບັນລຸຜົນລຳເລັດຢ່າງມີປະສິດທິພາບ.