ກະຊວງແຜນການ ແລະ ການລົງທຶນເຜີຍແຜ່ເອກະສານສຳຄັນຂອງພັກ

ກະຊວງແຜນການ ແລະ ການລົງທຶນ (ຜທ), ໄດ້ຈັດກອງປະຊຸມເຊື່ອມຊຶມເອກະສານສຳຄັນຂອງພັກເປັນຕົ້ນ: ບົດສູນທອນພົດຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ, ມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ Xຂອງພັກ ປະຊາຊົນປະຕິວັດລາວຂຶ້ນໃນວັນທີ 10 ມີນານີ້, ໂດຍມີສະຫາຍ ສົມດີ ດວງດີ ເລຂາຄະນະບໍລິຫານງານພັກ, ລັດຖະມົນຕີວ່າການກະຊວງແຜນການ ແລະ ການລົງທຶນ, ພ້ອມບັນດາພະນັກງານ-ລັດຖະກອນພາຍໃນກະຊວງດັ່ງກ່າວເຂົ້າຮ່ວມ​ເປັນ​ຈໍານວນ​ຫລາຍ. 

           ໂອກາດດັ່ງກ່າວ, ສະຫາຍ ສົມດີ ດວງດີ ໄດ້ໃຫ້ກຽດເຜີຍແຜ່ເອກະສານສຳຄັນດັ່ງ

ກ່າວ ເພື່ອແນໃສ່ເຮັດໃຫ້ສະມາຊິກພັກ, ພະນັກງານ-ລັດຖະກອນພາຍໃນກະຊວງແຜນການ ແລະ ການ

ລົງທຶນຮັບຮູ້ກ່ຽວກັບຄວາມໝາຍ, ຄວາມສຳຄັນຂອງການສະຖາປານາ ສປປ ລາວ ຄົບຮອບ 40 ປີ, ເຊິ່ງເປັນເຫດການປະຫວັດສາດສຳຄັນຂອງຊາດ, ຂອງພັກ. ພ້ອມດຽວກັນນີ້, ກໍໄດ້ເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ, ແນວທາງນະໂຍບາຍຂອງພັກ-ລັດ, ແຜນພັດທະນາເສດຖະກິດ-ສັງຄົມແຫ່ງຊາດ ເພື່ອນຳໄປຜັນຂະຫຍາຍເຂົ້າໃນວຽກງານໃຫ້ມີຜົນສໍາ​ເລັດ    ໃໝ່, ສ້າງບາດກ້າວໃໝ່ໃນການພັດທະນາ ແລະ ນຳພາປະເທດຊາດກ້າວຂຶ້ນຢ່າງໜັກແໜ້ນ.

            ໃນໂອກາດດຽວກັນ, ສະຫາຍນາງ ຄຳຈັນ ວົງແສນບູນ ຮອງເລຂາຄະນະພັກ, ລັດຖະມົນຕີຊ່ວຍ​ວ່າການກະຊວງແຜນການ ແລະ ການລົງທຶນ ໄດ້ເຜີຍແຜ່ຜົນສໍາເລັດຂອງການດຳເນີນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ, ອັນພົ້ນເດັ່ນກອງປະຊຸມໄດ້ເລືອກເອົາກຳມະການສົມບູນ ແລະ ສຳຮອງ, ເຊິ່ງໄດ້ເຫັນດີເປັນເອກະພາບເລືອກຕັ້ງກຳມະການກົມການເມືອງສູນກາງພັກ 11 ສະຫາຍ, ເລືອກເອົາເລຂາຄະນະບໍລິຫານງານສູນກາງພັກ, ຄະນະເລຂາທິການສູນກາງພັກ, ຄະນະກວດກາສູນກາງພັກເພື່ອເປັນແກນນຳພາທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວບັນດາເຜົ່າໃນການສ້າງສາພັດທະນາປະເທດຊາດ.