ເສັ້ນທາງດອນໜູນ-ທ່າງ່ອນມັກເກີດອຸປະຕິເຫດ

          ເຖິງວ່າເສັ້ນທາງແຕ່ວົງວຽນບ້ານດອນໜູນຫາຂົວຂ້າມນໍ້າງື່ມເຂດບ່ານທ່າງ່ອນ, ເມືອງໄຊທານີ, ນະຄອນຫລວງວຽງຈັນ, ການກໍ່ສ້າງຍັງບໍ່ທັນສໍາເລັດສົມບູນກໍຕາມ, ແຕ່ຜູ້ສັນຈອນໄປມາບົນເສັ້ນທາງດັ່ງກ່າວຕ່າງສະແດງຄວາມຄິດເຫັນຄືກັນວ່າມັນເປັນເສັ້ນທາງສາຍໜຶ່ງທີ່ມີອຸປະຕິເຫດເກີດຂຶ້ນຫລາຍ ແລະ ຄັ້ງລ່າສຸດເມື່ອເວລາປະມານ 22:00 ໂມງກວ່າໆຂອງວັນທີ 7 ມີນານີ້, ກໍມີລົດກະບະຄັນໜຶ່ງຕໍາຫລັກເສົາໄຟເຍືອງທາງຢູ່ຄູກາງທາງຕໍ່ໜ້າປໍ້ານໍ້າມັນເຂດບ້ານນາເກືອບຂາດ, ແຕ່ໂຊກດີທີ່ຜູ້ຂັບລົດໃຫຍ່ແມ່ນໄດ້ຮັບບາດເຈັບເຫລັກໜ້ອຍ. ຂະນະດຽວກັນຄວາມແອອັດສັບສົນຂອງພາຫະນະທີ່ຈອດບໍ່ເປັນລະບຽບຊະຊາຍຢູ່ເຂດຕໍ່ໜ້າຕະຫລາດດົງໝາກຄາຍທີ່ເກີດຈາກການຈັດສັນລົດເຂົ້າ-ອອກ ຕະຫລາດທີ່ໄຮ້ປະສິດທິຜົນກໍແມ່ນບັນຫາໜຶ່ງທີ່ສ້າງຄວາມຫຍຸ້ງຍາກລໍາຄານໃຫ້ແກ່ຜູ້ໃຊ້ລົດໃຊ້ຖະໜົນສັນຈອນໄປມາບົນເສັ້ນທາງດັ່ງກ່າວ.

           ຕາມການສອບຖາມພະນັກງານບໍລິສັດຮັບເໝົາກໍ່ສ້າງເສັ້ນທາງດັ່ງກ່າວ ບອກວ່າ: ທາງສາຍນີ້ມີຄວາມຍາວປະມານ 12 ກິໂລແມັດ, ປັດຈຸບັນແມ່ນສໍາເລັດການປູເບຕົງໜ້າທາງແລ້ວ, ເຫລືອພຽງໜ້າວຽກການກໍ່ສ້າງ ແລະ ທາສີຄູກາງທາງ, ຂີດເສັ້ນຈະລາຈອນ, ປູທາງຍ່າງສອງຝາກທາງ ແລະ ສ້ອມແປງຄືນບາງຈຸດຂອງໜ້າທາງທີ່ເກີດການແຕກແຫງ, ສະນັ້ນ ໃນຊ່ວງໄລຍະນີ້ຈຶ່ງມີບາງຍ່ານໄດ້ປິດການສັນຈອນໃຫ້ລົດແລ່ນໄດ້ເບື້ອງດຽວຈຶ່ງ​ເຮັດ​​ໃຫ້​ມີ​ສະພາບ​ແອ​ອັດ​ເພີ່ມ​ຂຶ້ນ.

           ປະຊາຊົນທີ່ອາໄສຢູ່ບໍລິເວນໃກ້ຄຽງເສັ້ນທາງບອກວ່າ: ນັບແຕ່ເສັ້ນທາງໄດ້ຮັບການ

ສ້ອມແປງໃຫ້ຈົບງາມ ແລະ ການສັນຈອນມີຄວາມສະດວກດີປະກົດວ່າມັກມີອຸປະຕິເຫດເກີດຂຶ້ນເລື້ອຍໆສະເລ່ຍປະມານ 1-2 ກໍລະນີຕໍ່ອາທິດ, ສ່ວນຫລາຍເກີດຂຶ້ນໃນຊ່ວງຄໍ່າຄືນ, ຍ້ອນເສັ້ນທາງມີຄວາມມືດ, ແລ່ນລົດໄວ ແລະ ແລ່ນສວນກັນໃນເລນດຽວ, ສະນັ້ນ ຖ້ານັກຂັບຂີ່ຫາກຂາດສະຕິ ຫລື ປະໝາດກໍອາດເກີດອຸປະຕິເຫດໄດ້​ງ່າຍ.