ວັນທີ
25 ເມສານີ້,ທີ່ສະຖາບັນສື່ມວນຊົນ ວັດທະນະທຳ ແລະ ທ່ອງທ່ຽວ ໄດ້ຈັດຊຸດຝຶກອົບຮົມໄລຍະສັ້ນ (5 ວັນ) ກ່ຽວກັບວຽກງານຄຸ້ມຄອງວັດທະນະທຳໃຫ້ແກ່ວິຊາການວັດທະນະທຳ ໃນຂອບເຂດທົ່ວປະເທດຈຳນວນ 38 ຄົນ,ໂດຍມີທ່ານ ສຈ.ດຣ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ,ພ້ອມດ້ວຍຫົວໜ້າກົມ,ຮອງກົມ ເຂົ້າຮ່ວມ.
ຊຸດຝຶກອົບຮົມດັ່ງກ່າວ,ຜູ້ເຂົ້າຮ່ວມຈະໄດ້ຮຽນຮູ້ກ່ຽວກັບການສ້າງບຸກຄະລາກອນສິລະປະການສະແດງ,ການຄຸ້ມຄອງກວດແກ້ ແລະ ອະນຸຍາດນຳໃຊ້ເພງຮ້ອງ,ວຽກງານຄຸ້ມຄອງຮູບເງົາ,ຄຸ້ມຄອງພິມຈຳໜ່າຍ,ຄຸມຄອງມໍລະດົກ,ຄຸ້ມຄອງວິຈິດສິນ,ກົດໝາຍຊັບສິນທາງປັນຍາ ແລະ ອື່ນໆ.
ໃນໂອກາດນີ້, ທ່ານ ສຈ.ດຣ ບໍ່ແສງຄຳ ວົງດາລາ ໄດ້ສະແດງຄວາມຊົມເຊີຍ ຕໍ່ສະຖາບັນດັ່ງກ່າວ ທີ່ໄດ້ຈັດຊຸດຝຶກອົບຮົມຂຶ້ນ ເຊິ່ງເປັນການສ້າງບຸກຄະລາກອນ ທີ່ເຮັດວຽກງານກ່ຽວກັບວັດທະນະທຳ ໃນຂອບເຂດທົ່ວປະເທດ ໄດ້ຮຽນຮູ້ ແລະ ເຂົ້າໃຈ
ວຽກງານດ້ານວັດທະນະທຳຫລາຍຂຶ້ນ. ວຽກງານດັ່ງກ່າວ, ເປັນວຽກງານໜຶ່ງທີ່ສຳຄັນ ຕໍ່ການສ້າງສາພັດທະນາປະເທດຊາດ ໂດຍສະເພາະ ໃນພາລະກິດການສ້າງອະລິຍະທຳທາງດ້ານວັດຖຸ ແລະ ຈິດໃຈ
ໃຫ້ແກ່ປະຊາຊົນລາວບັນດາເຜົ່າ. ພ້ອມນັ້ນ, ທ່ານ ລັດຖະມົນຕີ ຍັງໄດ້ຮຽກຮ້ອງ ໃຫ້ວິຊາການທີ່ເຮັດວຽກວັດທະນະທຳ ຕ້ອງເອົາໃຈໃສ່ດ້ານວິຊາສະເພາະ ແລະ ຈັນຍາບັນ ຂອງຜູ້ພິທັກວັດທະນະທຳ ໃຫ້ສົມຄູ່ກັບໜ້າທີ່ພາລະບົດບາດໃນການຄຸ້ມຄອງລັດ, ຄຸ້ມຄອງສັງຄົມ ກໍຄືການຄຸ້ມຄອງທັງໝົດໃນຂົງເຂດການເຄື່ອນໄຫວວັດ ທະນະທຳ-ສັງຄົມ ໃຫ້ດີຂຶ້ນ ເທື່ອລະກ້າວ.
No comments:
Post a Comment