laophatthananewspaper: ຈົ່ງເອົາໃຈໃສ່ເກັບກ່ຽວມ້ຽນມັດຜົນຜະລິດລະດູແລ້ງ ແລະ ກຽມຜະລິດລະດູຝົນໃຫ້ດີ

ເພື່ອເຮັດໃຫ້ການບົວລະບັດເຂົ້ານາແຊງ ແລະ ພືດລະດູແລ້ງເປັນຂະບວນຟົດຟື້ນ ແລະ ການເກັບກ່ຽວມ້ຽນມັດຜົນຜະລິດລະດູແລ້ງນີ້ໃຫ້ດີໄດ້ຮັບຜົນສູງ ແລະ ກະກຽມເຂົ້າສູ່ການຜະລິດລະດູຝົນ,ໂດຍສະເພາະແມ່ນເຂົ້ານາປີໃຫ້ບັນລຸຕາມຄາດໝາຍແຜນການ, ສາມາດຕອບສະໜອງການບໍລິໂພກພາຍໃນໄດ້ພຽງພໍ ແລະ ທັງເປັນສິນຄ້າສົ່ງອອກດັ່ງນັ້ນ ລັດຖະມົນຕີກະຊວງກະສິກຳ ແລະ ປ່າໄມ້ຈຶ່ງໄດ້ອອກຄຳສັ່ງແນະນຳສະບັບເລກທີ 2108/ກປ ລົງວັນທີ 27 ເມສາ 2016 ເຖິງບັນດາກົມ, ສະຖາບັນ,ຫົວໜ້າພະແນກກະສິກຳ ແລະ ປ່າໄມ້ແຂວງ ແລະ ນະຄອນຫຼວງຈົ່ງເພີ່ມຄວາມຮັບຜິດຊອບໃນການເກັບກ່ຽວມ້ຽນມັດຜົນຜະລິດລະດູແລ້ງຕິດພັນກັບການກະກຽມຜະລິດລະດູຝົນ 2016 ດັ່ງນີ້: (1) ໃຫ້ກົມປູກຝັງ ແລະ ກົມສົ່ງເສີມກະສິກຳ ແລະ ສະຫະກອນ ຮີບຮ້ອນເປັນເຈົ້າການສົມທົບກັບພະ ພະແນກກະສິກຳ ແລະ ປ່າໄມ້ປະຈຳແຂວງ, ນະຄອນຫລວງວຽງຈັນ ເອົາໃຈໃສ່ລົງຊຸກຍູ້ກະສິກອນຂຸ້ນ

ຂ້ຽວເກັບກ່ຽວມ້ຽນມັດເຂົ້ານາແຊງ ແລະ ພືດລະດູແລ້ງ ໃຫ້ສຳເລັດໃນທ້າຍເດືອນພຶດສະພານີ້,ເພື່ອຫລີກລຽງຜົນກະທົບຈາກສະພາບຝົນຕົກອັນຈະເຮັດໃຫ້ສະມັດຕະພາບ ການຜະລິດຕົກຕ່ຳ ແລະ ເຊື່ອມຄຸນນະພາບ; ພ້ອມນັ້ນ ກໍຕ້ອງຮີບຮ້ອນກະກຽມເຂົ້າສູ່ການຜະລິດລະດູຝົນ 2016 ໃຫ້ທັນກັບລະດູການໃນຂອບເຂດທົ່ວປະເທດ (2) ໃຫ້ພະແນກກະສິກຳ ແລະ ປ່າໄມ້ແຂວງ, ນະຄອນ ຫລວງວຽງຈັນສືບຕໍ່ບຸກທະລຸຢ່າງແຂງແຮງກວ່າເກົ່າໃນການຫັນເອົາພະນັກງານລົງນຳພາກະສິກອນກຽມດິນຕົກກ້າ ແລະ ປັກດຳເຂົ້ານາປີ ຢ່າງຊ້າໃຫ້ສຳເລັດໃນອາທິດທີ 3 ຂອງເດືອນສິງຫາ 2016. ສະເພາະນາປີ ຕ້ອງສູ້ຊົນບັນລຸຜົນຜະລິດໃຫ້ໄດ້ 3.455.500 ໂຕ, ດັ່ງນັ້ນຕ້ອງປັກດຳໃຫ້ໄດ້ໃນເນື້ອທີ 787.000 ເຮັກຕາ ແລະ ຮັບປະກັນໃຫ້ສະ ມັດຕະພາບການເກັບກ່ຽວບັນລຸຢ່າງໜ້ອຍ 4,24 ໂຕນ/ເຮັກຕາ ແລະ ພ້ອມດຽວກັນກໍຕ້ອງໄດ້ເອົາໃຈໃສ່ຊຸກຍູ້ສົ່ງເສີມໃຫ້ຊາວກະສິກອນປູກພືດຜັກ, ພືດຕະ ກຸນຖົ່ວ ແລະ ພືດເສດຖະ ກິດທີ່ເປັນທ່າແຮງໃນທ້ອງຖິ່ນຕົນ, ເພື່ີອຕອບສະໜອງຄວາມຕ້ອງການຂອງສັງຄົມໄດ້ຢ່າງພຽງພໍທັງເປັນສິນຄ້າສົ່ງອອກ; (3) ໃຫ້ພະແນກກະສິກຳ ແລະ ປ່າໄມ້ປະຈຳແຂວງ, ນະ ຄອນຫລວງວຽງຈັນກຳນົດເຂດຈຸດສຸມຕົວແບບລວມທັງບ້ານ 03 ສ້າງ ແລະ ບ້ານຈຸດສຸມພັດທະ ນາ ປະຕິບັດຕາມທິດນຳທີ່ວ່າ “ທຸກວຽກຈຸດສຸມ, ສຳຄັນຕ້ອງມີຜູ້ເຮັດຕົວຈິງ ແລະ ມີຜູ້ຮັບຜິດຊອບນຳພາ-ຊີ້ນຳ ເປັນປະຈຳ” ຕ້ອງມີການສົມ ທົບຢ່າງກົມກຽວລະຫວ່າງ ການສ້າງເປັນຈຸດສຸມ ແລະ ຈຸດທົ່ວໄປ. ສະເພາະເຂດຈຸດສຸມ ຕ້ອງຮັບປະກັນສະມັດຕະພາບການຜະລິດສະເລ່ຍບໍ່ໃຫ້ຫລຸດ 5,5 ໂຕນ/ເຮັກຕາ ໂດຍມີການນຳໃຊ້ແນວພັນໃໝ່ທີ່ໃຫ້ຜົນຜະລິດສູງ, ນຳໃຊ້ກົນຈັກ ແລະ ເຕັກນິກກະເສດສຸມຢ່າງຖືກຕ້ອງ ຕາມທິດຫັນເປັນອຸດສາຫະກຳ ແລະ ທັນສະໄໝ; (4 )ໃຫ້ກົມສົ່ງເສີມກະສິກຳ ແລະ ສະຫະກອນ ສົມທົບກັບພະແນກກະສິກຳ ແລະ ປ່າໄມ້ແຂວງ, ນະຄອນຫລວງວຽງຈັນ ສືບຕໍ່ຫັນເອົາວິຊາການລົງຫາຈຸດສຸມກຸ່ມບ້ານ ເພື່ອນຳພາປະຊາຊົນເຮັດ ຕົວຈິງຕາມທິດນຳທີ່ວ່າ: “ນຳພາປະຊາຊົນປູກ, ນຳພາລ້ຽງ ແລະ ຖ່າຍທອດເຕັກນິກວິຊາການໃຫ້ປະຊາຊົນ” ເປັນຕົ້ນເຕັກນິກການເຮັດກະເສດສຸມ, ຕິດພັນກັບການປຸກລະດົມປະຊາຊົນຂົນຝຸ່ນຄອກ, ຝຸ່ນບົ່ມ, ຝຸ່ນຊີວະພາບຕ່າງໆລົງໃສ່ນາ ຕາມທິດກະສິກຳສະອາດ ແລະ ເອົາໃຈໃສ່ໂຄສະນາເຜີຍແຜ່ເຕັກນິກໃໝ່ໂດຍຜ່ານສື່ຕ່າງໆຂອງລັດເຊັ່ນ: ວິທະຍຸ, ໂທລະພາບ, ໜັງສືພິມ, ປຶ້ມຄູ່ມື, ໂປສະເຕີ, ແຜ່ນພັບ, ວິດີໂອ, ຊີດີ ແລະ ອື່ນໆ ຢ່າງເປັນຂະບວນຕໍ່ເນື່ອງ; (5) ໃຫ້ກົມແຜນການ ແລະ ການຮ່ວມມື, ກົມປູກຝັງ, ກົມຊົນລະປະທານ ແລະ ກົມສົ່ງເສີມກະສິກຳ ແລະ ສະຫະກອນ ປະສານສົມທົບກັບພະແນກກະສິກຳ ແລະ ປ່າໄມ້ປະຈຳແຂວງ, ນະຄອນຫລວງ ວຽງຈັນພ້ອມກັນ ກຳນົດຄວາມຕ້ອງການປັດໄຈການຜະລິດ ໂດຍສະເພາະແນວພັນ, ຝຸ່ນ, ຢາປາບສັດຕູພືດ, ທຶນຮອນຂອງຊາວກະສິກອນ ແລະ ຈຸດສຸມຜະລິດສິນຄ້າປາຍແຫລມເພື່ອເປັນບ່ອນອີງໃນການສະເໜີໃຫ້ທະນາຄານສະໜອງສິນເຊື່ອແກ່ຊາວກະສິກອນ, ກຸ່ມປູກເຂົ້າ, ກຸ່ມໂຮງສີເຂົ້າ, ຜູ້ເກັບຊື້, ຜູ້ປະກອບການໂຮງອົບ ແລະ ສ້າງເກັບມ້ຽນຕ່າງໆ, ພ້ອມກັນນັ້ນກໍຕ້ອງມີມາດ ຕະການທີ່ເໝາະສົມເພື່ອກະກຽມຮັບມືກັບໄພແຫ້ງແລ້ງ ຫລື ໄພນ້ຳຖ້ວມທີ່ອາດຈະເກີດຂຶ້ນໃນບາງບໍລິເວນຢ່າງທັນການ;(6) ໃຫ້ກົມລ້ຽງສັດ ແລະ ການປະມົງ ສົມທົບກັບພະແນກກະສິກຳ ແລະ ປ່າໄມ້ປະຈຳແຂວງ, ນະຄອນ ຫລວງວຽງຈັນ ຊຸກຍູ້ສົ່ງເສີມຊາວກະສິກອນປັບປຸງ, ຂະ ຫຍາຍພັນສັດ, ປາ ແລະ ສັດນ້ຳ ລວມທັງພັດທະນາອາຫານສັດ ແລະ ອາຫານປາ. ສືບຕໍ່ເຝົ້າລະວັງການແຜ່ລະບາດຂອງພະຍາດສັດ ແລະ ການປະຕິບັດມາດຕະການສະກັດກັ້ນການຄ້າຂາຍສັດແບບບໍ່ຖືກຕ້ອງຕາມຊາຍແດນລະ ຫວ່າງຊາດ ຢ່າງເຂັ້ມງວດເພື່ອຕ້ານການແຜ່ລະບາດຂອງພະຍາດສັດຕິດພັນກັບການປຸກລະດົມຂະບວນການສັກຢາປ້ອງກັນພະຍາດສັດລ້ຽງໃຫ້ໄດ້ໃນອັດຕາສ່ວນສູງໂດຍຖືເອົາວັນທີ 11 ພະຈິກ 2016 ເປັນວັນສ້າງຂະບວນການສັກຢາກັນພະຍາດສັດໃຫ້ກວ້າງຂວາງໃນທົ່ວປະເທດ; (7) ໃຫ້ສະຖາບັນຄົ້ນຄວ້າກະສິກຳ ແລະ ປ່າໄມ້ແຫ່ງຊາດ ສົມທົບກັບພະແນກກະສິກຳ ແລະ ປ່າໄມ້ປະຈຳແຂວງ, ນະຄອນຫລວງວຽງຈັນ, ບັນດາສູນ ແລະ ສະຖານີຂອງລັດ ຕະຫລອດຮອດຜູ້ປະກອບການແນວພັນເພື່ອສະໜອງພັນເຂົ້າ, ແນວພັນພືດ, ແນວພັນສັດ, ປາ ແລະ ສັດນ້ຳ ໃຫ້ແກ່ຊາວກະສິກອນໂດຍສະເພາະແມ່ນບັນດາ 10 ແຂວງເປົ້າໝາຍ ຂອງໂຄງການຄ້ຳປະກັນສະ ບຽງອາຫານແຫ່ງຊາດໃຫ້ພຽງພໍ ແລະ ໃຫ້ກະກຽມແນວພັນແຮໄວ້ໃນກໍລະນີສຸກເສີນເກີດໄພນ້ຳ ຖ້ວມຫລືແຫ້ງແລ້ງໃຫ້ສາມາດຕອບສະໜອງການຜະ ລິດຄືນໃໝ່ໄດ້ຢ່າງທັນການ; (8) ມອບໃຫ້ບັນດາກົມ ແລະ ສະຖາບັນອ້ອມຂ້າງກະຊວງ ອອກຄຳແນະນຳດ້ານວິຊາການເພື່ອຜັນ ຂະຫຍາຍຄຳສັ່ງສະບັບນີ້ເຂົ້າສູ່ພືດຕິກຳຕົວຈິງຖືເອົາ “ການຜະລິດກະສິກຳເປັນສະໜາມຮົບອັນດັບໜຶ່ງ” ຕ້ອງເພີ່ມທະວີຄວາມເປັນເອກະພາບ ແລະ ຈັດຕັ້ງປະຕິບັດໃຫ້ໄປລວງດຽວກັນຢ່າງກົມກຽວ. ຜ່ານການຈັດຕັ້ງປະຕິບັດມີຂໍ້ສະດວກ, ຫຍຸ້ງຍາກແນວໃດ ໃຫ້ລາຍງານກະຊວງກະສິກຳ ແລະ ປ່າໄມ້ ໄດ້ຮັບຊາບ ຢ່າງເປັນປົກກະຕິເພື່ອຫາວິທີແກ້ໄຂຢ່າງທັນຫານ.