ຊຸດຝຶກອົບຮົມທິດສະດີການເມືອງ-ການປົກຄອງ ໄລຍະສັ້ນ 45 ວັນ ຊຸດທີ XII ໃຫ້ແກ່ພະ ນັກງານຫລັກແຫລ່ງກະຊວງແຜນການ ແລະ ການລົງທຶນ, ໄດ້ໄຂຂຶ້ນໃນວັນທີ 3 ພຶດສະພານີ້, ທີ່ນະ ຄອນຫລວງວຽງຈັນ, ໂດຍການເຂົ້າຮ່ວມຂອງທ່ານນາງ ຄຳຈັນ ວົງແສນບຸນ ຮອງລັດຖະມົນຕີກະຊວງດັ່ງກ່າວ, ນັກສຳມະນາກອນທີ່ມາຈາກອ້ອມຂ້າງກະຊວງຫລາຍກວ່າ 40 ຄົນເຂົ້າຮ່ວມ.
ທ່ານຮອງລັດຖະມົນຕີ ກ່າວວ່າ: ການອົບຮົມດັ່ງກ່າວ ກໍເພື່ອແນໃສ່ຍົກລະດັບຄວາມຮູ້, ຄວາມສາມາດ ໃນດ້ານທິດສະດີການເມືອງ, ການຊີ້ນຳ-ນໍາພາ ແລະ ການຄຸ້ມຄອງລັດໃຫ້ໄປຕາມທິດຊີ້ນຳ ແລະ ສອດຄ່ອງກັບແນວທາງນະໂຍບາຍຂອງພັກ ແລະ ລັດ, ເຊິ່ງຜູ້ເຂົ້າຮ່ວມຝຶກອົບຮົມ ຈະໄດ້ຮຽນຮູ້ຫລັກມູນພື້ນຖານຂອງທິດສະດີມາກ-ເລນິນ, ແນວທາງນະໂຍບາຍຂອງພັກ, ວຽກບໍລິຫານການປົກຄອງ ແລະ
ກົດໝາຍພື້ນຖານຈຳນວນໜຶ່ງ ເພື່ອແນໃສ່ເຮັດໃຫ້ສຳມະນາກອນ ກຳແໜ້ນສະພາບຄວາມເປັນຈິງທາງດ້ານເສດຖະກິດ-ສັງຄົມຂອງປະເທດ ແລະ ຮັບຮູ້ເຊື່ອມຊຶມແນວທາງປ່ຽນແປງໃໝ່ຂອງພັກຢ່າງເປັນລະບົບ ເພື່ອນຳໄປໝູນໃຊ້ເຂົ້າໃນວຽກງານຕົວຈິງຢ່າງມີຫລັກການ ແລະ ຖືກຕ້ອງ, ທັງເປັນການປຸກລະດົມການພັດທະນາເສດຖະກິດ-ສັງຄົມໃຫ້ມີປະສິດທິຜົນດີຂຶ້ນ. ດັ່ງນັ້ນ ຈຶ່ງຮຽກຮ້ອງໃຫ້ນັກສຳມະນາກອນ ເອົາໃຈໃສ່ຄົ້ນຄວ້າຮ່ຳຮຽນ, ປະກອບຄຳຄິດເຫັນ, ຍາດແຍ່ງເອົາບົດຮຽນນຳຄູອາຈານ ເພື່ອຝຶກຝົນຫລໍ່ຫລອມຕົນເອງໃຫ້ກາຍເປັນຜູ້ທີ່ມີຄຸນສົມບັດສິນທຳປະຕິວັດ ເປັນພະນັກງານຫລັກແຫລ່ງ ແລະ
ເປັນຜູ້ສືບທອດ ທີ່ດີຂອງພັກ
ເພື່ອເຮັດສຳເລັດທຸກໜ້າທີ່ວຽກງານທີ່ຂັ້ນເທິງມອບໝາຍໃຫ້.
No comments:
Post a Comment