ປະທານາທິບໍດີ ສ.ມຽນມາ ຢ້ຽມຢາມລາວ

     ຕອບສະໜອງຕາມການເຊີນຂອງທ່ານ ບຸນຍັງ ວໍລະຈິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ທ່ານ ອູຕິນຈໍ ປະທານາທິບໍດີ ແຫ່ງ ສາທາລະນະລັດສະຫະພາບມຽນມາ ໄດ້ດຳເນີນການຢ້ຽມຢາມທາງລັດຖະກິດ ສປປ ລາວ ໃນວັນທີ 6 ພຶດສະພານີ້.

ຊີວະປະຫວັດຫຍໍ້ຂອງທ່ານປະທານາທິບໍດີ ອູຕິນຈໍ

          ທ່ານ ອູຕິນຈໍ ເກີດເມື່ອວັນທີ 20 ກໍລະກົດ 1946 ທີ່ນະຄອນຢາງກຸ້ງ, ເປັນລູກຄົນທີສອງຂອງທ່ານ ວູນ ແລະ ນາງ ຈີຈີ, ທ່ານ ວູນ ເປັນນັກຄົ້ນຄວ້າ ແລະ ນັກກະວີທີ່ມີຊື່ສຽງທີ່ຮູ້ຈັກກັນດີໃນນາມປາກກາ ມິນຕູວູນ. ທ່ານ ອູຕິນຈໍ ໄດ້ສ້າງຄອບຄົວກັບນາງ ສຸສຸລິນ ສະມາຊິກສະພາປະຊາຊົນ/ສະພາຕໍ່າ (Pyith Hluttaw) ເຂດເລືອກຕັ້ງຕົງວະ ແລະ ອະດີດປະທານຄະນະກຳມະການພົວພັນສາກົນຂອງສະພາຕໍ່າ ແລະ ຄະນະກຳມະການລັດຖະສະພາສາກົນອາຊຽນ (AIPA) ຂອງລັດຖະສະພາມຽນມາ.

            ທ່ານໄດ້ເຂົ້າຮຽນທີ່ໂຮງຮຽນມັດທະຍົມປາຍພາສາອັງກິດ ເມໂທດິດ ແລະ ໄດ້ເຂົ້າມະຫາວິທະ ຍາໄລ ໃນປີ 1962 ທ່ານໄດ້ຈົບການສຶກສາໃນຂະແໜງສິລະປະກຳສາດສາກົນ (ລະດັບ A) ຈາກມະຫາວິທະຍາໄລສິລະປະກຳສາດ ແລະ ວິທະຍາສາດຢາງກຸ້ງ ໃນປີ 1963 ໃນຂະນະທີ່ພວມສຶກສາຕໍ່ໃນລະດັບປະລິນຍາໂທດ້ານເສດຖະສາດ (ຂະແໜງສະຖິຕິ) ທີ່ສະຖາບັນເສດຖະສາດໃນໄຕມາດທີ 2, ທ່ານໄດ້ເປັນອາຈານສອນຮັບເຊີນທີ່ສະຖາບັນດັ່ງກ່າວ.

     ໃນປີ 1970 ຕໍ່ມາ, ທ່ານໄດ້ເຂົ້າເຮັດວຽກທີ່ສູນຄອມພິວເຕີຂອງມະຫາວິທະຍາໄລຕ່າງໆ ໃນຕຳແໜ່ງນັກໂປກຣາມ ແລະ ນັກວິເຄາະຂໍ້ມູນ. ທ່ານໄດ້ສືບຕໍ່ສຶກສາທີ່ສະຖາບັນວິທະຍາສາດຄອມພິວເຕີ ມະຫາວິທະຍາໄລລອນດອນ ໃນລະຫວ່າງປີ 1971 ເຖິງ 1972. ພ້ອມນັ້ນ ຍັງໄດ້ສຶກສາຕໍ່ໃນຂະແໜງວິທະຍາສາດຄອມພິວເຕີທີ່ສູນເອເລັກໂຕຣນິກອາຊີ ໃນປີ 1974 ແລະ ໄດ້ສືບຕໍ່ຮໍ່າຮຽນໃນຂະແໜງວິທະຍາສາດຄອມພິວເຕີ ທີ່ມະຫາວິທະຍາໄລສິລະປະກຳສາດ ແລະ ວິທະຍາສາດຢາງກຸ້ງໃນເວລານັ້ນ ແລະ ຈົບການສຶກສາໃນລະດັບປະລິນຍາໂທ ສາຂາວິທະຍາສາດ ໃນປີ 1975.

     ຈາກນັ້ນ ໄດ້ເຂົ້າເຮັດວຽກໃນວິສາຫະກິດກ່ຽວກັບອຸດສາຫະກຳໜັກ ເຊິ່ງຂຶ້ນກັບກະຊວງອຸດ ສາຫະກຳ ໃນຕຳແໜ່ງຫົວໜ້າພະແນກ ໃນປີ 1975 ເຖິງ 1980 ທ່ານໄດ້ເຂົ້າເຮັດວຽກຢູ່ກົມພົວພັນເສດຖະກິດຕ່າງປະເທດກະຊວງແຜນການ ແລະ ການເງິນ ໃນປີ 1980 ແລະ ໄດ້ເປັນຮອງຫົວໜ້າກົມ. ໃນໄລຍະນັ້ນ ທ່ານໄດ້ສືບຕໍ່ສຶກສາທີ່ມະຫາວິທະຍາໄລການບໍລິຫານນອດເຕີດີ (The Arthur D. Little School of Management) ທີ່ເມືອງເຄມບຣິດ ລັດແມດເຊຈູເຊັດ ໃນປີ 1987 ແລະ ໃນປີ 1992 ແລະ ໄດ້ລາອອກຈາກການເຮັດວຽກນຳລັດຖະບານ.

             ຫລັງຈາກນັ້ນ ທ່ານໄດ້ເປັນຜູ້ປະສານງານໃຫ້ທ່ານນາງ ອອງຊານ ຊູຈີ ໂດຍເປັນຜູ້ຮັບຜິດ ຊອບວຽກງານພົວພັນຕ່າງປະເທດ ແລະ ເປັນຜູ້ຕາງໜ້າສ່ວນຕົວຂອງທ່ານນາງ ອອງຊານ ໃນບັນ ຫາທາງລັດຖະການໃດໜຶ່ງຕາມການມອບໝາຍ.

          ເລີ່ມແຕ່ປີ 2012 ເປັນຕົ້ນມາ, ທ່ານໄດ້ເຮັດວຽກເປັນສະມາຊິກຄະນະກຳມະການຝ່າຍບໍລິ ຫານຂອງມູນນິທິນາງ ຄິນຈີ ເຊິ່ງເປັນອົງການການກຸສົນທີ່ຕັ້ງຊື່ຕາມຊື່ແມ່ຜູ້ທີ່ລ່ວງລັບໄປແລ້ວຂອງທ່ານນາງ ອອງຊານ ຊູຈີ ຫົວໜ້າພັກສັນນິບາດແຫ່ງຊາດເພື່ອປະຊາທິປະໄຕ, ທ່ານໄດ້ຮັບການເລືອກຕັ້ງໃຫ້ດຳລົງຕຳແໜ່ງເປັນປະທານາທິບໍດີ ແຫ່ງ ສາທາລະນະລັດ ສະຫະພັນມຽນມາ ໂດຍລັດຖະສະ ພາ ແລະ ໄດ້ເຂົ້າເຮັດວຽກທີ່ສຳນັກງານປະທານປະເທດ ໃນວັນທີ 30 ມີນາ 2016. ທ່ານ ອູຕິນຈໍ ຍັງເປັນນັກຂຽນພາຍໃຕ້ນາມປາກກາ “Dala Ban” ແລະ ມີຜົນງານການປະພັນທີ່ມີຊື່ສຽງ ລວມມີປຶ້ມທີ່ມີຊື່ວ່າ “Ahba-My Father and Vignettes of His Life” ເຊິ່ງເປັນປຶ້ມທີ່ອຸທິດເຖິງຊີວິດຂອງບິດາຂອງພະນະທ່ານ ທີ່ເປັນນັກຄົ້ນຄວ້າດ້ານພາສາສາດ ແລະ ນັກກະວີທີ່ມີຊື່ສຽງຂອງມຽນມາ ເຊິ່ງຮູ້ຈັກກັນໃນນາມປາກກາ ມິນ ຕູ ວູນ (Min Thu Wun).