ທ່ານ ພົງໄຊສັກ ອິນຖາລາດ ຫົວໜ້າກົມຄຸ້ມຄອງແຮງງານ ກະຊວງແຮງງານ ແລະ ສະ ຫວັດດີການສັງຄົມ ໃຫ້ສຳພາດເມື່ອບໍ່ດົນມານີ້ວ່າ: ໄລຍະຜ່ານມາ, ການປົກປ້ອງແຮງງານຢູ່ລາວເຮົາ ກໍໄດ້ຮັບການເອົາໃຈໃສ່ ແລະ ມີການປັບປຸງດີຂຶ້ນ ເພື່ອໃຫ້ສອດຄ່ອງກັບລະບຽບກົດໝາຍວ່າດ້ວຍແຮງງານ, ດ້ວຍລະບົບການຮ່ວມມືສາມຝ່າຍຄື:
ລັດຖະບານ, ຜູ້ອອກແຮງງານ ແລະ ຜູ້ໃຊ້ແຮງງານ,ຄ່າແຮງງານຂັ້ນຕ່ຳ ໄດ້ຮັບການປັບປຸງໃຫ້ສອດຄ່ອງກັບລະດັບຄ່າຄອງຊີບຂັ້ນພື້ນຖານ ຈາກ
626.000 ກີບ/ເດືອນ ມາເປັນ 900.000 ກີບ/ເດືອນ ແລະ ໄດ້ເອົາໃຈໃສ່ກວດກາການຈັດຕັ້ງປະຕິ ບັດກົດໝາຍວ່າດ້ວຍແຮງງານຢູ່ໃນຫົວໜ່ວຍແຮງງານຕ່າງໆ 6.580 ກວ່າແຫ່ງ, ລົງໂຄສະນາເຜີຍແຜ່ກົດໝາຍວ່າດ້ວຍແຮງງານ ແລະ ບັນດານິຕິກຳກ່ຽວກັບສິດ, ພັນທະ, ໜ້າທີ່, ຄວາມປອດໄພ
ແລະ ສຸຂະພາບແຮງງານຫົວໜ່ວຍແຮງງານຕ່າງໆເກືອບ 1 ພັນແຫ່ງ, ຂໍ້
ຂັດແຍ່ງທາງດ້ານແຮງງານໄດ້ຮັບການແກ້ໄຂຫລາຍກໍລະນີເຮັດໃຫ້ສິດ ແລະ ຜົນປະໂຫຍດຂອງຜູ້ອອກແຮງງານ ແລະ ຜູ້ໃຊ້ແຮງງານໄດ້ຮັບການປົກປ້ອງຕາມລະບຽບກົດໝາຍ, ແຜນງານແຫ່ງຊາດວ່າດ້ວຍການປົກປ້ອງ ແລະ ລົບລ້າງການນຳໃຊ້ແຮງງານເດັກ, ໄດ້ຮັບການຈັດຕັ້ງປະຕິບັດຢ່າງກວ້າງຂວາງ ເປັນຕົ້ນ ແມ່ນການປະຕິບັດໂຄງການກອງທຶນສະກັດກັ້ນການໄປອອກແຮງງານຢູ່ປະເທດໃກ້ຄຽງແບບຜິດກົດໝາຍ, ໂດຍສະເພາະແມ່ນແມ່ຍິງ ແລະ ເດັກນ້ອຍຢູ່ບັນດາແຂວງຕ່າງໆ, ມາຮອດປັດຈຸບັນທົ່ວປະເທດມີແຮງງານທີ່ມີວຽກເຮັດງານທຳ (ແຮງງານໃນລະ ບົບ)
551.254 ຄົນ, ໃນນັ້ນ ເປັນລັດຖະກອນ 161.527 ຄົນ,
ແຮງງານວິສາຫະກິດ 389.727 ຄົນ,
ຊຶ່ງປະກອບມີຫົວໜ່ວຍແຮງງານທັງໝົດ 45.527 ແຫ່ງໃນທົ່ວປະເທດ.
ທ່ານ
ພົງໄຊສັກ ກ່າວວ່າ: ແຕ່ຄຽງຄູ່ກັນນີ້ ຍັງມີຫລາຍບັນຫາ ແລະ ສິ່ງທ້າທາຍຕ່າງໆ ທີ່ຈະຕ້ອງຮີບຮ້ອນແກ້ໄຂ
ເປັນຕົ້ນ ການປົກປ້ອງສິດ, ຜົນປະໂຫຍດຂອງຜູ້ອອກແຮງງານ ແລະ ຜູ້ໃຊ້ແຮງງານຕາມລະບຽບກົດໝາຍວ່າດ້ວຍແຮງງານຍັງບໍ່ທັນເຂັ້ມງວດເທົ່າທີ່ຄວນ ເຮັດໃຫ້ເກີດມີຊ່ອງຫວ່າງ ແລະ ມີປະກົດການຫຍໍ້ທໍ້ເອົາລັດ-ເອົາປຽບກັນ ລະຫວ່າງຜູ້ອອກແຮງງານ ແລະ ຜູ້ໃຊ້ແຮງງານ, ການປະສານງານ ແລະ ວິທີເຮັດວຽກຂອງອົງການສາມຝ່າຍຍັງບໍ່ທັນເຂັ້ມແຂງເທົ່າທີ່ຄວນ ແລະ ເພື່ອເປັນການແກ້ໄຂບັນຫາທີ່ຍັງຄົງຄ້າງດັ່ງກ່າວ, ພາກສ່ວນກ່ຽວຂ້ອງ ກໍຄືກົມຄຸ້ມຄອງແຮງງານ ກະຊວງແຮງງານ ແລະ ສະຫວັດດີການສັງຄົມ ຈະຕ້ອງສືບຕໍ່ຈັດຕັ້ງປະຕິບັດໜ້າທີ່ການເມືອງຂອງຕົນເຊັ່ນ: ເອົາໃຈໃສ່ປົກປ້ອງສິດ ແລະ ຜົນປະໂຫຍດຂອງຜູ້ໃຊ້ແຮງງານ ແລະ ຜູ້ອອກແຮງງານຕາມລະບຽບກົດໝາຍວ່າດ້ວຍແຮງງານ ແລະ ລຶບລ້າງການນຳໃຊ້ແຮງງານເດັກໃຫ້ໄດ້ໂດຍພື້ນຖານ.
No comments:
Post a Comment