ພິທີລົງນາມສັນຍາຊ່ວຍເຫລືອລ້າ ໃນມູນຄ່າ 24 ລ້ານໂດລາສະຫະລັດ, ລະຫວ່າງທ່ານນາງ ທິບພະກອນ ຈັນທະວົງສາ ຮອງລັດຖະມົນຕີກະຊວງການເງິນ ແລະ ທ່ານນາງ ໂຮແນະ ກິມ
ຫົວໜ້າພະແນກອາຊີ ແລະ ປາຊີຟິກຂອງ IFAD ໄດ້ມີຂຶ້ນໃນວັນທີ 28 ເມສາຜ່ານມານີ້, ທີ່ນະຄອນຫລວງວຽງຈັນ ເພື່ອສະໜັບສະໜູນຍຸດທະສາດການຫລຸດຜ່ອນຄວາມທຸກຍາກຢູ່ລາວ, ປັບປຸງການຄ້ຳປະກັນສະບຽງອາຫານ ກໍຄືໂພຊະນາການຂອງປະຊາຊົນຜູ້ທຸກຍາກ ແລະ ຊາວກະສິກອນທີ່ປະສົບກັບບັນຫາການຜະລິດບໍ່ໄດ້ຕາມຄາດໝາຍ, ຜູ້ມີລາຍຮັບຕ່ຳບໍ່ກຸ້ມກິນຂາດໂພຊະນາການ ໂດຍສະເພາະແມ່ນແມ່ ຍິງ ແລະ ເດັກນ້ອຍອາຍຸຕ່ຳກວ່າ 5 ປີ.
ນອກນີ້ ໂຄງການດັ່ງກ່າວ ຍັງຈະຊ່ວຍສ້າງຄວາມເຂັ້ມແຂງໃຫ້ແກ່ພະນັກງານ ແລະ ບັນດາສະຖາບັນຂອງພາກສ່ວນກ່ຽວຂ້ອງເພື່ອຜັນຂະຫຍາຍຍຸດທະສາດການຄ້ຳປະກັນ
ສະບຽງອາຫານແຫ່ງຊາດ ແລະ ແນະນຳການຈັດຕັ້ງປະຕິບັດໃຫ້ຊຸມຊົມ, ສະໜັບສະໜູນຊຸມຊົນເຂົ້າຮ່ວມໃນວຽກງານການຄ້ຳປະກັນສະບຽງອາຫານ, ໂດຍການປັບປຸງວິທີການຜະລິດກະສິກຳ ແລະ ຮັບປະກັນດ້ານໂພຊະນາການ ແລະ ສ້າງມູນຄ່າເພີ່ມໃຫ້ຜົນຜະລິດກະສິກຳ ແລະ ການເຂົ້າເຖິງຕະຫລາດ.
ເມື່ອໂຄງການດັ່ງກ່າວສຳເລັດຈະຊ່ວຍໃຫ້ລັດຖະບານລາວບັນລຸການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII
(2016-2020), ພ້ອມທັງ ຮັບປະກັນຄວາມໝັ້ນຄົງທາງດ້ານສະບຽງອາຫານ ແລະ ການບໍລິໂພກ,
ເຊິ່ງເປັນໜ້າທີ່ສຳຄັນຂອງການພັດທະນາທີ່ເອົາໃຈໃສ່ການຍົກລະດັບສະມັດຕະພາບຂອງການຜະລິດ, ສຸຂະພາບຂອງປະຊາຊົນທາງດ້ານຮ່າງກາຍ, ຈິດໃຈ
ແລະ ມັນສະໝອງຂອງໄວໜຸ່ມອີກດ້ວຍ.
No comments:
Post a Comment