ກອງປະຊຸມສຸດຍອດແມ່ນໍ້າຂອງ-ຍີ່ປຸ່ນຄັ້ງທີ 8

          ໃນວັນທີ 7 ກັນຍາ 2016, ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມສຸດຍອດແມ່ນ້ຳຂອງ-ຍີ່ປຸ່ນ ຄັ້ງທີ 8 ທີ່ນະຄອນ ຫລວງວຽງຈັນ ໂດຍການເປັນປະທານຮ່ວມຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຊິນໂຊ ອາເບະ ນາຍົກລັດຖະມົນຕີ ຍີ່ປຸ່ນ, ມີບັນດາຜູ້ນຳຈາກປະເທດແມ່ນ້ຳຂອງ ຄື: ກຳປູເຈຍ, ສປປ ລາວ, ມຽນມາ, ໄທ ແລະ ສສ.ຫວຽດນາມ ເຂົ້າຮ່ວມຢ່າງພ້ອມພຽງ.

          ກອງປະຊຸມໄດ້ຕີລາຄາສູງ ຕໍ່ຄວາມຄືບໜ້າຂອງການຈັດຕັ້ງປະຕິບັດ “ແຜນປະຕິບັດງານແມ່ນ້ຳຂອງ-ຍີ່ປຸ່ນ ເພື່ອຜັນຂະຫຍາຍແຜນຍຸດທະສາດໂຕກຽວ 2015 (ສະບັບປັບປຸງໃໝ່)” ແລະ ວິໄສທັດການພັດທະນາອຸດສາຫະກໍາ ແມ່ນໍ້າຂອງ-ຍີ່ປຸ່ນ ແລະ ສະແດງຄວາມຊົມເຊີຍ ລັດຖະບານຍີ່ປຸ່ນ ທີ່ໄດ້ມີຄວາມ

ພະຍາຍາມສຸມໃສ່ ການຊ່ວຍເຫລືອ ເພື່ອພັດທະນາພື້ນຖານໂຄງລ່າງ ອຸດສາຫະກຳພາກພື້ນແມ່ນ້ຳຂອງ, ໂດຍສະເພາະ ໃນໄລຍະເກືອບໜຶ່ງປີຜ່ານມານີ້, ຝ່າຍຍີ່ປຸ່ນໄດ້ນໍາໃຊ້ທຶນຮອນ ຫລາຍກວ່າໜຶ່ງສ່ວນສາມ ຂອງງົບປະມານທັງໝົດ (750 ຕື້ເຢັນ) ທີ່ຝ່າຍຍີ່ປຸ່ນໄດ້ປະກາດໃຫ້ການຊ່ວຍເຫລືອທາງການ ເພື່ອການພັດທະນາ ເຂົ້າໃນການຈັດຕັ້ງປະຕິບັດໂຄງການຕ່າງໆ ຂອງແຜນຍຸດທະສາດໂຕກຽວ 2015; ສຳລັບ ສປປ ລາວ ກໍໄດ້ຈັດພິທີວາງສີລາລຶກ ແລະ ດຳເນີນການຈັດຕັ້ງປະຕິບັດໂຄງການ ຂະຫຍາຍອາຄານຜູ້ໂດຍສານສະໜາມບິນສາກົນວັດໄຕ, ໂຄງການພັດທະນາສາຍສົ່ງໄຟຟ້າຢູ່ພາກໃຕ້ ຂອງ ສປປ ລາວ, ໂຄງການປັບປຸງເສັ້ນທາງຫລວງແຫ່ງຊາດ ເລກທີ 9 ແລະ ໂຄງການເຂດພັດທະນາເຂດອຸດສາຫະກຳວຽງຈັນ, ເຊິ່ງໂຄງການດັ່ງກ່າວນີ້ ໄດ້ປະກອບສ່ວນສໍາຄັນ ເຂົ້າໃນການພັດທະນາພື້ນຖານໂຄ່ງລ່າງອຸດສາຫະກຳ ແລະ ການເຊື່ອມຈອດ ລະຫວ່າງ ບັນດາປະເທດແມ່ນ້ຳຂອງ ກໍຄືການເຊື່ອມຈອດພາກພື້ນ ແລະ ອາຊຽນ.

ສຳລັບການຮ່ວມມືລະຫວ່າງພາກລັດ ແລະ ພາກເອກະຊົນ ແມ່ນ້ຳຂອງ-ຍີ່ປຸ່ນ ໃນໄລຍະ 3 ປີຜ່ານມານີ້ ໄດ້ມີບໍລິສັດຍີ່ປຸ່ນ ປະມານໜຶ່ງພັນບໍລິສັດ ເຂົ້າມາສ້າງຕັ້ງທຸລະກິດຂອງຕົນ ຢູ່ບັນດາປະເທດແມ່ນ້ຳຂອງ ໃນປີທີ່ຜ່ານມາ ກໍໄດ້ມີການສ້າງຕັ້ງເຂດເສດຖະກິດພິເສດ “ປາກເຊ-ຍີ່ປຸ່ນ”, ວິສາຫະກິດຂະໜາດນ້ອຍ ແລະ ຂະໜາດກາງ; ເຊິ່ງທັງໝົດນີ້ ໄດ້ປະກອບສ່ວນສ້າງວຽກເຮັດງານທຳ ໃຫ້ແກ່ປະຊາ ຊົນ ຢູ່ພາກພື້ນແມ່ນ້ຳຂອງໄດ້ເປັນຈຳນວນຫລາຍ.

          ພ້ອມດຽວກັນນີ້, ກອງປະຊຸມຍັງໄດ້ປຶກສາຫາລືກ່ຽວກັບ ທິດທາງໃນຕໍ່ໜ້າ ຂອງຂອບການຮ່ວມມື ແມ່ນ້ຳຂອງ-ຍີ່ປຸ່ນ, ໂດຍສຸມໃສ່ ການຮ່ວມມືໃນຂະແໜງການບູລິມະສິດຕ່າງໆ ຄື: ການພັດທະນາພາກພື້ນແມ່ນ້ຳຂອງ ຕາມທິດຮອບດ້ານ, ສົມດຸນ ແລະ ຍືນຍົງ, ຄວາມໝັ້ນຄົງຂອງມະນຸດ ແລະ ແມ່ນ້ຳຂອງສີຂຽວ, ໂດຍສະເພາະຝ່າຍຍີ່ປຸ່ນ ຈະສືບຕໍ່ໃຫ້ການຊ່ວຍເຫລືອ ໃນການພັດທະນາແລວເສດຖະກິດຕ່າງໆ ຂອງອານຸພາກພື້ນແມ່ນ້ຳຂອງພາກໃຕ້ “ຂໍ້ລິເລີ່ມການເຊື່ອມຈອດພາກພື້ນແມ່ນ້ຳຂອງ” ລວມທັງສຶກສາໂຄງການເຊື່ອມຕໍ່ວຽງຈັນ-ຮ່າໂນ້ຍ ເພື່ອພັດທະນາເປັນເສັ້ນທາງຫລວງ ແລະ ເສັ້ນທາງດ່ວນໃນອານາຄົດ; ກອງປະຊຸມສຸດຍອດແມ່ນ້ຳຂອງ-ຍີ່ປຸ່ນ ຄັ້ງທີ 9 ຈະຂັດຂຶ້ນໃນປີ 2017 ທີ່ປະເທດຟີລິບປິນ.