ລາວ ແລະ ສປຊ ເປັນຄູ່ຮ່ວມມືໃໝ່ເພື່ອການພັດທະນາແບບຍືນຍົງ

          ໃນວັນທີ 7 ກັນຍາ 2016, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງ ປະເທດ ແລະ ທ່ານນາງ ຄາຣິນາ ອິມໂມເນັນ ຜູ້ປະສານງານອົງການສະຫະປະຊາຊາດປະຈຳ ສປປ ລາວ ໄດ້ລົງນາມໃນຂອບການຮ່ວມມື 5 ປີຕໍ່ໜ້າ ເພື່ອການພັດທະນາ ລະຫວ່າງ ອົງການສະຫະປະ ຊາຊາດ ແລະ ລັດຖະບານແຫ່ງສປປ ລາວ ໂດຍຊ້ອງໜ້າ ທ່ານ ບັນກີມູນ ເລຂາທິການໃຫຍ່ແຫ່ງອົງການສະຫະປະຊາຊາດ ແລະ ທ່ານ ສົມດີ ດວງດີ ຮອງນາຍົກລັດຖະມົນຕີແຫ່ງ ສປປ ລາວ.

          ໃນຂອບການຮ່ວມມືລະຫວ່າງ ສປປ ລາວ ແລະ ອົງການສະຫະປະຊາຊາດ ໄລຍະປີ 2017-2021 ສະແດງເຖິງເຈດຈຳນົງຂອງອົງການສະຫະປະຊາຊາດ ໃນການສະໜັບສະໜູນການຈັດຕັ້ງປະຕິບັດ ແຜນພັດທະນາທີ່ເປັນບູລິມະສິດຂອງລັດຖະບານ ແລະ ຄວາມຫວັງຂອງລັດຖະບານໃນການນຳພາປະເທດ ຫລຸດພົ້ນອອກຈາກສະຖານະພາບປະເທດດ້ອຍພັດທະນາ ແລະ ສະໜອງການບໍລິການທີ່ມີຄຸນນະພາບໃຫ້ແກ່ພົນລະເມືອງທຸກຊັ້ນຄົນ.

          ໂອກາດນີ້, ທ່ານ ສົມດີ ດວງດີ ຮອງນາຍົກລັດຖະມົນຕີ ແລະ ລັດຖະມົນຕີກະຊວງການເງິນໄດ້ຍົກໃຫ້ເຫັນວ່າ: ຂອບການຮ່ວມມືໃໝ່ນີ້ ສອດຄ່ອງກັບບູລິມະສິດ ແລະ ຍຸດທະສາດການພັດທະນາແຫ່ງຊາດ ຈະສົ່ງເສີມ ແລະ ປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງ ຄົມແຫ່ງຊາດ ຄັ້ງທີ 8 (2016-2020) ໃຫ້ປະສົບຜົນສໍາເລັດ ເພື່ອເປັນພື້ນຖານໃນການກ້າວໄປສູ່ການຫລຸດພົ້ນຈາກສະຖານະພາບປະເທດດ້ອຍພັດທະນາ, ຍຸດທະສາດແຫ່ງຊາດ ວ່າດ້ວຍການພັດທະ ນາເສດຖະກິດ-ສັງຄົມ ປີ 2025 ແລະ ວິໄສທັດ ປີ 2030 ພ້ອມກັບເປົ້າໝາຍການພັດທະນາແບບຍືນຍົງ.

            ຂອບການຮ່ວມມືດັ່ງກ່າວ, ຍັງລວມເອົາບັນດາຄຳໝັ້ນສັນຍາຂອງ ສປປ ລາວ ຕໍ່ສາກົນ ລວມເຖິງຄຳໝັ້ນສັນຍາທີ່ກ່ຽວຂ້ອງກັບສິດທິມະນຸດ ແລະ ປະສິດທິພາບຂອງການພັດທະນາ ເຊິ່ງຄາດຄະ ເນຈະນຳໃຊ້ງົບປະມານເຖິງ 80 ລ້ານໂດລາສະຫະລັດຕໍ່ປີໃນໄລຍະປີ 2017-2021.