ຫຼາຍທ້ອງຖິ່ນເລີ່ມເກັບກ່ຽວເຂົ້ານາປີແລ້ວ

           ກົມປູກຝັງ,ກະຊວງກະສິກຳ ແລະ ປ່າໄມ້ໃຫ້ຮູ້ວ່າ: ປັດຈຸບັນກະສິກອນຫຼາຍທ້ງອຖິ່ນໃນທົ່ວປະເທດໄດ້ເລີ່ມເກັບກ່ຽວມ້ຽນມັດເຂົ້ານາປີຂອງຕົນສຳເລັດແລ້ວຫຼາຍກວ່າ 360 ພັນເຮັກຕາ,ເທົ່າກັບ 47% ຂອງເນື້ອທີ່ປັກດຳທັງໝົດ 770 ພັນເຮັກຕາ, ໃນນັ້ນບັນດາແຂວງພາກກາງປະຕິບັດໄດ້ຫຼາຍກວ່າ 2 ແສນເຮັກຕາ, ເທົ່າກັບ 46%, ພາກໃຕ້ 113 ພັນກວ່າເຮັກຕາ, ເທົ່າກັບ 51% ແລະ ພາກ ເໜືອປະຕິບັດໄດ້ແລ້ວຫຼາຍກວ່າ 45 ພັນເຮັກຕາເທົ່າກັບ 43%, ຊຶ່ງຄາດວ່າຮອດກາງເດືອນທັນວານີ້ທົ່ວປະເທດຈະສາມາດເກັບກ່ຽວສຳເລັດ 100%  ແລະ ຄາດວ່າຜົນຜະລິດຈະສາມາດບັນລຸໄດ້ຕາມຄາດໝາຍແຜນການ

3,4 ລ້ານໂຕນ, ແລະ ກໍເພື່ອບັນລຸຜົນ ຂະແໜງກະສິກຳເອງກໍໄດ້ສົ່ງພະນັກງານວິຊາການຂອງຕົນລົງຊຸກຍູ້ການເກັບກ່ຽວ ຢູ່ແຕ່ລະທ້ອງຖິ່ນເພື່ອແນະນຳວິທີການ ມ້ຽນມັດຮັກສາເຂົ້າແນວພັນໃຫ້ຖືກວີທິ, ສ່ວນການປູກພືດລະດູຝົນປີນີ້ທົ່ວປະເທດສາມາດປະຕິບັດໄດ້ຫຼາຍກວ່າ 80%  ຂອງຄາດໝາຍວ່າງໄວ້ໂດຍສະເພາະແມ່ນພືດໄລຍະສັ້ນປູກໄດ້ຫຼາຍຮອບວຽນ, ສາມາດຕອບສະໜອງຄວາມຕ້ອງການຂອງຕະຫຼາດພາຍໃນໄດ້ເປັນຢ່າງງດີ.

          ກະຊວງກະສິກຳໃຫ້ຮູ້ອີກວ່າ: ນອກຈາກຂະບວນການເກັບກ່ຽສເຂົ້ານາປີແລ້ວປັດຈຸບັນບາງຖິ່ນກໍໄດ້ເລີ່ມກະກຽມໃຫ້ແກ່ການປູກເຂົ້ານາແຊງ ແລະ ພືດລະດູແລ້ງຂອງຕົນແລ້ວເພື່ອທ່ວງທັນລະດູການ, ຂະນະທີ່ຂະແໜງກະສິກຳກໍໄດ້ລົງຊຸກຍູ້ການປົວແປງລະບົບ ຊົນລະປະທານ ແລະ ຄອງເໝືອງທີ່ໄດ້ຮັບຜົນກະທົບຈາກໄພທຳ ມະຊາດໃນຜ່ານມາເພື່ອກຽມພ້ອມສະໜອງນ້ຳໃຫ້ແກ່ການຜະລິດລະດູ ແລ້ງ 2016 ໃຫ້ໄດ້ຮັບຜົນດີ.