ລາວບໍ່ພົບກໍລະນີເປ້ຍລ່ອຍເກີດຂຶ້ນໃໝ່

            ພາຍຫລັງມີພະຍາດໂປລີໂອເກີດຂຶ້ນຢູ່ບາງທ້ອງຖິ່ນໃນ ສປປ ລາວ ເມື່ອເດືອນຕຸລາ 2015 ຜ່ານມາ, ປັດຈຸບັນການລະບາດດັ່ງກ່າວແມ່ນຄວບຄຸມໄດ້ແລ້ວຍ້ອນບໍ່ພົບເຫັນກໍລະນີເປ້ຍລ່ອຍເກີດຂຶ້ນໃໝ່.

             ທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ຊີ້ແຈງໃນກອງປະຊຸມຕອບໂຕ້ການລະບາດພະຍາດໂປລີໂອ, ການຢອດຢາວິຕາມິນອາ ແລະ ຢາຂ້າແມ່ທ້ອງໃຫ້ເດັກອາຍຸລຸ່ມ 5 ປີໃນວັນທີ 3 ພະຈິກນີ້ວ່າ: ຫລັງຈາກມີການລະບາດຂອງພະຍາດດັ່ງກ່າວ, ຂະແໜງສາທາລະນະສຸກ,

ສຶກສາທິການ ແລະ ກິລາ, ຕະຫລອດຮອດພໍ່ແມ່ປະຊາຊົນບັນດາເຜົ່າ, ຜູ້ປົກຄອງເດັກ ແລະ ຄູ່ຮ່ວມພັດທະນາ ເປັນຕົ້ນ: ອົງການອະນາໄມໂລກ, ອຸຍນິເຊັບ, US-CDC, Rotarian International of Japan, JICA, KOFIH ແລະ ອື່ນໆ ໄດ້ພ້ອມກັນຈັດບັ້ນສັກຢາ-ຢອດຢາກັນພະຍາດແຫ່ງຊາດ (ວສຊ) ໂດຍໄດ້ເລີ່ມຕົ້ນໃນເດືອນຕຸລາ 2015 ຜ່ານມາຮອດປັດຈຸບັນລວມທັງໝົດ 8 ຮອບ, ໃນນັ້ນ ຮອບທີ 1, 2 ແມ່ນຈັດຢູ່ 3 ແຂວງຄື: ໄຊສົມບູນ, ບໍລິຄຳໄຊ ແລະ ຊຽງຂວາງ, ແຕ່ຮອບທີ 3 ເປັນຕົ້ນມາໄດ້ຈັດຂຶ້ນໃນທຸກໆແຂວງທົ່ວປະເທດ, ສາມາດຢອດວັກແຊງກັນໂປລີໂອໃຫ້ລູກຫລານອາຍຸລຸ່ມ 15 ປີ ແລະ ມີ 67 ເມືອງແມ່ນໄດ້ຢອດໃຫ້ປະຊາຊົນທຸກໆກຸ່ມອາຍຸລວມທັງຜູ້ທີ່ໄດ້ຮັບການຢອດຢາໃນຂະບວນການ ວສຊ ທຸກຮອບຜ່ານມາແມ່ນໄດ້ 13 ລ້ານກວ່າເທື່ອຄົນ, ພ້ອມນີ້ຈະສືບຕໍ່ຈັດຂະບວນ ວສຊ ໄປຕື່ມອີກ 2 ຄັ້ງໃນລະຫວ່າງວັນທີ 20-30 ພະຈິກ 2016 ແລະ ທ້າຍເດືອນມັງກອນ 2017 ທີ່ຈະເຖິງນີ້. ທັງນີ້ກໍເພື່ອເຮັດໃຫ້ ສ ປປ ລາວ ປອດຈາກພະຍາດໂປລີໂອໃນປີ 2020.

            ວັນດຽວກັນ, ຜູ້ຕາງໜ້າອົງການອຸຍນິເຊັບໄດ້ມອບລົດກະບະຣີໂວຈຳນວນ 14 ຄັນໃຫ້ພະແນກສາທາລະນະສຸກ 14 ແຂວງ ແລະ ລຳໂພງ 600 ໜ່ວຍ, USB ຈຳນວນ 1 ພັນອັນໃຫ້ກະຊວງສາທາລະນະສຸກເພື່ອປະກອບສ່ວນເຂົ້າໃນການເຄື່ອນໄຫວວຽກງານງານດ້ານສາທາລະນະສຸກໃຫ້ໄດ້ຮັບຄວາມສະດວກສາມາດເຂົ້າເຖິງປະຊາຊົນບັນດາເຜົ່າທີ່ອາໄສຢູ່ເຂດຫ່າງໄກສອກຫລີກ, ເຮັດໃຫ້ເຂົາເຈົ້າໄດ້ຮັບຮູ້ຂໍ້ມູນຂ່າວສານໄດ້ຢ່າງທົ່ວເຖິງ.