ຮູ້ຈັກກັບນະໂຍບາຍດີໆຂອງຕ່າງປະເທດ

# ວິເສດ ສະແຫວງສຶກສາ

     ເມື່ອສຶກສາກ່ຽວກັບນະໂຍບາຍດີໆຂອງບາງປະເທດ ເພື່ອຄວາມຢູ່ດີກິນດີນັ້ນຄົງມີໜ້ອຍປະເທດຈະສາມາດແຂ່ງກັບປະເທດແຟງລັງໄດ້ ເພາະປະເທດນີ້ມີນະໂຍບາຍເບີກເງິນລ້າໆໃຫ້ປະຊາຊົນຄົນລະ 800 ເອີໂຣຕໍ່ເດືອນ. ນະໂຍບາຍແບບນີ້ຫລາຍຄົນຄົງຄິດວ່າເປັນພຽງຄວາມຝັນ ແຕ່ພັດເປັນ ຄວາມຈິງ. ໃນຕົ້ນເດືອນກຸມພາປີນີ້, ທາງການປະເທດແຟງລັງໄດ້ເລີ່ມຮ່າງແຜນເບີກເງິນທີ່ເປັນລາຍຮັບພື້ນຖານໃຫ້ປະຊາຊົນຂອງຕົນລ້າໆປະມານ 800 ເອີໂຣ/ຄົນ/ເດືອນ. ສະຖາບັນປະກັນໄພແຟງລັງທີ່ເປັນເຈົ້າການຮ່າງນະໂຍບາຍນີ້ໄດ້ເຮັດການສຳຫລວດຄຳເຫັນຂອງປະຊາຊົນ ເຊິ່ງຜົນອອກມາສະແດງໃຫ້ເຫັນວ່າ ຊາວແຟງລັງ 69% ມີຄຳເຫັນສະໜັບສະໜູນແຜນການນີ້. ແນວໃດກໍດີ ນະໂຍບາຍ

ເບີກເງິນໃຫ້ປະຊາຊົນໃຊ້ລ້າໆນີ້ຍັງຈະຕ້ອງໄດ້ຮັບການຕົກລົງຄັ້ງສຸດທ້າຍພາຍໃນເດືອນພະຈິກປີ 2016 ນີ້ ເພາະໃນການປະຕິບັດນະໂຍບາຍນີ້ແຟງລັງຕ້ອງຊິ້ນເປືອງງົບປະມານໄປເປັນຈຳ ນວນເງິນ ເຖິງ 52 ຕື້ເອີໂຣຕໍ່ປີ. ຂ່າວບອກວ່າ ເງິນ 800 ເອີໂຣທີ່ໄດ້ເຂົ້າຖົງລ້າໆນີ້ ຈະບໍ່ມີການຫັກພາສີເລີຍ. ຢູ່ມາເລເຊຍ, ຊາວອົບພະຍົບຈຳນວນ 150.000 ຄົນ ຈະມີສິດເຂົ້າເຖິງລະບົບປະກັນໄພດ້ານ  ສຸຂະ ພາບໃນບໍ່ຊ້ານີ້, ເມື່ອລັດຖະບານຂອງປະເທດນີ້ປະກາດການນຳໃຊ້ລະບົບປະກັນສຸຂະພາບທີ່ເອື້ອ  ອຳນວຍໃຫ້ຊາວອົບພະຍົບເຂົ້າເຖິງຢຸກຢາປິ່ນປົວພະຍາດ ໂດຍກຳນົດຄ່າປະກັນໄພຈຳນວນ 164,30 ຣິງກິດ (40 ໂດລາສະຫະລັດ) ຕໍ່ 1 ຄົນ/ປີ ສຳລັບການປິ່ນປົວທົ່ວໄປ ແລະ ຈຳນວນ 10.000 ຣິງກິດ ສຳລັບການປິ່ນປົວດ້ວຍການຜ່າຕັດ. ພໍຂ່າວນີ້ອອກມາໃນຕົ້ນເດືອນມິຖຸນາປີນີ້, ຜູ້ຕາງ   ໜ້າອົງການ ສປຊ ເພື່ອຊາວອົບພະຍົບຢູ່ມາເລເຊຍ ກໍໄດ້ມີຄຳເຫັນວ່າ ລະບົບປະກັນໄພສຸຂະພາບ   ເພື່ອຊາວອົບພະຍົບນີ້ແມ່ນນະໂຍບາຍທີ່ຖືກຕ້ອງ ແນໃສ່ແກ້ໄຂບັນຫາຫຍຸ້ງຍາກຂອງຊາວອົບພະຍົບໃນການເຂົ້າເຖິງຢຸກຢາປົວພະຍາດ. ລະບົບປະກັນສຸຂະພາບດັ່ງກ່າວຍັງຈະປະກອບສ່ວນຈຳກັດການລັກລອບອອກແຮງງານຢ່າງຜິດກົດໝາຍຂອງຜູ້ອົບພະຍົບທີ່ອາໄສຢູ່ມາເລເຊຍອີກດ້ວຍ. ບັດນີ້ລອງໄປເບິ່ງປະເທດກູບາຢູ່ຟາກຟ້າແດນໄກ ເຊິ່ງກຳລັງເປີດປະຕູສູ່ໂລກພາຍນອກ ພາຍໃຕ້ການຄຸ້ມຄອງດ້ວຍລະບຽບກົດໝາຍຄັກແນ່ ເພື່ອບໍ່ໃຫ້ແຮງງານພາຍໃນປະເທດກາຍເປັນເປົ້າຂູດຮີດຂອງເຫລົ່ານາຍທຶນທີ່ເຂົ້າໄປລົງທຶນຢູ່ປະເທດນີ້ນັບມື້ນັບຫລາຍ. ນັບແຕ່ທ້າຍປີ 2014, ທາງການກູບາໄດ້ອອກແຜນກຳນົດເງິນຄ່າແຮງງານທີ່ບໍລິສັດ ຫລື ໂຮງງານຂອງຕ່າງປະເທດຕ້ອງຈ່າຍໃຫ້ແຮງງານກູບາ ລວມທັງການໃຊ້ເງິນປະກັນດ້ານຕ່າງໆ. ເງິນເດືອນສະເລ່ຍໃນກູບາໃນປີ 2013 ແມ່ນ 471 ເປໂຊຕໍ່ຄົນ/ເດືອນ (ເທົ່າກັບ 19 ໂດລາສະຫະລັດ). ດັ່ງນັ້ນ ທາງການກູບາຈຶ່ງໄດ້ກຳນົດເງິນຄ່າຈ້າງທີ່ແຮງງານກູບາຄວນໄດ້ຮັບຈາກບໍລິສັດຈ້າງງານຕ່າງປະເທດບໍ່ໃຫ້ຫລຸດເງິນເດືອນສະເລ່ຍຂອງປະເທດ ລວມທັງຄົນກູບາທີ່ໄດ້ຮັບເງິນເດືອນຂັ້ນຕໍ່າສຸດ 225 ເປໂຊຕໍ່ເດືອນ/ຄົນ ອີກດ້ວຍ. ທາງການກູບາເຊື່ອວ່າການກຳນົດອັດຕາຄ່າຈ້າງງານດັ່ງກ່າວຈະຊ່ວຍຍົກສູງຜະລິດຕະພັນຂອງງານ ໂດຍສະເພາະແມ່ນໃນຂະແໜງອຸດສາຫະກຳ.