ກະຊວງການເງິນໃຫ້ຮູ້ວ່າ: ພາຍຫລັງມີຄຳສັ່ງຂອງນາຍົກລັດຖະມົນຕີ ວ່າດ້ວຍການເກັບກຳ ແລະ ສຳຫລວດຖານລາຍຮັບງົບປະມານຄືນໃໝ່ໃນຂອບເຂດທົ່ວປະເທດ, ກະຊວງການເງິນຈຶ່ງໄດ້ແຕ່ງຕັ້ງຄະນະຮັບຜິດຊອບ
ເພື່ອດຳເນີນການເກັບກຳຂໍ້ມູນໃຫ້ຄົບຖ້ວນ, ຊັດເຈນ ແລະ ເປັນເອກະພາບໃນຂອບເຂດທົ່ວປະເທດ ໂດຍໄດ້ປະສານສົມທົບກັບພາກສ່ວນກ່ຽວຂ້ອງຕ່າງໆເຊັ່ນ: ກະຊວງແຜນການ ແລະ ການລົງທຶນ, ກະຊວງອຸດສາຫະກຳ ແລະ
ການຄ້າ ເພື່ອແບ່ງຄວາມຮັບຜິດຊອບຢ່າງຈະແຈ້ງໃນການເກັບກຳຂໍ້ມູນ ນັບແຕ່ຂັ້ນສູນກາງຮອດທ້ອງຖິ່ນ ເພື່ອເກັບກຳຂໍ້ມູນຖານລາຍຮັບ ເປັນ ຕົ້ນຈຳນວນ, ທີ່ຕັ້ງ ແລະ ການເຄື່ອນໄຫວຂອງບັນດາຫົວໜ່ວຍທຸລະກິດ, ແຍກໃຫ້ເຫັນລະບອບການເສຍອາກອນຂອງບັນດາ
ຫົວໜ່ວຍທຸລະກິດຕ່າງໆ, ພ້ອມທັງມີກົນໄກຕິດຕາມກວດກາຄວາມຖືກຕ້ອງຄົບຖ້ວນໃນການປະຕິບັດໜ້າທີ່ຢູ່ແຕ່ລະຂັ້ນ, ຖ້າເຫັນພື້ນທີ່ໃດບໍ່ຖືກຕ້ອງເຊັ່ນ: ຢູ່ນອກບັນຊີການຄຸ້ມຄອງ (ບໍ່ມີໃນບັນຊີສະຖິຕິ) ເກີດຂຶ້ນຢູ່ທ້ອງຖິ່ນໃດ,
ທ້ອງຖິ່ນນັ້ນຕ້ອງຮັບຜິດຊອບ ໂດຍຈະຖືກດຳເນີນມາດຕະການ ແລະ ລົງໂທດທາງວິໄນຕາມລະບຽບກົດໝາຍ. ນອກຈາກນີ້ ກໍຈະສືບຕໍ່ຂະຫຍາຍລະບົບຄຸ້ມຄອງຖານຂໍ້ມູນອາກອນໃຫ້ກວມໃນທົ່ວປະເທດ ແລະ ສ້າງລະບົບຂໍ້ມູນຂ່າວສານສ່ວຍສາອາກອນຄົບຊຸດຮ່ວມກັບບໍລິສັດ ແອລຈີ (LG) ສ.ເກົາຫລີ ເພື່ອເປັນການຫັນໄປສູ່ທັນສະໄໝຢ່າງເປັນລະບົບເທື່ອລະກ້າວ. ສ່ວນການຂະຫຍາຍພື້ນຖານວິສາຫະກິດໃນລະບົບອາກອນມູນຄ່າ ໂດຍການນຳໃຊ້ລະບົບຄຸ້ມຄອງແບບເອເລັກໂຕຣນິກນັ້ນ, ຕາມລະບຽບກົດໝາຍແລ້ວ ຜູ້ດຳເນີນທຸລະກິດທີ່ມີເງື່ອນໄຂຄົບຖ້ວນເຊັ່ນ: ມີລາຍຮັບທຸລະກິດປະຈຳປີແຕ່ 400 ລ້ານກີບຂຶ້ນໄປ ຕ້ອງໄດ້ເຂົ້າຢູ່ໃນລະບົບອາກອນມູນຄ່າເພີ່ມທັງໝົດ, ຖ້າຜູ້ໃດບໍ່ເຂົ້າ ຫລື ບໍ່ປະຕິບັດຕ້ອງໃຊ້ມາດຕະການທາງກົດໝາຍຢ່າງເຂັ້ມງວດ. ແຕ່ແນວໃດກໍຕາມ, ກະຊວງການເງິນ ໂດຍສະເພາະຂະແໜງສ່ວຍສາ-ອາກອນແຕ່ລະຂັ້ນແມ່ນໄດ້ມີການປະເມີນລາຍຮັບຂອງບັນດາທຸລະກິດຢ່າງເປັນປະຈຳ ເພື່ອຊຸກຍູ້ຫົວໜ່ວຍທຸລະກິດທີ່ມີລາຍຮັບເຖິງເກນທີ່ຕ້ອງເຂົ້າໃນລະບົບໃຫ້ຈົດທະບຽນເຂົ້າໃນລະບົບອາກອນມູນຄ່າເພີ່ມຢ່າງຖືກຕ້ອງ, ພ້ອມທັງດຳເນີນການໂຄສະນາເຜີຍແຜ່ຜ່ານສື່ຕ່າງໆ ເພື່ອໃຫ້ສັງຄົມໄດ້ຮັບຮູ້, ເຂົ້າໃຈ ແລະ ໄດ້ເຂົ້າຮ່ວມໃນການຈັດຕັ້ງປະຕິບັດລະບຽບກົດໝາຍວ່າດ້ວຍອາກອນມູນຄ່າເພີ່ມ ແລະ ປັດຈຸ
ບັນແມ່ນ ເລີ່ມນຳໃຊ້ເຄື່ອງມືທັນສະໄໝຊ່ວຍໃນການຈັດເກັບອາກອນມູນຄ່າເພີ່ມຢູ່ຈຸດຂາຍເຊັ່ນ: ເຄື່ອງບັນທຶກການຂາຍ ເພື່ອເຊື່ອມຕໍ່ຂໍ້ມູນຢູ່ຈຸດຂາຍ ແລະ ເຊື່ອມຕໍ່ຖານຂໍ້ມູນຂອງວິສາຫະກິດຂະໜາດໃຫຍ່ ແລະ ກຸ່ມທຸລະກິດທີ່ຖືບັນຊີ ເພື່ອເປັນພື້ນຖານຂໍ້ມູນໃຫ້ແກ່ການແຈ້ງມອບລາຍຮັບອາກອນມູນຄ່າເພີ່ມໃຫ້ຂະແໜງສ່ວຍສາອາກອນສາມາດຕິດຕາມ, ກວດກາ ແລະ ໄລ່ລຽງໃຫ້ສອດຄ່ອງກັບລະບຽບກົດໝາຍກຳນົດ.
No comments:
Post a Comment