#
ວິເສດ ສະແຫວງສຶກສາ
ມື້ນີ້ຂໍເປີດນ່ານຟ້າກວ້າງໄກໄປເບິ່ງມາດຕະການປາບພະຍາດສໍ້ລາດບັງຫລວງຢູ່ບາງປະເທດ ໂດຍເລີ່ມຈາກມຽນມາ ປະເທດຮ່ວມສາຍຄາອາຊຽນກັບພວກເຮົານີ້ກ່ອນ. ຂ່າວຕ່າງປະເທດໃຫ້ຮູ້ໃນຕົ້ນເດືອນພະຈິກນີ້ວ່າ: ທ່ານລັດຖະມົນຕີກະຊວງພາຍໃນມຽນມາອອກຄຳເຕືອນຢ່າງເຄັ່ງຂຶມໃຫ້ພະ ນັກງານລັດທຸກຄົນຮ່ວມແຮງຮ່ວມໃຈກັນເປັນໜຶ່ງດຽວ ເພື່ອຕ້ານພະຍາດສໍ້ລາດບັງຫລວງໃນທຸກຮູບແບບໂດຍຫັນຫ້ອງການ, ສຳນັກງານອົງການຂອງລັດໃຫ້ກາຍເປັນເຂດປອດສິນບົນ
ໄປພ້ອມໆກັບການຍົກສູງສະຕິຄວາມຮັບຜິດຊອບຕໍ່ກົດໝາຍ ແລະ ລະບຽບການ.
ຄຳເຕືອນຂອງທ່ານລັດຖະມົນຕີມີຂຶ້ນໃນກອງປະຊຸມກົມໃຫຍ່ພະນັກງານທີ່ຂຶ້ນກັບກະຊວງພາຍໃນ ເຊິ່ງມີພະນັກງານລະດັບຫົວໜ້າເຂົ້າຮ່ວມ 30 ຄົນ.
ກົມໃຫຍ່ພະນັກງານຮັບຜິດຊອບຄຸ້ມຄອງພະນັກງານ, ຄຸ້ມຄອງທີ່ດິນ, ຕິດຕາມກວດ ກາການປະຕິບັດກົດໝາຍຄວບຄຸມເຄື່ອງດື່ມປະເພດມືນເມົາ ກໍຄືການຕິດຕາມການປະຕິບັດກົດໝາຍຈຳກັດການໂອນອະສັງຫາລິມະຊັບທີ່ປະກາດໃຊ້ແຕ່ປີ 1987. ສໍາລັບຢູ່ອິນເດຍນັ້ນ ຂ່າວໃໝ່-ຂ່າວໃຫຍ່ທີ່ອອກມາໃນວັນທີ 10 ເດືອນນີ້ກໍຄືຄຳປະກາດຂອງນາຍົກລັດຖະມົນຕີອິນເດຍ ທ່ານ ນາເຣັນທະລາ ໂມດີ ກ່ຽວກັບການລຶບລ້າງການນຳໃຊ້ເງິນໃບ 500 ແລະ
1.000 ຣູປີ ເຊິ່ງມີຜົນສັກສິດນັບແຕ່ທ່ຽງຄືນຂອງວັນອັງຄານ ວັນທີ 8
ເດືອນພະຈິກນີ້ເປັນຕົ້ນມາ. ສ່ວນຜູ້ທີ່ມີເງິນໃບ 500 ແລະ 1.000 ຣູປີໄວ້ໃນການຄອບຄອງນັ້ນໃຫ້ນຳໄປຝາກເຂົ້າບັນຊີທະນາຄານນັບແຕ່ວັນທີ 10 ເດືອນພະຈິກຫາວັນທີ 30 ເດືອນທັນວາປີນີ້. ຂ່າວບອກວ່າ ຈຸດປະສົງຕົ້ນຕໍໃນການປະກາດຖອນເງິນໃບ 500 ແລະ 1.000 ຣູປີ ອອກຈາກລະບົບຈໍລະຈອນການເງິນແຫ່ງຊາດອິນເດຍຄັ້ງນີ້
ແມ່ນເພື່ອຕ້ານການສໍ້ລາດບັງຫລວງ ແລະ ການຄອບຄອງເງິນທີ່ຜິດກົດໝາຍກໍຄືເພື່ອຕັດຕີນຕັດມືພວກຫລົບຫລີກພັນທະເສຍພາສີໃຫ້ລັດ. ທ່ານນາຍົກລັດຖະມົນຕີ ໂມດີ ມີຄວາມເຫັນກ່ຽວກັບເລື່ອງນີ້ວ່າ ລັດຖະບານອິນເດຍດຳເນີນບັ້ນຮົບຕ້ານການສໍ້ລາດບັງຫລວງ. ພະຍາດສໍ້ລາດບັງຫລວງ, ບັນຫາເງິນປອມ ແລະ ລັດທິກໍ່ການຮ້າຍໄດ້ສ້າງຄວາມເຈັບປວດໃຫ້ແກ່ປະເທດຊາດ ແລະ ກົດໜ່ວງທ່ວງດຶງເສດຖະກິດ. ຂ່າວໃຫ້ຊາບຕື່ມວ່າ ສຳລັບປ້ຳນ້ຳມັນ, ຮ້ານຂາຍນ້ຳນົມ, ຮ້ານຈຳໜ່າຍເຄື່ອງໃຊ້ສອຍປະຈຳວັນ ແລະ ສະຖານທີ່ເຜົາສົບຍັງອະນຸຍາດໃຫ້ໃຊ້ເງິນໃບ 500 ແລະ ໃບ
1.000 ຣູປີ ໄດ້ຕື່ມອີກ
72 ຊົ່ວໂມງ
(ນັບແຕ່ທ່ຽງຄືນຂອງວັນທີ 8/11/2016) ເຊັ່ນດຽວກັບບ່ອນຂາຍປີ້ລົດໄຟ, ເຄື່ອງບິນ ແລະ ລົດໂດຍສານຂອງລັດ. ທາງການອິນເດຍມີແຜນນຳເງິນໃບ 500 ແລະ
1.000 ຣູປີ ໃໝ່ມາໃຊ້ປ່ຽນແທນໃນຕໍ່ໜ້າ.
No comments:
Post a Comment