laophatthananewspaper: ກະຊວງສຶກສາ ແລະ ສາທາຮ່ວມມືໃຫ້ຄວາມສຳຄັນຕໍ່ວຽກງານສຸຂະພາບ ແລະ ໂພສະນາການຢູ່ໂຮງຮຽນ

ກະຊວງສຶກສາທິການ ແລະ ກີລາຮ່ວມກັບກະຊວງສາທາລະນະສຸກຈັດກິດຈະກຳສົ່ງເສີມວຽກງານສຸຂະພາບ ແລະ ໂພຊະນາການໃນໂຮງຮຽນ ໂດຍເນັ້ນ ໜັກໃຫ້ເດັກມີສຸຂະພາບດີ, ແຂງແຮງປາສະຈາກໂຣກໄພໄຂ້ເຈັບເປີດໂອກາດໃຫ້ເຂົາ ເຈົ້າໄດ້ປະກອບສ່ວນຢ່າງຕັ້ງໜ້າເຂົ້າໃນການສຶກສາຄົ້ນຄວ້າ ແລະ ເຮັດ ກິດຈະກຳ ຕ່າງໆເຊິ່ງວຽກງານດັ່ງກ່າວແມ່ນໄດ້ເລີມ ປະຕິບັດມາແຕ່ປີ 2002 ໂດຍໄດ້ຮັບແຮງ ສະໜັບສະໜູນຈາກໂຄງການຕ່າງໆ.

ທ່ານ ລີຕູ ບົວປາວ ລັດຖະ ມົນຕີຊ່ວຍວ່າການ ກະຊວງສຶກ ສາທິການ ແລະ ກີລາກ່າວໃນໂອ ກາດເຂົ້າຮ່ວມກອງປະຊຸມເຝິກ ອົບຮົມກ່ຽວກັບວຽກງານສົ່ງເສີມສຸຂະພາບ ແລະ ໂພຊະນາການໃນໂຮງຮຽນຂອງບັນດາ ປະຊາຊາດອາຊີຕາເວັນ ອອກ ສຽງໃຕ້ (ອາຊຽນ) ວ່າ: ຍ້ອນເຫັນຄວາມສຳຄັນຂອງວຽກງານສຸຂະພາບຕໍ່ຜົນຂອງການພັດທະ ນາເວົ້າລວມ, ເວົ້າສະເພາະແມ່ນຜົນການຮຽນຂອງເດັກນ້ອຍຢູ່ບັນດາໂຮງຮຽນຕ່າງໆ ນັບແຕ່ປີ 2002 ເປັນຕົ້ນມາກະຊວງສຶກສາທິການ ແລະ ກີລາ

ຈຶ່ງໄດ້ຮ່ວມມືກັບກະຊວງສາທາລະນະສຸກ ເພື່ອສົ່ງເສີມວຽກງານສຸຂະພາບ ແລະ ໂພຊະນາການຢູ່ບັນດາໂຮງຮຽນ ເຮັດໃຫ້ເດັກຢູ່ບັນດາໂຮງຮຽນມີຄວາມຮູ້, ຄວາມເຂົ້າໃຈ ແລະ ເປັນເຈົ້າການໃນການຮັກສາສຸ ຂະພາບຂອງຕົນເອງ.

ລັດຖະມົນຕີຊ່ວຍວ່າການ ກະຊວງສຶກສາທິການ ແລະ ກີລາກ່າວຕື່ມອີກວ່າ: ສຸຂະພາບເປັນປັດໄຈພື້ນຖານໃນການດຳລົງຊີວິດ ແລະ ເປັນປັດໄຈສຳຄັນທີ່ອຳນວຍຄວາມສະດວກໃຫ້ແກ່ການສຶກສາຮ່ຳ ຮຽນ, ຖ້າເດັກມີສຸຂະພາບດີ ແຂງແຮງກໍຈະເຮັດໃຫ້ຜົນການຮຽນດີ. ເພາະສະນັ້ນ ເພື່ອຕ້ານ ແລະ ສະກັດກັ້ນພະ ຍາດຕ່າງໆທີ່ມັກພົບກັບເດັກໃນໄວຮຽນ, ກະຊວງສຶກສາທິການ ແລະ ກີລາ ແລະ ກະຊວງສາທາ ລະນະສຸກແຫ່ງ ສປປ ລາວ ໄດ້ມີແນວທາງນະໂຍບາຍ ແລະ ຍຸດທະສາດສົ່ງເສີມພົນລະເມືອງລາວທຸກຄົນຕ້ອງຮຽນໃຫ້ຈົບຊັ້ນ ມັດທະຍົມຕອນຕົ້ນ ແລະ ມີສຸຂະ ພາບດີໂດຍພື້ນຖານແຕ່ນີ້ຫາປີ 2020 ເພື່ອເປັນຕົວຊີ້ວັດທີ່ສຳຄັນໃນແຜນຍຸດທະສາດການເຕີບໂຕ ແລະ ລົບລ້າງຄວາມທຸກຍາກແຫ່ງຊາດ, ທັງໄດ້ອອກນິຕິກຳຕ່າງໆຫຼາຍສະບັບທີ່ກ່ຽວພັນເຖິງວຽກງານສຸຂະພາບໃນໂຮງຮຽນ ເພື່ອເປັນບ່ອນອີງໃຫ້ແກ່ການຈັດ ຕັ້ງປະຕິບັດ ໂດຍເລີມຈາກເດັກ ກ່ອນໄວຮຽນ ແລະ ປະຖົມສຶກສາ ທີ່ເນັ້ນການຮັກສາສຸຂະພາບສ່ວນບຸກຄົນ, ທັກສະຊີວິດ, ສະພາບແວດລ້ອມດ້ານກາຍຍະພາບ, ດ້ານຈິດຕະສາດສັງຄົມ, ການປ້ອງກັນ ແລະ ຄວບຄຸມພະຍາດ ຕິດຕໍ່, ການດູແລ ແລະ ການບໍລິ ການດ້ານສຸຂະພາບ, ໂພຊະນາການ ແລະ ການຮ່ວມງານລະ ຫວ່າງໂຮງຮຽນກັບຊຸມຊົນເຊັ່ນ: ໂຄງການຈັດຫານ້ຳສະອາດ ແລະ ອະນາໄມໂຮງ ຮຽນ, ໂຄງ ການຄວບຄຸມພະຍາດກາຝາກ, ໂຄງການຮັກສາສຸຂະພາບປາກ ແລະ ແຂ້ວ, ໂຄງການຮັກສາຄຸນນະພາບ, ໂຄງການສະໜອງອາ ຫານໃຫ້ໂຮງຮຽນ ແລະ ໂຄງ ການຄວບຄຸມພະຍາດຕິດຕໍ່. ແຕ່ໃນນັ້ນ ມີພຽງໂຄງການຄວບຄຸມແມ່ກາຝາກໃນໂຮງຮຽນປະຖົມເທົ່ານັ້ນ ທີ່ຄວບຄຸມໂຮງຮຽນປະ ຖົມທັງໝົດໃນຂອບເຂດທົ່ວປະເທດ.

ທ່ານ ນາງ ອິນລາວັນ ແກ້ວ ບຸນພັນ ລັດຖະມົນຕີຊ່ວຍວ່າການ ກະຊວງສາທາລະນະສຸກ ກ່າວໃນໂອກາດດຽວກັນວ່າ: ບໍ່ວ່າຢູ່ໃນປະເທດໃດກໍຕາມ ໂຮງຮຽນແມ່ນມີພະລັງທີ່ຈະຊຸກຍູ້ໃຫ້ຊຸມຊົນເກີດການປ່ຽນແປງຢ່າງຊັດເຈນ ບົນພື້ນຖານດັ່ງກ່າວ ມັນໄດ້ບົມຊ້ອນຈິນຕະນາການຂອງນັກ ຮຽນ, ຄູ, ອາຈານ, ພໍ່ແມ່ຜູ້ປົກ ຄອງ ແລະ ຜູ້ບໍລິຫານການສຶກສາທີ່ຈະເຮັດໃຫ້ທຸກໂຮງຮຽນຄົ້ນພົບທາງເດີນເສັ້ນໃໝ່ໃນການສົ່ງເສີມສຸຂະພາບ ພ້ອມທັງປັບປຸງແກ້ໄຂບັນຫາທີ່ກ່ຽວຂ້ອງກັບສຸຂະພາບສຳລັບໂຮງຮຽນຂອງຕົນ, ນີ້ຄືໝາກຫົວໃຈຂອງຂະບວນການ ໂຮງຮຽນຮຽນດີເດັ່ນດ້ານການສົ່ງເສີມສຸຂະພາບ.

ສຳລັບ ສປປ ລາວ ແລ້ວ ກະຊວງສາທາລະນະສຸກແມ່ນໄດ້ສ້າງທຸກເງື່ອນໄຂເພື່ອກ້າວສູ່ການກຳ ຈັດພະຍາດກາຝາກເຊັ່ນ: ໃບໄມ້ໃນເລືອດໃນປີ 2016 ແລະ ພະຍາດຂາຊ້າງໃນປີ 2020 ໜຶ່ງໃນກຸ່ມເປົ້າໝາຍສຳຄັນທີ່ຕ້ອງເອົາໃຈໃສ່ເປັນພິເສດແມ່ນກຸ່ມເດັກນ້ອຍອາຍຸເຂົ້າຮຽນທັງໝົດ, ເຊິ່ງຍາມໃດກະ ຊວງສາ ທາລະນະສຸກກໍໄດ້ຄຽງບ່າຄຽງໄລ່ກັບກະຊວງສຶກສາທິການ ແລະ ກີລາ ເພື່ອຮ່ວມກັນປະຕິບັດວຽກງານສົ່ງເສີມສຸຂະພາບໃນໂຮງຮຽນໃຫ້ປະສົບຜົນສຳເລັດຕາມເປົ້າໝາຍທີ່ວາງໄວ້.