ພະແນກສຶກສາທິການ ແລະ ກີລານະຄອນຫຼວງ ໄດ້ຈັດການສອບເສັງຄັດເລືອກນັກຮຽນເກັ່ງ
ເພື່ອເລືອກເອົາຕົວແທນຂອງແຂວງສົ່ງເຂົ້າແຂ່ງຂັນໃນລະດັບຊາດທີ່ຈະມີຂຶ້ນໃນມໍ່ໆນີ້
ໂດຍການແຂ່ງຂັນໃນສົກຮຽນນີ້ ມີນັກສອບເສັງເຂົ້າຮ່ວມທັງໝົດ 494 ຄົນ ທີ່ເປັນຕົວແທນນັກຮຽນເກັ່ງຈາກ
9 ເມືອງໃນນະຄອນ ຫລວງ ວຽງຈັນໃນນັ້ນ ການສອບເສັງໄດ້ແບ່ງອອກເປັນ 3 ຊັ້ນຄື ຊັ້ນ
ປ.5, ມ.4 ແລະ ມ.7 ແລະ ມີ 3 ວິຊາທີ່ສອບເສັ່ງ.
ພິທີການສອບເສັງມີຂຶ້ນໃນຕອນເຊົ້າຂອງວັນທີ
15 ມີນາ 2013 ຢູ່ໂຮງຮຽນມັດທະຍົມສຶກ ສາສົມບູນວຽງຈັນ (ມສ ວຽງຈັນ) ໂດຍມີຕົວແທນນັກຮຽນເກັ່ງທີ່ຄັດເລືອກມາຈາກ
9 ເມືອງຂອງນະຄອນ ຫຼວງວຽງຈັນ ເຂົ້າຮ່ວມທັງໝົດ 494 ຄົນ ໃນນັ້ນ ຊັ້ນ ປ.5 ມີ
144 ຄົນ, ຊັ້ນ ມ.4 ມີ 210 ຄົນ ແລະ ມ.7 ມີ 140 ຄົນ; ວິຊາທີ່ສອບເສັງປະກອບມີວິຊາພາສາລາວ,
ຄະນິດສາດ ແລະ ໂລກອ້ອມໂຕ ສຳລັບຊັ້ນ ປະຖົມ, ວິຊາພາສາລາວ - ວັນນະຄະດີ, ຄະນິດສາດ,
ຟີຊິກສາດ ແລະ ເຄມີສາດ ສຳລັບມັດ ທະຍົມຕົ້ນ ແລະ ປາຍ.
ທ່ານ ສຸດທານີ ໄຊຍະສານ ຮອງຫົວໜ້າຫ້ອງການພະແນກສຶກສາທິການ
ແລະ ກີລານະຄອນຫຼວງ, ປະທານຄະນະກຳມະການບັ້ນສອບເສັງນັກຮຽນເກັ່ງໃຫ້ສຳພາດວ່າ:
ການສອບເສັງຄັດເລືອກນັກຮຽນເກັ່ງຄັ້ງນີ້ເປັນ ຄັ້ງ ທີ 18 ນັບແຕ່ໄດ້ມີການ ຈັດການສອບເສັງເປັນຕົ້ນມາ.
ຄັ້ງທີ 3 ສຳລັບຊັ້ນ ມ.7 ແລະ ຄັ້ງ ທີ 4 ສຳລັບຊັ້ນ
ມ.4 ນັບແຕ່ໄດ້ເລີ່ມຈັດຕັ້ງປະຕິບັດແຜນປະຕິຮູບລະບົບການສຶກສາແຫ່ງຊາດປີ
2011 ເປັນຕົ້ນມາ.
ຈຸດປະສົງຂອງການສອບເສັງໃນຄັ້ງນີ້ ແມ່ນເພື່ອຄັດເລືອກເອົານັກຮຽນເກັ່ງວິຊາລະໜຶ່ງຄົນ
ທີ່ເປັນຕົວແທນຂອງນະຄອນຫຼວງເຂົ້າຮ່ວມແຂ່ງຂັນໃນລະດັບຊາດທີ່ຈະມີຂຶ້ນໃນມໍ່ໆນີ້.
ນອກນັ້ນ ຍັງເປັນການຕີລາຄາຜົນການຮຽນ - ການສອນຂອງຄູ,ອາຈານ ແລະ ນັກຮຽນ ຢູ່ແຕ່ລະໂຮງຮຽນ
ທັງເປັນການສົ່ງເສີມທັກສະ, ຄວາມຮູ້, ຄວາມສາມາດ ແລະ ຄົ້ນຫາພອນສະຫວັນຂອງນັກຮຽນ
ເພື່ອໃຫ້ໂອກາດແກ່ເຂົາເຈົ້າໄດ້ສະແດງຄວາມຮູ້, ຄວາມສາມາດ ແລະ ພອນສະຫວັນທີ່ຕົນມີໂດຍຜ່ານການສອບເສັງຄັດເລືອກຕົວຈິງພ້ອມນັ້ນ
ຍັງເປັນເວທີໃນການປຸກລະດົມໃຫ້ນັກຮຽນ, ນັກສຶກສາເຫັນໄດ້ເຖິງຄວາມໝາຍ, ຄວາມສຳຄັນ
ແລະ ຄຸນຄ່າຂອງການສຶກສາຕໍ່ການພັດທະນາປະເທດຊາດເຊິ່ງຜົນຂອງການສອບເສັງໃນຄັ້ງນີ້ຈະສາມາດສະຫຼຸບໄດ້ໃນທ້າຍເດືອນນີ້.
No comments:
Post a Comment