ຈະມີນິຕິກຳສະເພາະເພື່ອຄຸ້ມຄອງໂຄງການລົງທຶນກ່ອນ

         ພາຍຫລັງລັດຖະບານໄດ້ ອອກຄຳສັ່ງເລກທີ 16/ນຍ, ລົງ ວັນທີ 18 ເມສາ 2013 ວ່າດ້ວຍການຢຸດເຊົາຊົ່ວຄາວການ ອະນຸມັດໂຄງການລົງທຶນກ່ອນ ແລະ ໂຄງການນອກແຜນທີ່ນຳໃຊ້ແຫລ່ງທຶນຈາກງົບປະມານລັດ, ກະຊວງແຜນການ ແລະ ການລົງທຶນ ແລະ ກະຊວງການເງິນ ແລະ ພາກສ່ວນກ່ຽວຂ້ອງອື່ນໆ ໄດ້ມີການຄົ້ນຄວ້ານິຕິກຳຄຸ້ມຄອງໂຄງການລົງທຶນກ່ອນ ແລະ ມາຮອດປັດຈຸບັນໄດ້ສຳເລັດການແຕ່ງຕັ້ງຄະນະຮັບຜິດຊອບກະກຽມນິຕິກຳດັ່ງກ່າວທີ່ມາຈາກຂະແໜງການກ່ຽວຂ້ອງ ແລະ ໄດ້ ເກັບກຳຂໍ້ມູນ,ປຶກສາຫາລືກະ ກຽມເນື້ອໃນເບື້ອງຕົ້ນແລ້ວ ຄາດ ວ່າຈະໃຫ້ສຳເລັດສົມບູນ ແລະ ປະກາດໃຊ້ກ່ອນ ສົກງົບປະມານ 2013-2014.

             ກະຊວງແຜນການ ແລະ ການລົງທຶນໃຫ້ຮູ້ວ່າ: ຜ່ານມາ, ບັນດາໂຄງການລົງທຶນກ່ອນຍັງບໍ່ທັນມີນິຕິກຳເພື່ອຄຸ້ມ ຄອງ ຈຶ່ງເຮັດໃຫ້ໂຄງການດັ່ງກ່າວພົບຄວາມຫຍຸ້ງຍາກ, ປະສິດທິຜົນຕ່ຳ, ຫຍຸ້ງຍາກຕໍ່ການກວດກາ, ມູນຄ່າຂອງບາງໂຄງການ ຫລາຍ ກວ່າຄວາມເປັນຈິງ ແລະ ສ່ວນ ໃຫຍ່ເປັນໂຄງການນອກແຜນທີ່ ສະພາແຫ່ງຊາດໄດ້ຮັບຮອງ, ບໍ່ ໄດ້ມີການຕີລາຄາ ແລະ ບໍ່ມີການປະມູນຄັດເລືອກຜູ້ຮັບເໝົາ ແລະ ບັນຫາສຳຄັນໂຄງການລົງທຶນກ່ອນເປັນໂຄງການໃຫຍ່ທີ່ມີມູນຄ່າຫລາຍ ຖ້າເຈົ້າຂອງໂຄງການບໍ່ສາມາດຂຶ້ນແຜນຊຳລະໄດ້ຕາມສັນຍາກັບຜູ້ຮັບເໝົາກໍຈະກາຍເປັນໜີ້ສິນຄຸມເຄືອ.

        ສຳລັບການຊຳລະໜີ້ສິນໃນສົກປີ 2013-2014, ກະຊວງແຜນການ ແລະ ການລົງທຶນຢືນຢັນ ວ່າ: ລັດຖະບານຍັງສືບ ຕໍ່ປະຕິບັດຄືກັບສົກປີ 2012-2013 ຜ່ານມາ ຄືໜີ້ສິນທັງໝົດແມ່ນກະຊວງການເງິນ ຮັບຜິດຊອບຂຶ້ນແຜນຊຳລະ, ກະຊວງ ແຜນການ ແລະ ການລົງທຶນເປັນຜູ້ລົງນາມບັນດາໂຄງການທີ່ເປັນໜີ້ຂອງຂະແໜງການ ແລະ ທ້ອງຖິ່ນທັງໝົດແລ້ວສົ່ງໃຫ້ ກະຊວງການເງິນເປັນຜູ້ພິຈາລະນາ ແລະ ຊຳລະຕາມງົບປະມານທີ່ຂຶ້ນແຜນໄວ້.