ພິທີວາງສີລາເລີກໂຄງການກໍ່ສ້າງເສັ້ນທາງ
1A ແຕ່ເມືອງບຸນເໜືອຫາດ່ານສາກົນລານຕຸຍ ແຂວງຜົ້ງສາລີ ມີຄວາມຍາວ 141 ກວ່າກິໂລແມັດ
ໄດ້ມີຂຶ້ນໃນວັນທີ 30 ພະຈິກຜ່ານມານີ້ ໂດຍການເຂົ້າຮ່ວມຂອງທ່ານ ສົມສະ ຫວາດ
ເລັ່ງສະຫວັດ ຮອງນາຍົກ ລັດຖະມົນຕີ, ຜູ້ຊີ້ນຳວຽກງານເສດຖະກິດ, ທ່ານ ຄຳເຈນ ວົງໂພສີ
ເຈົ້າແຂວງຜົ້ງສາລີ, ທ່ານ ຟາງຊີເຊົາ ຜູ້ອຳນວຍການໃຫຍ່ກຸ່ມບໍລິສັດວິສະຫະກຳກໍ່ສ້າງແຂວງກວາງຕຸງ
ສປ ຈີນ ເຂົ້າຮ່ວມ.
ເສັ້ນທາງ 1A ເປັນເສັ້ນ ທາງຫລວງແຫ່ງຊາດທີ່ຢູ່ເໜືອສຸດຂອງ
ສປປ ລາວ ແລະ ເປັນເສັ້ນທາງຍຸດທະສາດສຳຄັນໃນການຄົມມະນາຄົມຂົນສົ່ງສິນຄ້າ
ແລະ ຜົນຜະລິດສົ່ງອອກໄປ ສປ ຈີນ ເປັນຕົ້ນເຂົ້າ, ສາລີ, ກ້ວຍ, ມັນຕົ້ນ ແລະ ອື່ນໆ
ເພື່ອປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດເວົ້າ ລວມ, ເວົ້າສະເພາະແມ່ນບັນດາແຂວງພາກເໜືອຂອງລາວ.
ເສັ້ນທາງດັ່ງກ່າວແມ່ນໄດ້ຮັບການສຳຫລວດອອກແບບໃນທ້າຍປີ
2009 ຜ່ານມາ ໂດຍບໍລິ ສັດກວາງຕຸ້ງວິສະຫະກຳກໍ່ສ້າງ ແລະ ໄຟຟ້ານ້ຳຕົກເຂດ 3
ແລະ ໄດ້ມີການເຊັນສັນຍາກໍ່ສ້າງໃນທ້າຍປີ 2011 ຜ່ານມາ ເຊິ່ງຈະເລີ່ມ ກໍ່ສ້າງແຕ່ເມືອງບຸນເໜືອຜ່ານເມືອງຍອດອູຈົນໄປຮອດຊາຍແດນດ່ານສາກົນລານຕຸຍ
ແລະ ເຊື່ອມຕໍ່ກັບເສັ້ນ ທາງຂອງເມືອງຈຽງເຊີນ ນະ ຄອນຟູເອີ ສປ ຈີນ, ເປັນເສັ້ນ
ທາງປູຢາງສອງຊັ້ນ, ໜ້າທາງເຂດເທສະບານກວ້າງ 16 ແມັດ, ເຂດນອກເມືອງກວ້າງ 7
ແມັດ, ສ້ອມແປງຂົວທີ່ມີຢູ່ແລ້ວ 29 ແຫ່ງ ກວ້າງ 7 ແມັດ ລວມມູນຄ່າກໍ່ ສ້າງ
91 ລ້ານໂດລາສະຫະລັດ, ໃນນັ້ນ ເປັນທຶນສົມທົບຂອງລັດ ຖະບານ 5% ສ່ວນທີ່ເຫລືອແມ່ນທຶນກູ້ຢືມດອກເບ້ຍຕ່ຳຈາກທະນາຄານຂາອອກ-ຂາເຂົ້າ
ສປ ຈີນ ແລະ ຄາດວ່າຈະໃຊ້ເວລາກໍ່ສ້າງທັງໝົດ 54 ເດືອນໃຫ້ສຳເລັດ.
No comments:
Post a Comment