ຕຳຫຼວດ ຂໍໃຫ້ປະຊາຊົນສະຫຼອງວັນສົ່ງທ້າຍປີເກົ່າຕ້ອນຮັບປີໃໝ່ຢ່າງມີສະຕິ

         ເຈົ້າໜ້າທີ່ຈະລາຈອນ ນະຄອນຫຼວງວຽງຈັນ ໃຫ້ຮູ້ວ່າ: ໃນປີ 2013 ສະພາບ ອຸປະຕິເຫດເກີດຂຶ້ນຢູ່ນະຄອນຫຼວງວຽງ ຈັນ ມີ 1.520 ກໍລະນີ ສົ່ງຜົນເຮັດໃຫ້ມີຜູ້ ເສຍຊີວິດ 202 ຊຶ່ງທຽບໃສ່ປີຜ່ານມາຫຼຸດລົງ 100 ກ່ວາກໍລະນີ ຂະນະທີ່ຕົວເລກຜູ້ ເສຍຊີວິດຫຼຸດລົງ 3 ຄົນ, ແນວໃດກໍດີ ເນື່ອງໃນໂອກາດສະເຫຼີມສະຫຼອງວັນສົ່ງ ທ້າຍ ປີເກົ່າຕ້ອນຮັບປີໃໝ່ 2014 ນີ້ ຊຶ່ງຈະມີ ການຈັດງານສະຫຼອງຢູ່ຫຼາຍແຫ່ງ ແລະ ເຮັດ ໃຫ້ມີການດື່ມສິ່ງມຶນເມົາອັນເປັນສາເຫດພາໃຫ້ເກີດອຸປະຕິເຫດດັ່ງທຸກປີຜ່ານມາ, ສະ ນັ້ນ ທາງເຈົ້າໜ້າທີ່ຕຳຫຼວດຈະລາຈອນ ນະຄອນຫຼວງວຽງຈັນ ຈຶ່ງໄດ້ນຳກຳລັງເຈົ້າໜ້າ ທີ່ກວ່າ 200 ຄົນ ເພື່ອປະຈຳການ ແລະ ລົງກວດກາຕາມສາຍທາງຕ່າງໆພ້ອມທັງ ສ້າງຂະບວນປຸກລະດົມກຳລັງແຮງສັງລວມມະຫາຊົນເຂົ້າຮ່ວມໃນການປ້ອງກັນເວນ ຍາມ ແລະ ໂຄສະນາຕ້ານການດື່ມສິ່ງມຶນເມົາເພື່ອຫຼຸດຜ່ອນອຸປະຕິເຫດທີ່ຈະເກີດຂຶ້ນໃນຊ່ວງປີໃໝ່ນີ້.

        ທ່ານ ພັນຕີ ຢຸດຕະພົງ ສຸວັນນະສິງ ຮອງຫົວໜ້າພະແນກຕຳຫຼວດຈະລາຈອນນະຄອນຫຼວງວຽງຈັນ ກ່າວວ່າ: ຕາມ ແຈ້ງ ການຂອງນະຄອນຫຼວງວຽງຈັນ ໃນການສະເຫຼີມສະຫຼອງສົ່ງທ້າຍປີເກົ່າຕ້ອນຮັບປີໃໝ່ 2014 ນີ້ ໃຫ້ມີຄວາມສະຫງົບ ແລະ

ສະກັດກັ້ນບໍ່ໃຫ້ເກີດອຸປະຕິເຫດ ແລະ ກອງບັນຊາການ ປກສ ນະຄອນຫຼວງວຽງຈັນ ກໍໄດ້ແຈ້ງໃຫ້ກຳລັງເຈົ້າໜ້າທີ່ທຸກ ໜ່ວຍ ໃຫ້ເພີ່ມທະວີປ້ອງກັນສະພາບຕ່າງໆ ເປັນຕົ້ນແມ່ນກຸ່ມແກ້ງໄວລຸ້ນກວນເມືອງ, ກໍ່ອາລະວາດຕີກັນຕາມສະຖານທີ່ ແລະ ສະພາບ ອຸປະຕິເຫດຕາມທ້ອງຖະໜົນຄື: ໃນຊ່ວງສະຫຼອງປີໃໝ່ສາກົນ ຂອງປີ 2013 ຊຶ່ງມີອຸປະຕິເຫດເກີດຂື້ນ 10 ກວ່າກໍ ລະນີ ມີຜູ້ ເສຍຊີວິດ 3 ຄົນ ສາເຫດສ່ວນໃຫຍ່ແມ່ນຍ້ອນດື່ມສິ່ງມຶນເມົາ, ຂັບຂີ່ລົດໄວ, ສະນັ້ນການສະກັດກັ້ນອຸປະຕິເຫດ ໃນໄລ ຍະສະ ຫຼອງສົ່ງທ້າຍປີເກົ່າຕ້ອນຮັບປີໃໝ່ 2014 ນີ້ ຈຶ່ງຫ້າມໃຫ້ພະນັກງານ-ນັກຮົບດື່ມສິ່ງມຶນເມົາເວລາປະຕິບັດໜ້າທີ່ ແລະ ບໍ່ໃຫ້ຂັບ ຂີ່ລົດພາໃຫ້ເກີດອຸປະຕິເຫດ ຫຼື ເມົາແລ້ວໄປເຮັດສິ່ງບໍ່ດີ, ພາໃຫ້ເສພາບພົດຂອງກຳລັງ, ພ້ອມທັງຮຽກຮ້ອງໃຫ້ປະຊາຊົນຈົ່ງ ພ້ອມກັນສະເຫຼີມສະຫຼອງຢ່າງມີສະຕິ, ບໍ່ຄວນດື່ມສິ່ງມືນເມົາເກີນຂອບເຂດ  ແລະ ພ້ອມກັນເປັນເຈົ້າການໃນການກ້າວສູ່ປີໃໝ່ 2014 ດ້ວຍການເພີ່ມທະວີການປະກອບສ່ວນເຮັດວຽກງານຂອງຕົນຢ່າງຫ້າວຫັນ ເພື່ອພ້ອມກັນພັດທະນາປະເທດຊາດຂອງ ຕົນໃຫ້ນັບມື້ເຕີບໃຫຍ່ເຂັ້ມແຂງ.