ນັກສິກສາລາວເຂົ້າຮ່ວມແລກປ່ຽນບົດຮຽນດ້ານການອອກແບບເຄື່ອງແຕ່ງກາຍຢູ່ປະເທດຍີ່ປຸ່ນ

      ນັກສຶກສາລາວຈຳນວນ 24 ຄົນ ແລະ ຜູ້ນຳພາໄດ້ອອກເດີນທາງຈາກສະໜາມ ບິນວັດໄຕ ໄປຍັງປະເທດຍີ່ປຸ່ນ ໃນວັນ ທີ 23 ກຸມພາ 2014 ເພື່ອເຂົ້າຮ່ວມໂຄງ ການແລກປ່ຽນຊາວໜຸ່ມ JENESYS 2.0 ໃນຫົວຂໍ້: ການອອກແບບເຄື່ອງແຕ່ງ ກາຍ ໂດຍຈະເຄື່ອນໄຫວຢູ່ຍີ່ປຸ່ນ ນັບແຕ່ວັນ ທີ 24 ກຸມພາ- 4 ມີນາ 2014.

       ນັກສຶກສາຈຳນວນ 12 ຄົນ ຈາກທັງໝົດແມ່ນໄດ້ຮັບການສະເໜີຊື່ ໂດຍກະ ຊວງສຶກສາທິການ ແລະ ກິລາ ເຊິ່ງເປັນນັກສຶກສາທີ່ດີເດັ່ນຢູ່ໂຮງຮຽນວິຊາຊີບໃນນະຄອນຫຼວງວຽງຈັນ ແລະ ແຂວງຕ່າງໆ. ສ່ວນນັກສຶກສາອີກ 12 ຄົນ ແມ່ນໄດ້ຮັບການ ຄັດເລືອກທົ່ວໄປຈາກຄະນະກຳມະການທີ່ເປັນຕົວແທນຈາກສະຖານທູດ

ຍີ່ປຸ່ນປະຈຳລາວ ແລະ ກະຊວງສຶກສາທິການ ແລະ ກິລາ.

      ຢ່າງໃດກໍຕາມ, ນັກສຶກສາທີ່ເຂົ້າຮ່ວມໂຄງການຈະໄດ້ຮຽນຮູ້ການແຕ່ງຕົວ ແລະ ການອອກແບບເຄື່ອງແຕ່ງກາຍຕ່າງໆ ຂອງຍີ່ປຸ່ນ. ພ້ອມທັງຢ້ຽມຢາມນະຄອນຫຼວງໂຕກຽວ ແລະ ແຂວງຟຸຄຸໂອກະ (ຕັ້ງຢູ່ເກາະຄິວຊູ ເປັນເກາະໃຫຍ່ອັນດັບ 3 ຂອງຍີ່ປຸ່ນ ຕັ້ງຢູ່ທາງພາກໃຕ້ສຸດທຽບກັບ 4 ເກາະໃຫຍ່ໃນຍີ່ປຸ່ນ) ເພື່ອຮຽນຮູ້ກ່ຽວກັບວັດທະນະທຳ, ປະຫວັດສາດ ແລະ ເຕັກໂນໂລຊີຕ່າງໆຂອງຍີ່ປຸ່ນ ໂດຍສະເພາະແມ່ນໃນຂະແໜງການອອກແບບເຄື່ອງແຕ່ງກາຍຕ່າງໆ. ຢ້ຽມຢາມສະຖາປັດຕະ ຍະກຳທາງປະຫວັດສາດ, ບັນດາບໍລິສັດຍີ່ປຸ່ນ, ບ້ານຄົນຍີ່ປຸ່ນ ແລະ ການແລກປ່ຽນກັບນັກຮຽນຢູ່ໂຮງຮຽນຂອງຍີ່ ປຸ່ນນຳອີກ.

      ໂຄງການ “JENESYS 2.0” ມີຈຸດປະສົງເພື່ອພັດທະນາສາຍພົວພັນມິດຕະພາບ ແລະ ຄວາມເຂົ້າໃຈຂອງ ຊາວໜຸ່ມຍີ່ປຸ່ນ ແລະ ບັນດາປະເທດອາຊຽນ, ໂອຊີອານີ. ຂໍ້ມູນກ່ຽວກັບໂຄງການ “JENESYS 2.0” ຂອງຊຸດຕໍ່ໄປ ແມ່ນຈະແຈ້ງໃຫ້ຊາບ ໂດຍຜ່ານສະຖານທູດຍີ່ປຸ່ນ ແລະ ກະຊວງທີ່ຮັບຜິດຊອບ.