ພາຍຫລັງໄດ້ມີວິໄສທັດວ່າ: “ສ້າງ ສປປ ລາວ
ໃຫ້ເປັນໝໍ້ໄຟແຫ່ງອາຊຽນ”, ລັດຖະບານໄດ້ກຳນົດເອົາການພັດທະນາພະ ລັງງານຈາກນ້ຳເປັນທ່າແຮງດ້ານການພັດທະນາເສດຖະກິດຂອງປະເທດທີ່ຍືນຍົງ
ເນື່ອງຈາກປະເທດລາວມີຫ້ວຍນ້ຳລຳເຊຫລາຍສາຍ ແລະ ອຸດົມສົມບູນໄປດ້ວຍຊັບພະຍາກອນປ່າໄມ້
ແລະ ອັນສຳຄັນ ປະເທດລາວຕັ້ງຢູ່ໃຈກາງຂອງປະເທດອະນຸພາກພື້ນທີ່ມີຄວາມຕ້ອງການພະລັງງານໄຟຟ້າສູງເຊັ່ນ:
ໄທ, ຫວຽດນາມ, ສປ ຈີນ ຈຶ່ງເປັນທ່າແຮງໃຫ້ແກ່ການພັດທະນາພະລັງງານໄຟຟ້າ ເພື່ອສົ່ງອອກ
ຄຽງຄູ່ກັບການສະໜອງພາຍໃນໃຫ້ທົ່ວເຖິງເທື່ອລະກ້າວ.
ກົມທຸລະກິດພະລັງງານ ກະຊວງພະລັງງານ ແລະ ບໍ່ແຮ່
ໃຫ້ຮູ້ວ່າ: ການພັດທະນາພະລັງ ງານຈາກນ້ຳແມ່ນທາງເລືອກທີ່ດີສຸດຂອງປະເທດເຮົາ
ເນື່ອງຈາກວ່ານ້ຳມັນ, ອາຍແກັສ, ລົມ, ແສງຕາເວັນຍັງບໍ່ສາມາດຂຸດຄົ້ນ ແລະ ບໍ່ເປັນທຸລະກິດສະໜອງໃຫ້ພາກອຸດສາຫະກຳໄດ້
ເຊິ່ງມີພຽງຖ່ານຫີນ ແຕ່ກໍຍັງຢູ່ໃນໄລ ຍະເລີ່ມຕົ້ນ. ປັດຈຸບັນພະລັງ ງານໄຟຟ້ານ້ຳຕົກທີ່ໄດ້ສຳຫຼວດ
ແລ້ວທົ່ວປະເທດມີປະມານ 18.000-26.000 ເມກາວັດ, ໃນນັ້ນ ເຂື່ອນໄຟຟ້າຈຳນວນໜຶ່ງກໍໄດ້ກໍ່ສ້າງສຳເລັດແລ້ວ
ແລະ ລັດຖະບານໄດ້ລົງນາມສົ່ງອອກໃຫ້ປະເທດເພື່ອນບ້ານໃກ້ຄຽງປະມານ 12.000
ເມກາວັດ ໃນປີ 2020.
ກົມດັ່ງກ່າວໃຫ້ຮູ້ວ່າ: ໃນໄລຍະຜ່ານມາ,
ລັດຖະບານໄດ້ພະຍາຍາມປັບປຸງນິຕິກຳ, ລະ ບຽບການຕ່າງໆ ເພື່ອຍາດແຍ່ງດຶງດູດເອົານັກລົງທຶນເຂົ້າມາພັດ
ທະນາໃນຂະແໜງພະລັງງານ ເປັນຕົ້ນປັບປຸງກົດໝາຍສົ່ງເສີມການລົງທຶນ, ກົດໝາຍວ່າດ້ວຍໄຟຟ້າ
ແລະ ກົດໝາຍອື່ນໆທີ່ກ່ຽວຂ້ອງກັບການຮອງຮັບການລົງທຶນຂອງພາກເອກະຊົນພາຍໃນ
ແລະ ຕ່າງປະເທດໃຫ້ດີຂຶ້ນເທື່ອລະກ້າວ ເພື່ອຍາດແຍ່ງເອົາການຮ່ວມມື-ການລົງທຶນຂອງຕ່າງປະເທດໃນຫລາຍຮູບແບບເຊັ່ນ:
ການຊ່ວຍເຫລືອດ້ານວິຊາການ (TA), ສະໜັບສະໜູນດ້ານການເງິນ ແລະ ການລົງທຶນໂດຍກົງຂອງຕ່າງປະເທດ
(FDI) ເພາະວ່າການລົງທຶນໃນຂະແໜງໄຟຟ້ານີ້ແມ່ນໃຊ້ທຶນຮອນຫລວງ ຫລາຍ, ແຕ່ງົບປະມານລັດບໍ່ພຽງພໍ,
ເອກະຊົນລາວກໍບໍ່ທັນແຂງແຮງດ້ານວິຊາການ ແລະ ທຶນຮອນ. ດັ່ງນັ້ນ ຈຶ່ງອາໄສການເຂົ້າມາລົງທຶນໂດຍກົງຂອງຕ່າງ
ປະເທດ.
No comments:
Post a Comment