ຕຳຫລວດເລັ່ງນຳຈັບຄູ່ກໍລະນີຕຳຄົນເສຍຊີວິດແລ້ວຫລົບໜີ

    ເຈົ້າໜ້າທ​ີ່ຈະລາຈອນ​ໃຫ້​ຮູ້​ວ່າ: ໃນເວລາ 22:24 ໂມງ ຂອງວັນທີ 10 ມີນານີ້, ຢູ່ເຂດ ບ້ານດົງນາທອງ ເມືອງສີໂຄດຕະບອງ ນະຄອນຫລວງວຽງຈັນ, ໄດ້ເກີດອຸປະຕິເຫດລົດໃຫຍ່ ບໍ່ຮູ້ໝາຍເລກທະບຽນ ຕຳລົດຈັກ ໝາຍເລກທະບຽນ ຈບ 6542 ກຳແພງນະຄອນ, ຂັບຂີ່ ໂດຍທ້າວ ບົວຄຳ, ອາຍຸ 34 ປີ ອາຊີບ ກຳມະກອນ, ຢູ່ບ້ານຈັນສະຫວ່າງ ເມືອງສີໂຄດ ຕະບອງ. ໃນເບື້ອງຕົ້ນເຈົ້າໜ້າທີ່ໃຫ້ຮູ້ວ່າ: ລົດທັງສອງຄັນແລ່ນມາແຕ່ເສັ້ນ ທາງໄຟແດງ ດົງນາໂຊກມຸ້ງໜ້າໄປທາງ 3 ແຍກດົງນາທອງ​​-ໜອງແຕ່ງ ດ້ວຍຄວາມໄວ ເມື່ອມາຮອດ ຈຸດດັ່ງກ່າວ ໄດ້ເກີດອຸປະຕິເຫດລົດໃຫຍ່ຕຳເອົາທ້າຍລົດຈັກສົ່ງຜົນໃຫ້ຜູ້ຊ້ອນທ້າຍຄື: ນາງ ຄຳໃສ, ອາຍຸ 22 ປີ ອາຊີບກຳມະ ກອນ, ຢູ່ບ້ານສີໄຄທົ່ງ ເມືອງສີໂຄດຕະບອງ ເສຍຊີວິດຄາທີ່ ຫລັງຈາກນັ້ນລົດໃຫຍ່ຄັນດັ່ງກ່າວໄດ້ຫລົບໜີ. ຊຶ່ງປັດຈຸບັນເຈົ້າໜ້າທີ່ກຳລັງເລັ່ງນຳຈັບຕົວຜູ້ກ່ຽວເພື່ອມາດຳເນີນຄະດີຕາມ ລະບຽບກົດໝາຍ.