laophatthananewspaper: ຈົ່ງນຳໃຊ້ໂລກອອນລາຍຢ່າງມີສະຕິ

ເມື່ອສັງຄົມມີການພັດທະນາ ແລະ ຂະຫຍາຍຕົວຫຼາຍເທົ່າໃດ ແນ່ນອນ ວິວັດທະນາການດ້ານຄວາມຄິດ, ສະຕິປັນຍາຂອງຄົນຍ່ອມມີການພັດທະນາ ແລະ ປ່ຽນແປງໄປຕາມໆກັນ, ເພື່ອຈະເຮັດແນວໃດໃຫ້ທັນກັບສະພາບເງື່ອນໄຂຄວາມຕ້ອງການຂອງຍຸກສະໄໝ, ຖ້າມີການພັດທະນາ ຫຼາຍເທົ່າໃດກໍຈະເຮັດໃຫ້ຄົນໃນສັງຄົມໄດ້ປັບປຸງພັດທະນາຕົນເອງໃຫ້ຫຼາຍຂຶ້ນເທົ່ານັນ ເພື່ອການໃຊ້ຊີວິດໃນສັງຄົມ ຢ່າງມີປະໂຫຍດ. ໂດຍສະເພາະ ແມ່ນເທັກໂນ ໂລຢີທີ່ມາພ້ອມການສື່ສານທີ່ເຮັດ ໃຫ້ເຮົາຮູ້ວ່າເຮົາມີໝູ່ເພື່ອນຫຼາຍ, ສາມາດຕິດຕາມ ຂ່າວສານ ແລະ ຮັບຮູ້ຄວາມ ເປັນໄປຂອງໝູ່ເພື່ອນຕະຫຼອດເວລາ, ເຮັດໃຫ້ເຮົາເຂົ້າໃຈວ່າເຮົາຢູ່ໃນ ຄອບຄົວ ແລະ ຄົນທີ່ເຮົາຮັກ ແຕ່ໃນຄວາມ ຈິງແລ້ວ ບໍ່ແມ່ນຄືແນວນັ້ນ ແລະ ຫຼາຍຄັ້ງເຮົາລືມໄປວ່າຄວາມຈິງແລ້ວເຮົາຢູ່ຄົນດຽວ.

ການຕິດຕາມຄວາມເຄື່ອນໄຫວຂອງໝູ່ເພື່ອນ ແລະ ຄົນອ້ອມຂ້າງນັ້ນ, ການເບິ່ງພຽງ ພາບນິ້ງຜ່ານເຄື່ອງ ມືສື່ສານ ບໍ່ສາມາດເຮັດໃຫ້ເຮົາເຊົາຄິດຮອດ ເທົ່າກັບການໄດ້ພົບ ກັນແທ້ໆ ແລະ ການນັ່ງເບິ່ງຮູບຄົນ ທີ່ເຮົາຮັກ ຜ່ານໂທລະສັບມືຖື ບໍ່ໄດ້ເຮັດໃຫ້ເຮົາມີຄວາມສຸກເທົ່າກັບການ ທີ່ເຮົາ ໄດ້ຢູ່ກັບເຂົາເຈົ້າ ໃນໂລກຄວາມຈິງ. ແຕ່ສິ່ງທີ່ໜ້າເປັນຫ່ວງຫຼາຍກໍແມ່ນການ

ນຳໃຊ້ ສິ່ງດັ່ງກ່າວນັບມື້ຫຍິ່ງເຫັນວ່າພັດທະນາ ແລະ ວ່ອງໄວຈົນບໍ່ມີຂອບເຂດ ເຊິ່ງອາດຈະສົ່ງຜົນກະທົບທັງດ້ານດີ ແລະ ບໍ່ດີມາສູ່ຕົວເຮົາເອງ. ໃນດ້ານດີ ແມ່ນສາມາດເຮັດໃຫ້ຜູ້ຄົນໃນສັງຄົມໄດ້ມີໂອກາດ ຮັບຮູ້ສິ່ງຕ່າງໆທີ່ເກີດຂຶ້ນນັ້ນຢ່າງກ້ວາງໄກ, ຖ້າບາງຄົນຫາກຮູ້ຈັກນຳໃຊ້ ແລະ ຮຽນຮູ້ສິ່ງ ດັ່ງກ່າວ ໃຫ້ ເກີດປະໂຫຍດໄດ້ກໍຈະສາມາດເຮັດໃຫ້ຕົນເອງກາຍເປັນ ນັກວິທະຍາສາດ, ຄົ້ນຄ້ວາ, ວິໄຈ ແລະ ອີກ ຫຼາຍຢ່າງ. ແຕ່ໃນຂະນະດຽວກັນກໍມີຜົນຮ້າຍທີ່ຕາມມາ, ຄືດັ່ງທີ່ເຫັນເປັນປະ ຈຳນັ້ນ ກໍແມ່ນການ ນຳໃຊ້ສື່ດັ່ງກ່າວ ຢ່າງຂາດ ສະຕິ, ກາຍເປັນສິ່ງເສບຕິດສະໜິດໜຶ່ງທີ່ຂາດ ບໍ່ໄດ້, ພາໃຫ້ເສຍເວລາ ແລະ ເຖິງຂັ້ນເສຍຄົນກໍມີ. ທາງ ທີ່ດີຄວນຫັນມານຳໃຊ້ ເວລາຫວ່າງນັ້ນ ໃຫ້ເປັນປະໂຫຍດແກ່ຕົນເອງໃນການ ອ່ານໜັງສື, ສ້າງກິດຈະກຳຮ່ວມ ຄອບຄົວ, ໝູ່ເພື່ອນ ແລະ ອື່ນໆ. ແຕ່ມາເບິ່ງປັດຈຸບັນນີ້ ສິ່ງດັ່ງກ່າວໄດ້ແຜ່ລາມອອກ ເປັນບໍລິເວນກ້ວາງຕ່າງກໍພາກັນ ກົ້ມ ໜ້າກົ້ມຕາໃສ່ແຕ່ໂທລະສັບມືຖື, ຄອມພິວເຕີ, ຫຼິ້ນເກມ, ເເຟດບຸກ ແລະ ອື່ນໆ.

ບັນຫາດັ່ງກ່າວຄວນມີວິທີທາງອອກທີ່ດີໂດຍການສ້າງສະຕິເປັນເຈົ້າການໃນການປ່ຽນແປງພຶດຕິກຳ ຂອງຕົນ, ໂດຍເລີ່ມຈາກຄອບຄົວຕ້ອງເປັນແບບຢ່າງທີ່ດີໃຫ້ຄຳເເນະນຳຕັກເຕືອນ, ສຶກສາອົບຮົມແນວຄິດໃຫ້ ມີຄວາມເຂົ້າໃຈຕໍ່ການນຳໃຊ້ເຄື່ອງມືສື່ສານ, ສະຖາບັນການສຶກສາຕ້ອງມີມາດຕະການ, ປູກຈິດສຳນຶກຂອງ ນັກຮຽນ-ນັກສຶກສາໃຫ້ໄປໃນທາງດຽວກັນກັບຄອບຄົວ, ສ້າງກິດຈະກຳຕ່າງໆທີ່ດີມີ ປະໂຫຍດຈາກການໃຊ້ ຂໍ້ມູນຂ່າວສານມາເປັນຕົວກະຕຸກຊຸກຍູ້ໃນຂະບວນການຮຽນການສອນໃຫ້ເກີດປະໂຫຍດສູງ. ຖ້າເຮົາສາ ມາດແຍກຄວາມເປັນຈິງອອກມາໃຫ້ໄດ້ບໍ່ປ່ອຍໃຫ້ເທັກໂນໂລຢີຫຼອກລວງຕົວເຮົາ, ໃຊ້ມັນຢ່າງພໍດີ ແລະ ປະສາຍຕາຈາກຈໍສີ່ຫຼ່ຽມທີ່ຢູ່ໃນມື ແລ້ວຫຼຽວໄປເບິ່ງຄົນອ້ອມຂ້າງທີ່ເຈົ້າຮັກ ແລະ ຮັກເຮົາ ໃຫ້ຄວາມສ ຳຄັນກັບຄົນອ້ອມຂ້າງໃຫ້ຫຼາຍໆເຈົ້າຈະມີຄວາມສຸກເພາະສິ່ງດັ່ງກ່າວແມ່ນຄວາມຈິງບໍ່ແມ່ນ ໂລກອອນລາຍ.