ທ່ານ ຢູຊີລົງ ກ່າວວ່າ: ອີງຕາມຂໍ້ສະເໜີຮ່ວມມືດ້ານລຶບລ້າງຄວາມທຸກຍາກໃນບັນດາປະເທດອາຊີຕາເວັນອອກຂອງທ່ານ ຫຼີເຄີສຽງ ນາຍົກລັດຖະມົນຕີ ສປ ຈີນ, ທີ່ສະເໜີໃນກອງປະຊຸມສຸດຍອດບັນດາປະເທດອາຊຽນກັບ ຈີນ, ຍີ່ປຸ່ນແລະ ສ.ເກົາ ຫຼີເຊິ່ງຈັດຂື້ນໃນປີຜ່ານມາ, ຊຶ່ງຝ່າຍຈີນເຫັນດີສະໜອງທຶນຮອນເພື່ອເພີ່ມທະວີການພົວພັນຮ່ວມມືລຶບລ້າງຄວາມທຸກຍາກ ກັບບັນດາປະເທດອາຊີຕາເວັນອອກ, ປັດຈຸບັນຝ່າຍຈີນໄດ້ແຕ່ງຕັ້ງຄະນະຜູ້ແທນ ເຊິ່ງປະກອບດ້ວຍກະຊວງການຄ້າຈີນ ແລະຫ້ອງການ ຄະນະຊີ້ນຳລືບລ້າງຄວາມທຸກຍາກ ແລະ ການພັດທະນາຂອງຄະນະລັດຖະບານຈີນມາເຮັດວຽກຢູ່ລາວ ແຕ່ວັນທີ 11 ຫາ 14 ມີນາ 2015 ເພື່ອປຶກສາຫາລືແລະເຈລະຈາກ່ຽວກັບແຜນການຊ່ວຍເຫຼືອໃນການລຶບລ້າງຄວາມທຸກ ຍາກແລະຈະຮ່ວມລົງນາມໃນບົດບັນທຶກກອງປະຊຸມຂອງການຮ່ວມມືດັ່ງກ່າວ.
ໃນການຫາລືຂອງທັງສອງຝ່າຍໄດ້ເຫັນດີວ່າ: ທັງສອງປະເທດຈະຕົກລົງແລກປ່ຽນຄະນະຜູ້ແທນແລະເຮັດ ວຽກຮ່ວມ ກັນເພື່ອຖອດຖອນບົດຮຽນຕົວຈິງໃນການລົງເຮັດວຽກງານລຶບລ້າງຄວາມທຸກຍາກໃນຊຸມຊົນໃນນັ້ນຕົກລົງເປັນເອກະພາບໃນການ ເປັນເຈົ້າພາບຮ່ວມກັນຈັດເວທີປຶກສາຫາລືແລກປ່ຽນບົດຮຽນລະຫວ່າງ ອາຊຽນ-ຈີນກ່ຽວກັບການແກ້ໄຂຄວາມ ທຸກຍາກຄັ້ງ ທີ 9, ພ້ອມທັງສະເໜີການຮ່ວມມືສະໜັບສະໜູນທຶນຮອນຂອງ ສປ ຈີນ ໃຫ້ແກ່ລາວໃນການຈັດຕັ້ງປະຕິບັດຕາມແຜນງານ ແລະ ໂຄງການທີ່ໄດ້ຕົກລົງກັນ.
ພາຍຫຼັງສຳເລັດການຫາລືຮ່ວມກັນຂອງທັງສອງຝ່າຍ, ທ່ານ ຄຳຜາຍ ວິໄລຫົງ ຫົວໜ້າພະແນກຮ່ວມມື ແລະ ພົວພັນຕ່າງປະເທດຫ້ອງການພັດທະນາຊົນນະບົດ ແລະ ລຶບລ້າງຄວາມທຸກຍາກໄດ້ໃຫ້ສຳພາດຕໍ່ນັກຂ່າວ CRI ວ່າ: ໂດຍເຫັນວ່າການ ຫຼຸດຜ່ອນຄວາມທຸກຍາກແມ່ນໜຶ່ງໃນຂົງເຂດຕົ້ນຕໍໃນການຮ່ວມມືທາງດ້ານເສດຖະກິດ-ເຕັກນິກລະຫວ່າງລາວ-ຈີນ, ຊຶ່ງຜູ້ນຳທັງສອງປະເທດໄດ້ລົງນາມກັນໃນປີ 2011. ສະນັ້ນ ການຮ່ວມມືທາງດ້ານການພັດທະນາຊົນນະບົດ ແລະ ລຶບລ້າງຄວາມທຸກຍາກ ເປັນເປົ້າໝາຍບູລິມະສິດຂອງລັດຖະບານລາວ, ຊຶ່ງເຫັນວ່າການຊ່ວຍເຫຼືອຂອງຝ່າຍ ຈີນແມ່ນມີຄວາມສຳຄັນ ແລະ ທາງລາວໄດ້ສະເໜີ 3 ບ້ານທົດລອງເພື່ອລົງປະຕິບັດວຽກງານດັ່ງກ່າວ ຄື: ບ້ານ ໃຫຍ່ນາຈະເລີນ ເມືອງສັງທອງ ນະຄອນຫຼວງວຽງຈັນ, ບ້ານນາຄູນ ເມືອງບໍລິຄັນ ແຂວງບໍລິຄຳໄຊ ແລະ ບ້ານປາກຍອຍ ເມືອງທ່າໂທມ ແຂວງໄຊສົມບູນ.
No comments:
Post a Comment